Baıqaýǵa bıyl 66 úkimettik emes uıymnan 91 ótinish túsken. Jármeńkege túsken shaǵyn jáne jergilikti qoǵamdastyq problemalaryn sheshýge baǵyttalǵan jobalar baıqaýy kádimgi dýyldaǵan báıge ispettes. Kelýshiler de, komıssııa músheleri de jobalarda kóterilgen máselelerdiń ózektiligin tarazyǵa salady. Kóterilgen máseleniń áleýmettik ózektiligi ótkir bolǵan saıyn, jeńis máresi de jaqyndaı túsedi. Saraptaý komıssııasy bıyl shaǵyn jobalardan 7 atalym boıynsha 7 jumysty tańdap alyp, olardyń árqaısysyna 200 myń teńgeniń sertıfıkatyn tabys etti.
Joba shaǵyn bolǵanymen, mańyzdylyǵy jóninen salmaǵy jeńil emes. «Eńbek – qoǵam negizi» atalymy boıynsha Meńdiǵara aýdanyndaǵy «Eskertkish shyraqshylary» bastamashy tobynyń «Jumysshy mamandyqtarynyń mártebesin kóterý jáne eńbek áýletterin nasıhattaý» jobasy jeńimpaz atandy. Máseleniń mańyzdylyǵyn jobanyń aty-aq aıtyp tur. Sol sııaqty «Jergilikti ózin ózi basqarý jáne jergilikti qoǵamdastyqtar», «Shekarasyz álem», «Búgingi baqytty balalyq – erteńgi myqty Qazaqstan», «Adam kapıtaly – jańǵyrtý negizi», «Aqyldy tehnologııalar», «Myqty jastar – myqty el» atalymdary boıynsha sertıfıkatqa ıe bolǵan jobalardyń barlyǵy da demeýdi, qarjylandyrýdy qajet etetin ótkir problemalardy ortaǵa salǵan.
Áleýmettik máselelerdi jergilikti qoǵamdastyqtarmen birlesip sheshýdi maqsat etken 4 joba tańdap alynyp, olardyń árqaısysyna 500 myń teńgeniń sertıfıkaty tabystaldy. Solardyń biri Uzynkól aýdanyndaǵy «Uzynkól aýdany jastary» qoǵamdyq birlestigine múshe bastamashy top kótergen «Qanatty dop» jobasy aýyldaǵy mektep oqýshylary tárbıesine qajetti ótkir máseleni qozǵaıdy. Aýyl mektebiniń sport alańy joq. Aýdan ortalyǵyndaǵy №2 Uzynkól orta mektebiniń 242 oqýshysy, 1 aýla klýby men balalardyń 4 sport seksııasy sport alańyna zárý. Oqýshylardyń deneshynyqtyrý sabaǵy kóshede ótedi. Al sport alańyn salý qarjyǵa kelip tireledi. Jergilikti atqarý organdaryna qaratpaı-aq, muny «Uzynkól jastary» qoǵamdyq birlestigi ózderi sheshýdi qolǵa alypty. Osy mekteptegi deneshynyqtyrý pániniń muǵalimi Almas Ospanov jobasyn áleýmettik bastamalar men jobalar jármeńkesine usynyp kórýge táýekel etti. Ol utqan qarjyǵa bastapqy qurylys materıaldaryn alsa, qalǵan jumysqa aýdandaǵy sharýa qojalyqtary kómek berýge ýáde etti. A.Ospanovtyń joly boldy, jármeńkede 500 myń teńgeniń sertıfıkatyn utty.
– Jeti sharýashylyq kómek beremiz dep otyr. Áli qıyrshyq tas, jumys kúshi, tehnıkalar kerek. Oǵan kómek beretinder bar. Aldaǵy oqý jyly mekteptiń óziniń sport alańy bolady, – deıdi A.Ospanov.
Jármeńkege tek áleýmettik bastamalar ǵana emes, bıznes-qoǵamdastyqtar da qatysty. Onda «Mılh» sút zaýyty Qostanaı qalasyndaǵy «Ekopatrýl» bastamashy tobynyń «Gúldene ber, týǵan jerim!» jobasyn 200 myń teńgemen qarjylandyrdy. Sonymen qatar bıyl Qostanaı oblysy boıynsha «GRıN» Azamattyq alıansy» qoǵamdyq qory aýyldaǵy úkimettik emes uıymdar áleýetin kúsheıtý maqsatynda 8 jobany qarjylandyryp, olardyń árqaısysyna 500 myń teńgeniń sertıfıkatyn tapsyrdy.
– Jármeńke bastamashy toptardyń úkimettik emes uıymdar deńgeıine deıin ósýine múmkindik beredi. Onyń qalalar men aýdandarda jaqsy mysaldary kóp. Bastamashy top jármeńkege qatysqan saıyn ózderiniń pikirlesterin tabady, qoǵamdastyqqa birigedi. Aýtızmmen aýyratyn balalar men múgedek balalar analary birigip, jármeńkege óte ózekti máseleler jobalaryn usynyp otyrdy. Olar jármeńkeden utqan qarjy arqyly kabınetter ashty, ony quraldarmen jabdyqtady, solaı óz aıaǵynan turyp ketti, – deıdi oblys boıynsha «GRıN» Azamattyq alıansy» qoǵamdyq qorynyń tóraıymy Dınara О́tebaeva.
Áleýmettik bastamalar men jobalar jármeńkesi arqyly ıgilikti isterdiń júzege asyp jatqanyn jeńimpazdarǵa oblys ákimi atynan sertıfıkattar tapsyrǵan oblys ákiminiń orynbasary Marat Júndibaev ta jalǵastyrdy.
– Qoǵamdaǵy áleýmettik máselelerdi sheshýde úkimettik emes uıymdardyń mańyzy arta tústi. Tórt-bes jylda bul iske bıznes qoǵamdastyqtardyń belsendiligi artyp keledi. Sońǵy jármeńkedegi jobalarǵa on bıznes uıymy qatysyp, áleýmettik máselelerdiń sheshimin tabýyna qoldaý bildirdi, – dedi Marat Qonysbaıuly. Bıyl 516 mıllıon teńgege 312 joba júzege asady. Jobalardy qarjylandyrý osydan úsh jyl burynǵy ýaqytqa qaraǵanda úsh ese kóbeıdi. Azamattyq qoǵamnyń damýy osylaı isten kórine bastady.
QOSTANAI
