«Jas qanat» móltek aýdanyndaǵy qurylys barysyn aralap shyqqan B.Saǵyntaev tıisti basqarmalarǵa otandyq ónimderdi paıdalaný boıynsha qurylys kompanııalaryna baqylaýdy kúsheıtýdi tapsyrdy.
Aýdandyq ákimdikke B.Hmelnıskıı kóshesi boıyndaǵy aımaqty abattandyrý, skverdi úńgileý, «Jas qanat» móltek aýdanynyń aýmaǵyn qosymsha jasyldandyrý, sonymen qatar qalalyq Mobıldilik basqarmasymen birge Baımaǵambetov kóshesinen jańa turǵyn úılerge deıin jol salý máselesin sheshýdi tapsyrdy.
«Jas qanat» móltek aýdanynda «Nurly jer» baǵdarlamasy boıynsha kópáterli jeti turǵyn úıler, 280 oryndy bala baqsha salynýda. Qurylys obektilerin bıylǵy jyldyń qyrkúıeginde iske qosý josparlanǵan.
Baqytjan Saǵyntaev Túrksib aýdanynyń turǵyndarymen kezdesti, TÚKSh, aýlalardy abattandyrý, qoǵamdyq qaýipsizdikti qamtasyz etý boıynsha olar aıtqan shaǵymdar men usynystardy tyńdady. Búgingi kúni Túrksib aýdanynda 16 eski úı súrilip, olardyń ornyna 803 páterli 39 úı salynǵan. Baǵdarlamany jalǵastyrý boıynsha taǵy 28 úı anyqtaldy, 147 aýla kúrdeli jóndeledi, 15 kóshe jańaryp, 8 km trotýar, 2,6 km aryq jelisi (2 kóshe) salynyp, uzyndyǵy 7,8 kılometrge aǵymdaǵy jóndeý júrgiziledi.
Budan soń qala ákimi «Almaty-1» temirjol vokzalynyń jumysymen tanysty. Onyń barysynda B.Saǵyntaevqa vokzal qaıta jóndelse, onyń ótkizý qabileti táýligine 16 myń jolaýshyǵa jetetindigi týraly aıtyldy. Rekonstrýksııa kezinde platforma uzarady, eskalator men lıft ornatylyp, jer asty ótpeli jolynyń, kópdeńgeıli parıknge ótýdiń kólemi keńeıedi.
Baqytjan Saǵyntaev Túrksib aýdanyna jasaǵan jumys saparyn múmkindigi shekteýli balalardyń «Meıirim» reabılıtasııalyq ortalyǵyna barýmen qorytyndylady. Ortalyq ujymy mamandardyń balalarǵa kórsetetin korreksııalyq-damytý sabaqtary, psıhologııalyq-pedagogıkalyq kómekteri, emdik deneshynyqtyrý, áleýmettik-eńbek reabılıtasııasy, mýzykalyq, kórkem, oıyn terapııasy týraly aıtty. Ortalyq serebraldy sal aýrýyna shaldyqqan, qozǵalý múmkindikteri men damý jaǵynan shektelgen 3 jastan 15 jasqa deıingi balalarǵa arnalǵan.
