О́render ónegesi
Sársenbi, 24 sáýir 2013 1:40
Eki dos Aqan Dıdanov pen Andreı Perkov qylmyskerdi ustaýǵa kómektesti
Osy kúnde qaraǵandylyq bul jetkinshekterdiń esimderi el aýzynda. Jas shamalaryna qaramaı qoryqpaı-úrikpeı, tipti eresek azamattardyń da báriniń birdeı batyly bara bermes jaǵdaıda erlik úlgisin tanytýlary jurtty súısintip jatyr. Olar bulaısha bolaryn ózderinen kútpegen de edi. Ádettegideı bir top joldastarymen mekteptegi sabaqtan qaıtyp kele jatqandarynda aýyzben aıtqysyz oqıǵa ústinen shyǵamyz dep oılamaǵan shyǵar.
Sársenbi, 24 sáýir 2013 1:40
Eki dos Aqan Dıdanov pen Andreı Perkov qylmyskerdi ustaýǵa kómektesti
Osy kúnde qaraǵandylyq bul jetkinshekterdiń esimderi el aýzynda. Jas shamalaryna qaramaı qoryqpaı-úrikpeı, tipti eresek azamattardyń da báriniń birdeı batyly bara bermes jaǵdaıda erlik úlgisin tanytýlary jurtty súısintip jatyr. Olar bulaısha bolaryn ózderinen kútpegen de edi. Ádettegideı bir top joldastarymen mekteptegi sabaqtan qaıtyp kele jatqandarynda aýyzben aıtqysyz oqıǵa ústinen shyǵamyz dep oılamaǵan shyǵar. Tasalaý tusta 11 jasar búldirshin qyzǵa jantúrshigerlik áreket jasaýshyny jan-jaqtan kómek shaqyrǵan janaıqaılarymen seskendirip, qylmysyn jasyrý úshin jábirlenýshiniń ómirin qııýdan da taıynbas jaýyzdyqtan arashalap, dereý polısııaǵa habar berip, sońynan qalmaı tyǵylǵan jerine deıin nusqaýlary eki aıaqty aıýandy tez quryqtatýǵa septigin tıgizedi.
Qalanyń Maıqudyq aımaǵynyń shetkergi 13 shaǵyn aýdanyndaǵy bireýi №54 qazaq, ekinshisi №65 orys mektebinde oqıtyn, 14-15-tegi teteles bular osy mańdaǵy kóp qabatty úı turǵyndaryna udaıy birge júretin kórgendi jasóspirimder retinde tanys. Qalalyq qurby-zamandastary qataryna Qarqaralydan kelip qosylǵan Aqan Andreıden oryssha sóılesýdi úırense, al Andreı Aqannan karate kúresiniń aıla-tásilderin úırenýge qushtar.
– Aqan mektebimizdegi ozat oqýshylardyń biri. Jaıshylyqta uıań shákirtimizdiń qajet bolǵan jaǵdaıda batyldyq ta qasıeti bar eken. Jarynan erte aıyrylǵan anasyna, oqýshy apalaryna er bala turǵysynda súıeý bolýǵa umtylysynan qaırattylyq minezdilikti sezýshi edik. Onyń osy qylyǵy ustazdaryna maqtanysh. Erteń karate boıynsha Oraldaǵy respýblıkalyq jarystan oralatyn Aqan erligin mektebimiz boıynsha ónege etip, atap ótpekpiz, – deıdi dırektordyń tárbıe isi jónindegi orynbasary Rymkúl Jumaǵulova.
Eki dostyń osynaý erlikterine, ásirese tártip saqshylarynyń rızalyǵy da bólek bolyp otyr. Oblystyq ishki ister departamentiniń bastyǵy Mergenbaı Japparov áriptesteri atynan Aqan Dıdanov pen Andreı Perkovqa alǵysyn jetkizip, Qurmet gramotasyn tapsyrdy, qoldaryna saǵat taǵyldy. Bolashaqta qatarlaryna qosylýǵa shaqyrdy.
Aıqyn NESIPBAI,
«Egemen Qazaqstan».
QARAǴANDY.
