Dıspetcher áıeldiń mekenjaıyn suraǵan kezde jaýap berýden bas tartady. Kenet biraz ýaqyttan keıin «112» nomerine balasy telefon shalyp, «úıde qaǵazdar janyp jatyr, anam kóp dári iship qoıǵandyqtan ózine-ózi kele almady» dep habarlaıdy. Dıspetcherler baladan aty-jónin, anasynyń esimin, mekenjaıyn tolyq alyp, oqıǵa ornyna jetken kezde, kilem de tutanyp úlgergen eken.
– Semeıdegi №2 jasaǵynyń SPCh-2 qutqarýshylary kelip jetken soń, azamattyq qorǵanys aǵa leıtenanty A.Myńjanov barlaý júrgizip kórse, ekinshi qabattaǵy №6 páterden tútin shyǵyp jatyr eken, – deıdi Semeı qalalyq tótenshe jaǵdaılar bóliminiń bas mamany Aıgúl Mırsaıtova, – esikti qaqqanmen eshkim ashpady. Balanyń da daýsy estilmedi. Budan soń A.Myńjanov aǵa órt sóndirýshi B.Qalıtovke jáne kólik júrgizýshisi M.Baıahmetovke úsh deńgeıli satyny úıdiń syrt jaǵynan qoıyp, tereze oıyǵynan kirýge tyrysýdy tapsyrdy. Qalǵan qutqarýshylar esikti ashý úshin qural-jabdyqtarmen qulpyn qozǵap jatty. Tútin basyp ketken bólmege kirgen kezde órt sóndirýshiler jerde janyp jatqan zattardy jáne 0,5 sharshy metrdegi palasty kórgen. Bólmede 1976 jyly týǵan azamatsha men 2013 jyly týǵan bala bolǵan. Áıel adam dıvanda jatyp, balany jibermeı ustap qalypty.
Qutqarýshylar áıel adamdy taza aýaǵa alyp shyǵyp, jedel járdem kelgenshe alǵashqy kómek kórsetti. О́rt sóndirildi. Jedel járdem áıeldi Semeıdegi búırek aýrýlary ortalyǵynyń toksıkologııa bólimine jetkizdi, dedi Aıgúl Mırsaıtova. Balany qaraǵan dárigerler onyń aman-esen ekendigin aıtady. Semeıdegi órt sóndirýshiler men qutqarýshylar jasaǵynyń jedel qımylyna oraı qaıǵyly jaǵdaı oryn almady.
SEMEI
