Bul sapar ózara senim men qaýipsizdikti bekitý jóninde jasalǵan Vena qujaty aıasynda atqarylyp otyr. 1999 jyly Venada qol qoıylǵan bul qujattyń basty maqsaty – aqparat almasý, áskerı sıpattaǵy qaýipti oqıǵalar kezinde áriptestik, áskerı qarym-qatynasta senimsizdik pen kúdik-kúmándi joıý úshin osyndaı tanysý saparlaryn uıymdastyrý, áskerı baǵyttaǵy keıbir qyzmet túrlerine baqylaý ornatý bolatyn.
Bul jolǵy sapardyń basty maqsaty – áskerı tehnıka men qarý-jaraqty kórý emes, jaýyngerlermen qarym-qatynas jasap, olardyń kásibı daıyndyǵyn baıqaý, jeke quramdaǵy oqytý jáne tárbıe jumystarymen, Ulttyq ulan sarbazdarynyń ózderine júktelgen qyzmettik-áskerı mindetterin qalaı oryndaıtynymen tanysý bolypty.
Bir sózben aıtqanda mundaı sharalar otandyq áskerı qarýly kúshterdiń ashyqtyǵyn kórsetedi.
EQYU ınspektorlary «Batys» qolbasshysynyń orynbasary polkovnık Pavel Sıtnıkovpen jáne 5517 áskerı bólim komandıri podpolkovnık Maqsat Bóltirikovpen kezdesti. Halyqaralyq baqylaýshylar jaýyngerlerdiń kúndelikti turmysymen tanysyp, kazarmany, sport qalashyǵyn, ashana men áskerı bólimniń avtoparkin aralady.
- Búgingi tańda Azııa aýmaǵy álem halqynyń nazaryn ózine aýdaryp otyr. Qazaqstan Respýblıkasy osy óńirde ózine halyqaralyq baqylaýshylardy kirgizip, turmysymen tanystyrýǵa ruqsat bergen jalǵyz memleket bolyp otyr. Eýropadaǵy qaýipsizdik pen yntymaqtastyq uıymy Qazaqstanmen arada joǵary deńgeıdegi qarym-qatynas ornaǵanyna rızashylyq bildiredi, - deıdi halyqaralyq áskerı baqylaýshylar tobynyń jetekshisi Kazo Djozef Marsel Fransýa.
Mártebeli meıman qazaqstandyq sarbazdardyń jabdyqtalýyn, turmys jaǵdaıyn joǵary baǵalap, áskerı bólim basshylaryna ashyqtyǵy úshin alǵys aıtty.
Batys Qazaqstan
