«QTJ» UK» AQ fılıaly – «Qaraǵandy magıstraldik jeli bólimi» vokzaldyq sharýashylyq jónindegi dırektordyń orynbasary О́mirtaı Sherııazdanov málimdegendeı, jańǵyrtylǵan vokzal qyrkúıek aıynda jolaýshylardy qabyldaı bastaıdy.
– Vokzaldyń eski ǵımaratynda jumys 70-80% aıaqtaldy. Belgilengen merzim ishinde úlgerý úshin qurylys materıaldaryn jetkizý jedeldetildi, brıgadalardaǵy adamdar sany arttyryldy. Búginde eskalatorlar ornatylyp, múmkindigi shekteýli adamdarǵa arnalǵan bólmeler, olardyń júgin qabyldaıtyn arnaıy oryndar ázirlenip jatyr. Vokzaldyń jańa termınalynyń qurylysy qazan aıynda aıaqtalýy tıis, – dedi ol.
О́mirtaı Sherııazdanovtyń aıtýynsha, Qaraǵandy temirjol vokzaly qaıta jańartylǵannan keıin sán-saltanaty boıynsha elimizdegi eń úzdik kerýen saraılarynyń biri bolmaqshy. Mysaly, ǵımaratty árleý jumystaryna zamanaýı materıaldar, atap aıtqanda, tabıǵı tasqa uqsastyǵy óte jaqyn travertın qoldanylyp jatyr. Aıta ketetin taǵy bir jaıt, jańartýdan keıin ǵımarat tarıhı arhıtektýralyq kelbetin joǵaltpaıtyn bolady. Vokzal qasbetiniń stıli ózgeriske ushyramaıdy, al ǵımarat ishindegi biregeı órnektelgen japsyrmalar saqtaýly kúıinde qalady.
Ǵımarattyń úsh qabatty jańa qanatynda kassalar, kútý zaldary, medpýnkt, múmkindigi shekteýli adamdarǵa arnalǵan demalys bólmesi, ana men bala bólmesi, fýdkorttar men saýda dúńgirshekteri ornalasady. Jolaýshylar perronǵa jer ústi ótkelderi boıynsha túsetin bolady. Bir sózben aıtqanda, vokzaldyń kelýshiler úshin yńǵaıly, qaýipsiz ári keń bolýy basty maqsat etip qoıylǵan.
Temir jol vokzalynyń jaǵyrtylýy óńir basshylyǵynyń jiti nazarynda. Taıaýda oblys ákimi Erlan Qoshanov ǵımarattaǵy qurylys jumystarymen tanysyp, merdiger kompanııa basshylaryna birqatar tapsyrma berdi. Atap aıtqanda, ol jumys kestesiniń saqtalyp, jóndeý jumystarynyń jyl sońyna deıin tolyqtaı aıaqtalý kerektigin eske saldy. Sondaı-aq, óńir basshysy jumys barysynda týyndaǵan barlyq máselelerdi jedel sheship otyrýdy shegelep tapsyrdy.
Qaraǵandy oblysy
