«Memleket basshysy Qasym-Jomart Toqaev sabaqtastyq negizinde Tuńǵysh Prezıdent - Elbasy Nursultan Nazarbaevtyń áleýmettik strategııasyn jalǵastyryp, halyqtyń ózekti máselelerin sheshýge baǵyttalǵan irgeli sharalardy qabyldaýda. Prezıdent áleýmettik turǵydan az qamtylǵan azamattarynyń borysh júktemesin azaıtý sharalary týraly Jarlyqqa qol qoıdy», dep Premer-Mınıstr osy qabyldanǵan sheshimniń arqasynda áleýmettik turmysy tómen azamattarǵa kómek kórsetiletinin jetkizdi.
Memleket basshysynyń tapsyrmasy boıynsha Úkimet halyqtyń eń ózekti áleýmettik máselelerin shuǵyl túrde sheshýge arnalǵan jáne halyqtyń ál-aýqatyn arttyrý maqsatynda jedel sharalar toptamasyn ázirledi. Atap aıtqanda, osy sharalardyń iske asýynyń nátıjesinde aǵymdaǵy jyldyń aıaǵyna deıin jumyssyz 300 myńnan astam adam «Bastaý bıznes» jáne «Jas kásipker» baǵdarlamalary boıynsha kásiptik bilim berý arqyly jumysqa ornalastyrý sharalarymen qamtylady.
Sonymen qatar, jeke kásipkerlikti uzaq merzimdi kredıtter jáne granttar usyný arqyly damytý sharalary, áleýmettik kómek usynýdyń tıimdiligin arttyrý, az qamtylǵan otbasylarǵa jaldamaly baspana qurylysynyń kólemin eki ese ósirý (jylyna 20 myń páter), jumys isteıtin jastarǵa jaldamaly úıdiń qurylysyn úsh esege arttyrý (jylyna 1 myń páterden 3 myń páterge deıin) sharalary qolǵa alynady. Sondaı-aq az qamtylǵan otbasylardyń balalaryna keshendi áleýmettik qoldaý sharalary uıymdastyrylady, onyń ishinde bıyl 5 myń bilim granttaryn bólý, qoǵamdyq kólikte tegin jol júrýin qamtamasyz etý bar.
«Osy mańyzy úlken sharalardy iske asyrý úshin «2019-2021 jyldarǵa arnalǵan respýblıkalyq bıýdjet týraly» Zańǵa ózgeristerdi engizý qajet. Osyǵan baılanysty, bıýdjetke engiziletin ózgeristerdi qarastyrý úshin Parlament sessııasyn jumysynyń merzimin uzartý máselesin qarastyrýdy suraımyn», dedi Asqar Mamın.
Parlament depýtattary VI shaqyrylymyndaǵy tórtinshi sessııa jumysyn 2019 jylǵy 5 shildege deıin uzartý týraly sheshimdi biraýyzdan qabyldady.
