Ulyqtaý rásiminde Prezıdent: «Taǵy bir mańyzdy, halyqty mazalaıtyn másele – joldardyń sapasy. Sol sebepti avtojoldardyń jaǵdaıyn jaqsartý – bizdiń negizgi maqsattarymyzdyń biri» degen bolatyn. Shyndyǵynda, elimizde jóndeý nemese jańadan salý jumystary kesheýildep jatqan joldar az emes. Sondaı joldardyń biri – «Nur-Sultan – Pavlodar» baǵyty.
Jýyrda Pavlodar oblysyna jumys saparymen barǵan Indýstrııa jáne ınfraqurylymdyq damý mınıstri Roman Sklıar osy avtojoldyń Shiderti kentiniń mańyndaǵy ýchaskesine atbasyn tiregen-di. Jumystyń jaı-kúıin kózimen kórgen mınıstr merziminen tym uzaqqa sozylǵan jol qurylysyn 3 aı ishinde bitirińder dep shuǵyl tapsyrma berdi.
2014 jyly bastalǵan «Nur-Sultan – Pavlodar» jol qurylysy 2017 jyly paıdalanýǵa berilýge tıis bolatyn. Mınıstr R.Sklıardyń «Nur-Sultan – Pavlodar» avtoban jobasynyń ýaqytynda aıaqtalmaı jatqany úshin halyq aldynda uıalatynyn da jasyrmaǵany soǵan baılanysty.
– Sheteldik bir merdiger jobany jol ortada qaldyryp ketti nemese jergilikti kompanııalar sylbyr jumys jasady dep jaýapkershilikten qashýymyzǵa bolmas. Tapsyrys berýshi mınıstrlik tolyǵymen jaýap berýge mindetti, – dedi mınıstr.
Al jol qurylysyna jaýaptylar mańyzdy jumystyń kesteden keshiktirilýine áýel bastan basty sebepker dep «DenaRahsazKonstrakshn» atty ırandyq kompanııaǵa kiná artady. Bul kompanııa Pavlodar aýmaǵyndaǵy uzyndyǵy 115 shaqyrym bolatyn úsh jol ýchaskesine jaýapty bolǵan eken. Kompanııa júktelgen mindettemeni oryndaı almaǵan soń, jasalǵan kelisimshart buzylyp, qaıtadan konkýrs uıymdastyrylǵan.
– Byltyr joldyń biraz bóligi ashyldy. Bıyl qurylysty aıaqtaýǵa 28 mlrd teńge bólindi. Qazir jumys kestege sáıkes júrgizilýde. Jumys az qaldy. Qalqaman men Pavlodar arasyndaǵy birneshe ýchaskede quıylǵan betondardyń sapasy synǵa ilikkeni belgili. Tóseý tehnologııasy buzylǵany úshin merdiger kompanııa joldy óz qarajatyna qaıta salady, – dedi R.Sklıar.
«QazAvtojoldyń» jergilikti fılıal basshylary qyrýar qarajatty ıgermeý jol salýshylardyń sylbyrlyǵynan, sondaı-aq, qıyrshyq tas pen bıtým sııaqty materıaldyń jetispeýinen de boldy dep kinálaıdy. Kináliler anyqtala jatar. Qalaı bolǵanda da, mınıstr merdigerlerden joldy tezirek ashýdy talap etip otyr.
– Jumys kúnin uzartyńyzdar. Bir ýchaskede 54 tehnıka birligi jumys isteıdi dep berilgen. Alaıda, kózben qaraǵanda ol tehnıkanyń jartysy da kórinbeıdi. Halyqqa 2, 3-shi merdigerler aýysty, eki ret tender ótkizildi dep túsindire almaımyz. Naqty merzim belgileıik. Jumysty 3 aıda aıaqtaýdy tapsyramyn. Qurylys kestesin túzetińizder. Qosymsha merdiger alasyzdar ma, qaıtkenmen de bıyl aıaqtaýymyz qajet, jyldamdataıyq, – dedi R.Sklıar.
Bul avtojoldyń qurylysy 5 jyl buryn bastalǵanyn aıttyq. Sodan bergi aralyqta «QazAvtojol» AQ-nyń oblystyq fılıalynyń birneshe basshysy aýysyp úlgerdi. Arasynda isti bolǵandary da bar. Negizi, osy basshylardan naqty jaýapkershilik, halyq aldyndaǵy mindet pen paryz, talap pen tártip talap etilýi kerek edi. Joba bastalǵanda «QazAvtojol» AQ jergilikti fılıalyn eń aldymen Ersin Sarıev basqardy. Alaıda, ol jobany aıaqtap úlgermeı qyzmetinen ketti. Odan keıin 2017 jyly Qaırat Káribaev basshylyqqa taǵaıyndalǵan-dy. Odan keıin 2018 jyly nebári 2-3 aı ýaqyt tizgin Nuraly Toıymbetovke tıdi. Qarap otyrsaq, avtoban qurylysyn abyroımen tapsyrady degen basshylar bir jylǵa jeter-jetpes ýaqytta tapsyrylǵan mindetti oryndamaı, kreslosymen qosh aıtysyp kete barady.
Qazir jergilikti fılıaldy Aqylbek Qabyldın basqarady. Oǵan bul avtojoldy 2019 jyldyń sońyna deıin aıaqtaý mindeti júktelip otyr. Kezinde Investısııalar jáne damý mınıstri bolǵan Jeńis Qasymbek:
– «Nur-Sultan – Pavlodar» tasjolynda jańa merdigerler jumys istep jatyr. Barlyq problema osy ýchaskelerdegi jumysty aıaqtaýǵa qatysty bolyp otyr. 2018 jyly atalǵan ýchaskeni aıaqtaýǵa sońǵy ret qarjy beriledi, ıaǵnı 2019 jyldyń bıýdjetinde bul jobaǵa aqsha qarastyrylmaǵan. Sondyqtan nysan 2018 jyly tolyǵymen paıdalanýǵa berilýge tıis, – degeni esimizde. Alaıda merzim taǵy shegerildi. 2018 jyly paıdalanýǵa tapsyrý josparlanǵan «Nur-Sultan – Pavlodar» tasjolynyń qurylysy merdigerlerdiń jibergen olqylyqtary saldarynan sozylyp ketkeni habarlandy.
«Nurly jol» baǵdarlamasy aıasynda qolǵa alynyp, qurylysy uzaqqa sozylǵan taǵy bir baǵyt – «Ortalyq-Shyǵys» avtojol dálizi. Bul baǵyttaǵy joldyń jalpy uzyndyǵy – 905 shaqyrym, onyń 420 shaqyrymy Pavlodar oblysynyń aýmaǵy arqyly ótedi. «QazAvtojol» AQ jergilikti fılıalynyń málimetinshe, bul aýmaq 15 ýchaskege bólingen. Qazir 9-bólikte qurylys jumystary aıaqtalyp, 200 shaqyrym jol paıdalanýǵa berilgen.
Sóz basynda aıtyp ketkenimizdeı, avtomobıl joly halyqtyń turmys sapasyna tikeleı áser etetin faktor. «Nur-Sultan – Pavlodar» tasjolynyń ashylýyn kútken halyq jazda shańy burqyrap, oıdym-oıdym bolyp jatatyn jolmen júrýden ábden sharshady. Kólik apattary da kóp bolady. Jurt qashan aıaqtalady dep kútip otyr.
Pavlodar oblysy
