Jarysqa elimizdiń 25 qalasynan bólek, Reseı, Ýkraına, Belarýs elderinen 300-den astam oıy men qoly júırik ıntellektýal azamat qatysty.
– Jarys WCA (World Cube Association) uıymy bekitken 18 erejeniń 16-sy boıynsha ótti. Qatysýǵa nıet bildirgenderdiń basym kópshiligi ózderiniń baqtaryn alǵash ret synap otyr, jas erekshelikteri de ártúrli. Eń kishi úmitkerimiz 6 jasta bolsa, eresegimiz – 51-de. Osynyń ózinen-aq rýbık tekshesine degen qyzyǵýshylyqtyń qarqyn alyp kele jatqanyn kórýimizge bolady, – deıdi «Kazakstan speedcubing federation» QB prezıdenti Arman Mashımov.
Jalpy, zııatkerler saıysy Semeıde dál osyndaı aýqymdy túrde 4-shi márte ótkizilgen eken. Sonyń ekeýi halyqaralyq dárejege deıin jetti. Jastar arasyndaǵy salamatty ómir saltyn nasıhattaý men halyqtyń rýbık tekshesine degen qyzyǵýshylyǵyn arttyrýdy maqsat etken sharaǵa Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebi únemi qoldaý bildirip keledi.
Qazir resmı emes aqparatqa súıensek, elimizde Rýbık tekshesimen áýestenýshilerdiń sany 10 myńnan asyp jyǵylady.
Jarysqa alǵash ret qatysýshylardyń biri Gúlsara Aǵadilova Rýbık tekshesimen osydan 9 jyl buryn tanysqan. Búginde qaladaǵy medısınalyq mekemeniń birinde eńbek etetin 51 jastaǵy spıdkýber baq synap kórýdi jón dep tapqan.
– Sharanyń dál osylaı joǵary deńgeıde uıymdastyrylatynyna senbep edim. Keremet áserdemin. Rýbık tekshesin qurastyrýdyń jas erekshelikke kedergisi joq. Kerisinshe paıdaly jaqtary mol dep sanaımyn. Búgin alǵash ret qatysa otyryp, bolashaqta da jıi baǵymdy synap turamyn degen sheshimge keldim, – deıdi ol.
Jarystyń alǵashqy 2 kúninde qatysýshylar úshin irikteý kezeńderi ótip, aqtyq syn qalanyń ortalyq alańynda uıymdastyryldy. Barlyǵy 16 medal men «Cubing Semey Open-2019» kýbogy sarapqa salyndy.
Jaqsylyq MURATQALI,
«Egemen Qazaqstan»
