Atalǵan aksııa elimizde dástúrge aınalǵan. 12 jyldan beri úzdiksiz uıymdastyrylyp kelýi – sonyń aıǵaǵy. Bilim jáne ǵylym mınıstrligi taratqan aqparatqa súıensek, balalardy mektepke daıyndaý maqsatynda áleýmettik qoldaý kórsetýge baǵyttalǵan qaıyrymdylyq sharadan 2018 jyly 328 766 oqýshy 2 mlrd 822 mln 846 myń teńgege materıaldyq jáne qarjylyq kómek alǵan eken.
«Bul tek jylyna bir ret uıymdastyrylatyn aksııa bolǵandyqtan, Memleket basshysy Qasym-Jomart Toqaevtyń arnaıy tapsyrmasymen osy aksııaǵa jańashyldyq engizildi. Budan bylaı «Mektepke jol» aksııasy 2 aı ǵana emes, jyl boıy iske asady. Naqtylap aıtsam, bizdiń mınıstrlik «Meniń atamekenim» qoǵamdyq birlestiginiń ókilderimen kezdesip, dástúrli kómek kórsetý tetigine qosymsha retinde portal arqyly onlaın túrde kómek kórsetý týraly kelisimge keldik. Endigi kezekte demeýshiler men mesenattar atamekenim.kz portalynda ornalasqan ótinim jáne tizim boıynsha muqtaj otbasylarǵa kómek kórsete alady», dedi Bilim jáne ǵylym mınıstri Ashat Aımaǵambetov.
Onyń aıtýynsha, bul bastama birqatar túıtkildiń túıinin tarqatýǵa septesedi. Eń aldymen balaǵa bir ret qana emes, jyldyń ár mezgilinde qajetti qural-jabdyqtar alýyna kómektesýge múmkindik týady. Sonan soń kómekke muqtaj jandar men qaıyrymdylyq jasaıtyn azamattardyń arasynda tikeleı baılanys ornatylady. Bul senimge qurylǵan eń basty baılanys bolmaq. «Al úshinshiden, kómekke zárý adamdardyń shynaıylyǵyn rastap, olardyń áleýmettik qajettilikteriniń jaýapsyz qalmaýyna áser etemiz, sondaı-aq qarajattyń túsýi men paıdalanylýyn onlaın túrde baqylaýǵa bolady», deıdi tıisti vedomstvo basshysy.
«Meniń atamekenim» portalyndaǵy «Mektepke jol» platformasy – halyqtyń áleýmettik máselelerine jyldam jaýap berýge, sondaı-aq qarajattyń túsýi men paıdalanylýyn onlaın baqylaýǵa múmkindik beretin yńǵaıly jáne ashyq júıe. Kómek alǵysy keletin adam portalǵa kirip, qajetti derekterdi toltyrýy tıis. Onda kóp málimet suralmaıdy, bar-joǵy muqtaj jannyń aty-jóni men telefon nómiri, balanyń JSN nómiri kerek.
Al qamqorlyq kórsetýdi qalaıtyndar «Mektepke jol» platformasynyń tómengi tusyna túsip, «Qalaı kómektese alamyn?» degen taqyrypshanyń astynda onlaın túrde, bank arqyly nemese taýar boıynsha qolushyn sozýǵa bolady. Budan bólek, volonter bolý arqyly da qaıyrymdylyq sharasyna atsalysýǵa bolady.
«Ár 100 adam tirkelgen saıyn olardyń derekteri mınıstrlikke beriledi. Olardyń bári tolyq tekseristen ótkizilip, kómek suraýshynyń shyn máninde qamqorlyqqa muqtajdyǵy anyqtalǵannan keıin ǵana kezekke qoıylady. О́ıtkeni aksııa az qamtylǵan, kóp balaly jáne turmysy tómen otbasylardyń balalaryna, ata-anasynyń qamqorlyǵynsyz qalǵan balalarǵa arnalǵan. Kómek alýshylar osy talaptarǵa saı bolýy qajet», deıdi vedomstvonyń resmı ókili. Mınıstrliktiń málimdeýinshe, atalǵan platformada kimniń kómekteskeni de kórsetiledi.
