G. Ábdiqalyqova azamattardyń borysh júktemesin tómendetý jumysy Jarlyqta kórsetilgen naqty krıterıılerge sáıkes bolatynyn atap ótti.
Atalǵan sharalarmen kepilsiz tutynýshylyq nesıeleri bar azamattardyń barlyǵy qamtylmaıdy, memlekettiń kómegine asa muqtaj jandar ǵana qamtylady.
Kómek kórsetiletin tulǵalar sanaty:
kópbalaly otbasylar;
asyraýshysynan aırylý jaǵdaıyna baılanysty tólem alatyn otbasylar;
múgedek balalary bar otbasylar;18 jastan asqan, bala jasynan múgedek adamdy tárbıelep otyrǵan otbasylar;
ataýly memlekettik áleýmettik kómek alatyndar;
jetim balalar;
ata-anasynan kámelettik jasqa deıin aırylǵan, 29 jasqa tolmaǵan, ata-ananyń qamqorlyǵynsyz qalǵan balalar.
«18 jasqa deıingi 4 jáne odan kóp balasy bar otbasylar kóp balaly otbasy retinde esepteledi. Bazalar boıynsha osyndaı otbasylardyń nesıeleri bar-joǵy qaralady. Ekinshi – asyraýshysynan aıyrylý jaǵdaıyna baılanysty tólem alatyn otbasylar. Búginde memleketimizde asyraýshysynan aıyrylǵan 600-ge jýyq otbasy bar. Baza boıynsha banktermen kelisilgen túrde osy otbasylardyń qanshasy nesıe tólep otyrǵany qaralady», dep túsindirdi vıse-premer.
Sondaı-aq ol bankter osyndaı otbasylardyń nesıesiniń bar-joǵyn anyqtaý úshin ataýly áleýmettik kómek alýshylar bazasyn qaraıtynyn atap ótti. Búginde 240 jýyq otbasy AÁK alady.
Sondaı-aq ol osy qarjylaı kómekti kórsetý kezinde nesıeniń qandaı maqsatta alynǵanyna qatysty eshqandaı da tekseris jumystary júrgizilmeıtinin aıtty.
«Nesıeniń ne úshin alynǵany, ol qarajattyń qaıda jumsalǵany tereńinen zerttelmeıdi. Sebebi, bul áleýmettik qoldaýǵa muqtaj, az qamtylǵan azamattar. Sońǵy 2-3 aıda biz oblystarda, elordada halyqpen belsendi túrde kezdesýler ótkizdik. Kóptegen azamattar qabyldandy. Atalǵan máseleni qozǵaǵan kezde, bul sanattyń qandaı da bir qymbat zattar, máselen, aıfondar, sýper teledıdarlar, jańa tehnıka satyp almaıtynyn kórdik. Negizinen olardyń azyq-túlikke, dári-dármekke, emdelýge – tirshilikti qamtamasyz etýshi eń qajetti nárselerge, ónimderge qarajattary jetpeıdi», dedi G. Ábdiqalyqova.
