Saltanatty ashý rásimine Jańaózen qalasy ákiminiń orynbasary Ǵalymjan Baıjanov, Mańǵystaý oblystyq sotynyń qylmystyq ister jónindegi sot alqasynyń tóraǵasy Erjan Qarabaev jáne sýdıalar, Jańaózen qalalyq azamattyq hal aktilerin tirkeý bóliminiń basshysynyń m.a. Saltanat Rýbleva, bilim bóliminiń ókilderi jáne ardagerler qatysty.
Is-sharada sóz alǵan Erjan Qarabaev Ortalyqty ashýǵa múmkindik týdyrǵany úshin qalalyq azamattyq hal aktilerin tirkeý bólimine alǵys aıtyp, Ortalyqtyń qyzmeti janjaldasýshy erli-zaıyptylardy tatýlastyrýǵa jáne ajyrasýlar sanyn qysqartýǵa baǵyttalatynyn jetkizdi. Ortalyqtyń maqsaty - otbasylyq qundylyqtardy saqtaý, otbasylyq daýlardy sheshý jáne tatýlastyrý, balalardyń tolyqqandy otbasynda tárbıelenýge jaǵdaı jasaý ekendigine toqtaldy Erjan Qarabaev. Sondaı-aq, ol munda otbasylyq-neke daýlaryn sotqa deıin jáne sottan tys retteý sharalary júzege asyrylatyndyǵyn atap ótti.
Odan ári Jańaózen qalalyq ardagerler keńesiniń tóraǵasy Qýandyq Bekmaǵambetov bitimgershilik sottarda qaralatyn isterdiń júktemesin azaıtatyndyǵyn túsindirip, medıasııany qoǵam arasynda nasıhattaýǵa bir aýyzdan úles qosatyndyqtaryn jetkizdi.
Jańaózen qalalyq sotynyń tóraǵasy Baýyrjan Toqbaev sottarda nekeni buzý týraly azamattyq isterdiń kóbeıgenin nazarǵa alyp, rásimge qatysýshylardy otbasylyq janjaldardy sotqa deıin retteý úshin barlyq kúsh-jigerlerin jumsaýǵa shaqyrdy.
Atalǵan ortalyq jaıly jıhaz, keńse tehnıkasymen jabdyqtalyp, arnaıy balalarǵa arnalǵan buryshpen qamtamasyz etilgen.
Sonymen qatar, otbasy ortalyǵynyń qabyrǵalaryna otbasy qundylyǵyn nasıhattaıtyn sýretter salynyp, taraptardy tatýlasýǵa úndeıtin stendter ilingen.
Mańǵystaý oblysy