Kómek bergennen keıin call-ortalyq qyzmetkerleri kómekteskenińizge alǵys aıtyp habarlasady ári aksııaǵa qatysýdyń jasyryn nemese ashyq túrin tańdaýdy suraıdy. Eger ashyq túrin tańdasańyz, kómek kórsetken azamat retinde aty-jónińiz ben salǵan somańyz saıtta jarııalanady. Máselen, A.Aımaǵambetov ýáde etkendeı, ózi bastap, qos orynbasary men kómekshisi qostap, qarjylaı kómek kórsetken. Platforma iske qosylǵan bir aptanyń ishinde ashyq jáne jasyryn jomarttardan 139 myń teńge túsipti. Al platformaǵa osy ýaqyt aralyǵynda 2000 adam kómek surap tirkelgen. Ári bul kórsetkish ár 20 mınýt saıyn 40-50 adamǵa kóbeıip otyr. Taǵy bir tilge tıek etetini, saıttaǵy aqparatqa saı kompanııalardyń eshbiri áli kómek qolyn sozbaǵan eken. Alaıda, «Meniń atamekenim» qoǵamdyq birlestiginiń ókili Aqmaral Bekbaı «Akademııa dostýpnogo jılıa» qurylys kompanııasy 500 myń teńge aýdarǵanyn, sol aqshaǵa platformada ótinish qaldyrǵan alǵashqy 50 adam 10 myń teńgelik kanselıarlyq paketpen qamtamasyz etilgenin aıtty.
«Biz osy aksııany bastamas buryn baǵasy qoljetimdi bazarǵa baryp, bir balany mektepke daıyndaý qansha teńge turatynyn anyqtaý úshin eksperıment júrgizip kórdik. Nátıjesinde ul balanyń kerek-jaraǵy 40-45 myń teńge, qyz balaǵa odan 10 myń teńgege qymbat bolyp shyqty. Oǵan mektep formasy, sporttyq kostıými, aıaq kıimderi (mektepke, dene shynyqtyrýǵa) jáne eń qajetti oqý quraldaryna jumsalatyn qarjy esepteldi. Osy tájirıbe nátıjesin Bilim jáne ǵylym mınıstrligine jetkizdik», deıdi birlestik ókili. Onyń aıtýynsha, vedomstvo tarapynan túsken usynys – birlestikke bildirgen senim. Uıym qoǵamdyq birlestik retinde qaıyrymdylyq jáne mesenattyq mádenıetti damytýǵa baǵyttalǵan jobalardy iske asyrý týraly mıssııasyn adal atqaratynyn Arystaǵy jarylys sekildi eldegi eleýli oqıǵalar kezinde kórsetti. «Kómek kórsetilgen adamǵa qarjy aýdarýshynyń árbir tıyny jónimen jumsalǵanyn naqty faktilermen kórsetemiz. Birlestiktiń Ulttyq volonterler jelisimen arnaıy memorandýmy bar. Qazirgi tańda atalǵan aksııaǵa eriktilerdi tartýdy qolǵa alyp jatyrmyz. О́ıtkeni taýarlardy alýda jáne jetkizýde olardyń qol kómegi asa qajet», deıdi A.Bekbaı.
«Atameken» Ulttyq kásipkerler palatasy tóraǵasynyń orynbasary Oljas Ordabaev bıyl mınıstrlikpen seriktestikte qolǵa alynyp jatqan aksııaǵa elimizdegi kásipkerlerdiń de atsalysatynyn aıtty. Onyń aıtýynsha, keńse taýarlary jáne jeńil ónerkásip óndirisimen aınalysatyn kompanııalar arasynda bir balanyń mektepke tolyq daıyndalýyna qajetti paketke jeńildik jasaý jóninde kelissózder júrgizilip jatyr.
Aıta keteıik, «Mektepke jol» aksııasy sheńberinde qol ushyn sozýǵa nıet bildirgen azamattar bilim berý organdary men uıymdary arqyly da kómek kórsete alady.
