Brıfıngte Qostanaı qalasynyń ákimi Qaırat Ahmetov aldymen áleýmettik jelidegi aqparattyń jańsaq ekenin aıtty. Qostanaı qalasynda qazir qazaq tilinde bilim beretin mektep bireý emes, 6 qazaq mektebi bar. Onyń 1-ýi bastaýysh, 5-ýi orta mektep. Munyń syrtynda 10 qazaq jáne orys tilderinde bilim beretin aralas mektepter bar. Qalǵan 17 mektep orys tilinde bilim beredi.
Daýǵa bergisiz áńgime Qostanaı qalasynyń ortalyǵyndaǵy №24a bastaýysh mektep-gımnazııasy tóńireginde bolyp otyr. Áý basta bala baqshaǵa arnap salǵan ǵımarat bastaýysh mektepke tarlyq etkendikten, qalalyq bilim bólimi №24a mektep-gımnazııasynyń oqýshylary men pedagogterin Borodın kóshesindegi 138/1 meken-jaıyndaǵy ornalasqan ǵımaratqa kóshirýdi usynǵan bolatyn.
«Qostanaı qalasyndaǵy 6 qazaq mektebinde bıylǵy oqý jylynda 3931 oqýshy bilim aldy, onyń syrtynda 10 aralas mektepterdiń qazaq klastarynda 1653 bala oqydy. Qaladaǵy 7-shi qazaq mektebin ashyp, osy aralas mektepterdegi 1653 oqýshyny jáne ǵımaraty tarlyq etip otyrǵan №24a bastaýysh-gımnazııasyn sonda kóshirgimiz kelgen. Ata-analardyń qarsy pikirin eskerip, jańa ǵımaratqa barǵysy kelmegen ata-analardyń balalary sol burynǵy №24a bastaýysh mektep-gımnazııasynda qalatyn boldy» dedi Qaırat Jumashuly.
Brıfıngke qatysqan Qazaqstannyń oqý-aǵartý isiniń úzdigi, QR bilim berý isiniń qurmetti qyzmetkeri, Qazaqstannyń halyq aqyny Ásııa Berkenova bastaýysh mektepti kóshirýge baılanysty óz pikirin aıtty.
«№24 bastaýysh mektepti 90-shy jyldary bala baqshanyń ǵımatarynda ýaqytsha ashqan bolatyn. Sodan beri onda bala sany áldeqaıda kóbeıdi. Borodın kóshesindegi ǵımarat ortalyqqa, tipti alys emes, ol da qalanyń ortalyǵy bolyp sanalady. Negizi mekteptiń kóshkeni durys, bul jerde keıbir ata-analar balanyń bilim alýyn emes, ózine qolaılylyqty ǵana oılap otyr. Mektepte akt zal, sport zal joq, bir kıim ilgishke birneshe balanyń kıimi ilinedi. Ǵımarat bilim berýdiń búgingi talabyna jaýap bere almaıdy. Sondyqtan máseleni keńirek oılaǵan durys» deıdi Ásııa Áıipqyzy.
Ázirge bastaýysh mektep-gımnazııa kóshirilmeıtin boldy, qalǵanyn ýaqyt kórsetedi.
