Qandasymyz bul jekpe-jekte osy jyldyń sáýir aıynda meksıkalyq boksshy Krıstıan Olıvastan (16-5, 13 KO) jeńip alǵan WBO Global men WBC Continental Americas aımaqtyq beldigin alǵash ret qorǵady. Boks mamandary men boksshylardyń ózderi beldikti jeńip alýǵa qaraǵanda, ony qorǵap qalý qıyn ekenin jıi aıtady. Endi she, kimniń bıikke shyǵyp, tómen qulaǵysy kelsin?! Beldik qorǵap qalýdyń mashaqaty aýyr ekenin sezingen Jánibek bul jekpe-jekke daıyndyqty erte bastady. Kezdesý ýaqyty shilde aıynyń ortasynda belgili bolsa da, otandasymyz AQSh-qa maýsymnyń sońynda attandy. Bara salysymen daıyndyǵyna kirisip, jaýapty kezdesýge muqııat ázirlengenin áleýmettik jeli arqyly kórip, ár qıymylyn baqylap otyrdyq.
Jánibektiń bul aıqasta jeńilýge haqysy joq edi. Sebebi birinshi kezekte otandasymyzǵa jankúıer bolyp otyrǵan qalyń Qazaq eliniń artqan senimin aqtaý kerek bolatyn. Ekinshiden, qandasymyzǵa qarsylas atanǵan kanadalyq boksshy kúni keshege deıin Álimhanulyn saıqymazaq Boratqa teńep, ábden shamyna tıgen-di. Qazaqtyń qaısar uly kanadalyqtyń bul qylyǵyna sabyrmen qarap, qarymtasyn sózben emes ispen qaıtarýǵa bekindi ári solaı boldy da. Jánibek Álimhanuly bes raýndtyń ishinde kanadalyq Stıýart MakLellandi úsh ret nokdaýnǵa jiberdi. Tóreshi araǵa túspegende kanadalyqtyń háli ne bolaryn kim bilsin?
Áýelde eki boksshy arasyndaǵy jekpe-jek 10 raýndqa josparlanǵan bolatyn. Alaıda Jánibek kezdesýdi kópke sozbaı, besinshi raýndta-aq aıaqtaýdy jón kórdi. Birinshi raýndtaǵy alǵashqy soqqyny qazaqstandyq boksshy jasaǵanymen, Stıýart MakLellannyń bastapqy qarqyny qatty bolyp kórindi. Biraq Jánibek ekinshi raýndta jekpe-jek tizginin myqtap qolǵa aldy. Jaqsy soqqylar jumsap, serııamen de sátti jumys istedi. Qorǵanysta da saýatty boldy. Kezekti bir sátti soqqydan keıin kanadalyq boksshy nokdaýnǵa túsip qaldy. Basymdyqty raýnd saıyn údete túsken Jánibek besinshi raýndta MakLellandi eki ret nokdaýnǵa jiberdi. Alǵashqysynda kanadalyq tez es jıyp, aıqasty jalǵastyrýǵa tyrysqanymen, otandasymyzdyń serııalyq soqqylarynan keıin tóreshi jekpe-jekti toqtatýǵa májbúr boldy.
Osylaısha, Jánibek beldikterin sátti qorǵap, álem chempıony ataǵy úshin taǵy bir qadam jasady. Keshegi jarqyn jeńisinen keıin Álimhanuly orta salmaqtaǵy TOP-50 boksshynyń qataryna kirýi tıis. Eger jyl sońyna deıin otandasymyz taǵy bir-eki jekpe-jek ótkizetin bolsa, kelesi jyldan bastap tórt beldiktiń bir tujyrymy boıynsha chempıondyq beldikke talasýǵa tolyq múmkindik týady.
Otandasymyzdyń jekpe-jegin tamashalaǵan amerıkalyq Boxingnews24.com basylymynyń jýrnalısi Barrı Holbrýk Jánibektiń jeńisin joǵary baǵalady. «Orta salmaqtyń bolashaq juldyzy Jánibek Álimhanuly (7-0, 3 KO) keshegi boks keshinde kanadalyq Stıýart MakLellandy (27-4-3, 11 KO) úsh ret nokdaýnǵa jiberip, óziniń myqtylyǵyn taǵy bir dáleldedi. Osy qarqynynan taımasa, tez arada álem chempıony bolatynyna kúmánim joq» deıdi ol. Otandasymyzdyń jekpe-jegin ESPN + telearnasy birinshi ret tikeleı efırde kórsetkenin aıta keteıik. Bul sheteldik jankúıerler arasynda Jánibektiń tez tanylýyna taǵy bir múmkindik ekeni belgili.
26 jastaǵy otandasymyz bir jyldyń ishinde AQSh-ta bes jekpe-jek ótkizip, beseýinde de aıqyn basymdyqpen jeńiske jetti.
