Sharaǵa О́zbekstan, Qyrǵyzstan, Tájikstan jáne Qazaqstan quzyretti organdarynyń kúshteri men quraldary jumyldyryldy. Sondaı-aq, ShYU baqylaýshy memleketteriniń, TMD terrorızmge qarsy ortalyǵy jáne Ujymdyq qaýipsizdik týraly shart uıymynyń ókilderi qonaq retinde shaqyryldy.
Oqý-jattyǵý jıyny barysynda ShYU-ǵa múshe-memleketterdiń qaýipsizdigine qater tóndiretin halyqaralyq terrorlyq uıymdarǵa qarsy is-qımyl boıynsha birlesken sharalar pysyqtaldy. Jattyǵý mindetteri joǵary deńgeıde jáne tolyq kólmede oryndaldy. Terrorızmge qarsy qurylymdardy basqarý kezinde basqarý organdarynyń úılesimdi is-áreketteri qamtamasyz etildi. Lańkestik áreketterge qarsy birlesken is-sharalardy ótkizýdiń jańa nysandary men ádisteri qoldanyldy. Terrorızmge qarsy operasııanyń kúshtik fazasyn ótkizý kezinde ShYU-ǵa múshe memleketterdiń arnaıy bólimsheleriniń tájirıbelik daǵdylary jetildirildi. Terrorızm aktileriniń saldaryn azaıtý jáne joıý boıynsha ózara is-qımyl saralandy.
Oqý-jattyǵý jıynynyń sońǵy kúninde ssenarıı boıynsha lańkester eldi mekenge jarylǵysh qurylǵy qoıǵan kórneki oqý-jattyǵý kórsetildi. Áskerıler aldymen turǵyndardy qaýipsiz jerge kóshirip, bombany zalalsyzdandyrdy. Sol arada pıǵyly teris zalymdar avtobýsty basyp alyp, 15 adamdy kepildikke alǵan bolatyn. Qylmyskerlerdiń birazy qorshaýdan qashyp shyǵyp, ákimshilik ǵımaratqa kirip úlgerdi. Degenmen, áskerıler olardy qorshap alyp, turǵyndardy aman-esen qutqaryp, alǵa qoıylǵan mindetti abyroımen oryndap shyqty.
– Oqý-jattyǵýdyń belsendi kezeńine Qazaqstan, О́zbekstan jáne Tájikstan qatysty. Operasııanyń tabysty aıaqtalǵanyn aıtý kerek. Meniń oıymsha, barlyq bólimsheler saýatty túrde jáne uıymshyldyqpen áreket etti. Qoryta aıtar bolsaq, ShYU aıasyndaǵy yntymaqtastyq mindetti túrde oń nátıjege jetkizetin bolady, – dedi Reseı FQQ basshysynyń birinshi orynbasary Sergeı Smırnov.
Aıta ketý kerek, polıgonda bolǵan oqıǵalar ssenarııi shynaı jaǵdaıǵa meılinshe jaqyndastyrylyp quryldy. Uıymdastyrýshylar oqý-jattyǵý barysynda jınaqtalǵan tájirıbe ShYU keńistigindegi qaýipsizdikti jáne qazirgi kezdegi bolýy múmkin qaýip-qater jaǵdaıynda jedel mindetterdi oryndaýǵa ıgi yqpalyn tıgizetinin atap ótti.
Oqý-jattyǵý aıasynda áskerı tehnıkalar men qarý kórmesi uıymdastyrylyp, arnaıy maqsattaǵy jáne basqa da áskerı bólimsheler kórneki mashyqtaryn kórsetti.
