Qaýipsizdik jáne qoǵamdyq tártip saqshylarynyń qyraǵylyǵy men ábjildigi arqasynda Mańǵystaýdan tórt iri uıymdasqan top qylmyskerleri tuzaqqa tústi. Quqyq qorǵaý jáne qaýipsizdik oryndarynyń nazaryna adam óltirý maqsatymen urlaý, atys qarý-jaraqtary men esirtkini saqtaý, bireýdi bopsalaý boıynsha kúdikke ilingen tórt qylmystyq top músheleriniń bireýleri oblystyń aýdandary men jaldamaly páterlerden, endi bireýleri jol ústinde qolǵa tústi. Olardyń, ıaǵnı uıymdasqan qylmystyq top músheleriniń birqatar aýyr jáne asa aýyr qylmystardy jasaýǵa, onyń ishinde adam óltirýge jáne urlaýǵa, aqsha qarajatyn bopsalaýǵa qatystary bar bolyp shyqty. Sondaı-aq quzyrly oryndar taratqan aqparatqa qaraǵanda, uıymdasqan qylmystyq top músheleri qarýlanǵan, ózara uıymshyl jáne dórekiligimen erekshelengen. Turǵyndardyń ómiri men densaýlyǵynyń qaýipsizdigin qamtamasyz etý maqsatynda arnaıy operasııa júrgizýge Ulttyq qaýipsizdik komıtetiniń jáne Ishki ister organdarynyń arnaıy jasaq kúshteri men quraldary tartylyp, 29 shilde kúni tańǵy saǵat 6 shamasynda bastalǵan shara barysynda túske deıin 20 adam ustaldy. Jalpy sol kezde qolǵa túskenderden esirtki men kóptegen qarý tárkilenip, 20-dan astam kúdikti tergeý oryndaryna jetkizilse, 16 adamǵa qatysty bultartpaý sharasy qoldanylǵan.
Atalǵan oqıǵaǵa oraı Qazaqstan Respýblıkasy Bas prokýratýrasy azamattardy áleýmettik jelilerde taraýy múmkin arandatýshylyqqa ermeýge jáne úreılenbeýge, sondaı-aq zańsyz áreketterge barmaýǵa shaqyryp, jaǵdaıdyń quqyq qorǵaý organdarynyń tolyq baqylaýynda ekendigin, sondaı-aq arnaıy operasııanyń qorytyndysy jurtshylyq nazaryna jetkiziletindigin eskertti.
Qylmys pen qylmysker qoǵamǵa qaýipti, zań aldynda jaýapty. Endi qolǵa túskenderge zań aldynda jaýap berip, óz kinálaryna saı jazalaryn tartý qaldy. Bular buǵan deıin beti ashylmaı qalǵan talaı qylmystar men sýda sany, qumda izi baıqalmaı ketken nebir qylmystardyń «tól avtorlary» bolar, kim bilgen?!
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
