Alǵashqy kúni 40 000 oq-dári saqtalǵan eki qoımanyń órtengeni belgili boldy. Jarylǵan snarıad ushqyndary 15 shaqyrym aımaqty sharpyp ótken. Oqıǵa ornyna jaqyn ornalasqan Kamenka, Zavorkı, Malyı Ýlýı, Klıýchı, Sosnovyı bor aýyldary men balalar demalyp jatqan «Sokol» lagerinen 2,7 myń adam kóshirilgen. Myńǵa jýyq adam oqıǵa ornynan óz betimen kóshken. Tótenshe jaǵdaılar qyzmeti órtti tek 6 tamyzda sóndire aldy, 12 adamnyń japa shekkenin málimdedi. Bir adam kóz jumǵan, taǵy bir adam iz-túzsiz joǵalǵan.
9 tamyz kúni qoımada ekinshi jarylys boldy. Tótenshe jaǵdaılar komıtetiniń aqparatyna súıensek, 18 adam jaraqat alǵan, olardyń 4-eýi jaýynger. Ekinshi detonasııaǵa qoımaǵa túsken naızaǵaı sebep bolǵan. Aımaqtyń baspasóz qyzmeti jarylystyń qoıma mańyn mınadan tazalaý kezinde bolǵanyn málimdedi. Sol kúni Kamenka turǵyndary Malınovka aýylyna kóshirildi.
Qazirgi kezde oblys boıynsha Achınsk turǵyndaryn qabyldaıtyn 30 ortalyq jumys isteıdi. 800-den astam azamatqa materıaldyq kómek kerek. Achınsk pen Nazarov aýdandarynda tótenshe jaǵdaı rejimi belgilengen. Aımaqtaǵy «Rýsala» kombınaty jumysyn toqtatqan.
Aýyldardaǵy ıesiz qalǵan úılerdi 100-ge jýyq polısııa qyzmetkeri kúzetip jatyr. Tilsiz jaýdy sóndirýge órt brondy tehnıkasy men eki arnaıy órt poıyzy jiberilgen. Tótenshe jaǵdaıdy retteýge jalpy eseppen 153 adam men 51 tehnıka jumyldyrylǵan.
Aýyl turǵyndary habardy estigende abdyrap qalǵanyn jasyrmady. Halyq alǵashqy dybystaryn estı sala, resmı derekti kútpesten, jolǵa shyǵyp, oqıǵa ornynan óz erkimen kete bastaǵan. Halyqtyń kóptiginen 400-500 metrdegi aýyldarǵa 2 saǵatta jetken. Janarmaı beketterinde janarmaı bitip, keıbir beketter Achınsk turǵyndaryna benzın satpaı qoıǵan. Dúkenderde aýyz sý sanaýly saǵattarda satylyp ketken. Keshki segizder shamasynda evakýasııa týraly habar kelip, aýyldaǵy dúkenderdiń qasyna jınalý tapsyrylǵan. Reseılik aqparat quraldaryna súıensek, birinshi kúni aýyl turǵyndary oqıǵa ornynan tolyqtaı kóshirilmegen.
