HPAIR konferensııasy (The Harvard College Project for Asian and International Relations) – stýdentter men jas mamandar arasynda tájirıbe almasatyn pikirsaıys alańyna aınalǵan jastar jobasy. Garvard ýnıversıteti 1991 jyldan beri dástúrli túrde ótkizilip kele jatqan konferensııany Azııa jáne halyqaralyq qatynastar fakýlteti qurylǵanda qolǵa alǵan. HPAIR Ortalyq Azııada jáne TMD keńistiginde tuńǵysh ret ótkiziledi.
Bıylǵy HPAIR transformasııa, sanamyzdy ózgertý jáne dástúrli ádisterden alystaý, sonymen qatar jańa sıfrly tehnologııalardy qoldana otyryp damýdyń jańa deńgeıine kóshý máselelerin keńinen talqylaýdy kózdeıdi. Al ortaǵa salynatyn taqyryptar ǵalamdyq naryq jáne ekonomıka; kórkemóner, buqaralyq aqparat quraldary jáne mádenıet; áleýmettik saıasat jáne ádilet; energetıka jáne ekologııalyq turaqtylyq; basqarý jáne geosaıasat; ǵylymı tehnologııalar syndy alty baǵytty qamtıdy. Atalǵan aýqymdy problemalar tóńireginde oı bólisip, ınnovasııalyq ıdeıalaryn usyný arqyly stýdent jastarymyzdyń konferensııaǵa shaqyrylǵan tanymal jáne tájirıbeli spıkerlermen baılanys ornatýyna múmkindik bar. О́ıtkeni Qazaqstanǵa UNICEF Koreıa prezıdenti, doktor Song San Hıon, Úndistannyń eks-syrtqy ister mınıstri Nırýpama Rao, Taıaý Shyǵys pen Soltústik Afrıkadaǵy ǵalamdyq naryq boıynsha Standard Chartered Bank-tiń burynǵy basshysy Denıel Assı, Nobel syılyǵynyń laýreaty Rae Kvon Chýng, McKinsey Dúnıejúzilik ınstıtýtynyń dırektory Djonatan Votsel, World Bank Group-tyń bas tehnıkalyq dırektory Leslı Go, Vashıngtondaǵy CNN, Nıý-Iorktegi ABC News, Berlındegi Deutsche Welle TV jáne basqa da jańalyqtar uıymdarynda jumys istegen telejúrgizýshiler taban tiremek.
«HPAIR Asia Conference-2019» sharasyn uıymdastyrý komıtetiniń atqarýshy dırektory Charlz Maıkl barlyq qurlyqtan keletin spıkerler bolashaqqa úlken qadam jasaıtyn, keleshektegi ózgeristerge ázirden daıyn bolýdy qalaıtyn jastarǵa shabytty da áserli bes kún syılaıtynyn aıtady. Sondyqtan https://hpair.org/asia-conference-2019 saıtynda jarııalanǵan baǵdarlamamen tolyq tanysyp, konferensııadan qur qalmaýǵa shaqyrady. Al Nazarbaev Ýnıversıtettiń stýdenti ári «HPAIR Asia Conference- 2019» uıymdastyrý komıtetiniń tóraıymy Leıla Ahmetova: «Qazaq mádenıeti álemdik tarıhtyń ajyramas bóligi sanalady, sondyqtan árbir delegattyń ony sezinýi úshin biz jeke is-shara – Qazaqstan túnin (Kazakhstan Night) ázirlep jatyrmyz», dedi.
