Qazaqstan • 10 Shilde, 2019

Gúlshara Ábdiqalyqova «Zeren-2019» respýblıkalyq bilim berý jastar lagerine bardy

Búgin Premer-Mınıstrdiń orynbasary Gúlshara Ábdiqalyqova «Zeren-2019» respýblıkalyq bilim berý jastar lageriniń qatysýshylarymen kezdesti. Bul shara Aqparat jáne qoǵamdyq damý mınıstrliginiń bastamasymen Jastar jyly aıasynda uıymdastyrylyp otyr. Bul týraly Premer-Mınıstrdiń baspasóz qyzmeti habarlady.

Egemen Qazaqstan

Jobanyń maqsaty – Qazaqstannyń barlyq óńirlerinde naqty qyzmet etetin, turaqty áleýmettik baǵyttalǵan bıznes-jobalardy iske qosý.

G. Ábdiqalyqova óziniń quttyqtaý sózinde Elbasy N.Á. Nazarbaevtyń «Jastar-bizdiń bolashaǵymyz. Bizdiń mindetimiz - olardy qazirgi álemde ómir súrýge úıretý» degen sózine basty nazar aýdardy.

Vıse-premer qazirgi tańda Qazaqstanda jastardyń zııatkerlik áleýetin ashý úshin barlyq jaǵdaılar jasalǵanyn atap ótti.

Jastar jylyn ótkizý jónindegi Jol kartasyna sáıkes elimizdiń tynys-tirshiliginiń barlyq salalarynda 89 is-shara júzege asyrylýda. Basty nazar jastarǵa naqty qoldaý kórsetýge baǵyttalyp otyr.

Nur-Sultan, Almaty, Shymkent qalalarynda jumys isteıtin jastar úshin úsh jyl ishinde 9 myń jalǵa beriletin páter bólý máselesi sheshilýde.

«Jas maman» jobasy sheńberinde 180 kolledj ben 20 ýnıversıtettiń materıaldyq-tehnıkalyq bazasyn jetildirý qarastyrylǵan. Jastar kásipkerligin damytý «Jas kásipker» jobasy arqyly júzege asyrylýda, onyń sheńberinde jastardyń startap-jobalaryn granttyq qoldaý 505 myń teńgege deıin kózdelgen.

Shara sońynda Gúlshara Ábdiqalyqova jeńimpazdarǵa aýyl sharýashylyǵy, ónerkásip jáne sıfrlandyrý salasyndaǵy úzdik jobalar úshin syılyqtar tabys etti. Jobanyń jalpy júlde qory 15 mıllıon teńgeni quraıdy.

Jalpy, «Zeren-2019» jobasy 2019 jyldyń 3 jáne 30 shilde aralyǵynda 9 kúnnen bólingen 3 maýsymda ótedi. Oǵan barlyǵy 600-den astam jas jigitter men qyzdar qatysýda.