1920 jyly alǵashqy qazaq aqparat agenttigi ROSTA-nyń Orynbor-Torǵaı bólimshesi negizinde quryldy. Atalmysh qara shańyraqtyń búgingi ıesi – qazirgi «QazAqparat» halyqaralyq aqparat agenttigi» JShS.
1925 jyly agenttiktiń aty QazROST bolyp ózgerdi. Al 1937 jyly «QazTAG» degen atpen Qazaq KSR Mınıstrler Keńesiniń qaraýyna berildi. Arada 60 jyl ótkende, ıaǵnı, 1997 jylǵy qyrkúıektiń 10-ynda QR Prezıdentiniń №3629 Jarlyǵymen «Qazaq aqparat agenttigi (QazAA)» respýblıkalyq qazynalyq kásiporny bolyp ózgertildi. 2002 jylǵy qarashanyń 8-inde QR Úkimetiniń №1186 qaýlysyna sáıkes QazAAG negizinde «Qazaq aqparat agenttigi» Ulttyq kompanııasy («QazAqparat» UK) quryldy.
2008 jylǵy shildeniń 3-inde agenttik QR Úkimetiniń №668 qaýlysyna sáıkes «Arna Medıa» Ulttyq aqparattyq holdıngi» aksıonerlik qoǵamynyń quramyna kirdi. Al 2012 jylǵy tamyzdan 2014 jylǵa deıin «Qazaqstan» RTRK» AQ quramynda boldy. 2014 jyldyń qańtarynda «QazAqparat» eldegi alǵashqy halyqaralyq aqparat agenttigi (HAA) mártebesine ıe bolyp, óz tarıhynyń jańa kezeńin bastady. 2004 jyly Agenttik paıdalanýshylaryna jańalyqtardy qazaq tilinen latyn qarpine akademık Ábdýálı Qaıdarovtyń ádisimen kóshirýdiń jańa nusqasyn usyndy.
Bul osy ádisti is júzinde qoldanǵan alǵashqy aqparat agenttigi boldy. Sonyń arqasynda kırıllısa qarpin oqı almaıtyn shetelderdegi otandastarymyz tarıhı Otanyndaǵy bolyp jatqan oqıǵalardy bilip otyrýǵa múmkindik aldy. «QazAqparat» jańalyqtary agenttiktiń www.inform.kz veb-saıty arqyly qazaq, orys, aǵylshyn, arabsha tóte jazýmen jáne qytaı tilderinde taratylady.
