Vedomstvodan habarlaǵandaı, 16 tamyzda atalmysh aýyldan alynǵan synamalardyń nátıjesinde aldyn ala «sibir jarasy» dıagnozy qoıylyp, 17 tamyzdan bastap aýylda karantın jarııalandy. Degenmen, zertteýler áli de jalǵasýda. Tolyq nátıje 19-20 tamyzda belgili bolýy tıis.
Aqmola oblysynyń Densaýlyq saqtaý basqarmasynyń aqparaty boıynsha, Olgnıka aýylynyń 5 turǵyny aýrýhanaǵa jatqyzylǵan. Qazir synamalarǵa zertteý júrgizilip jatyr. Naýqastardyń jaǵdaıy turaqty.
«16 tamyzda Arshaly aýdanynyń bas memlekettik veterınarııalyq ınspektory Olgınka aýylynyń ákimine karantın engizý týraly usynys joldady. Senbi kúni Aqmola oblysy Arshaly aýdanynyń aýmaǵynda sibir jarasy aýrýlarynyń oshaqtaryn joıý boıynsha shtab otyrysy ótti. Quramynda 14 adam kiretin shtab veterınarlyq jáne sanıtarlyq-epıdemıologııalyq qyzmettiń, densaýlyq saqtaý basqarmasynyń, jergilikti polısııa qyzmetiniń is-qımyl jospary qabyldandy. Olgınka aýylyndaǵy maldar arasynda «sibir jarasy» joq. Kún saıyn janýarlardy komıssııalyq tekserý júrgiziledi», - delingen habarlamada.
Mınıstrliktiń málimeti boıynsha, Olgınka aýylynyń barlyq maly sáýir aıynda sibir jarasyna qarsy egilgen. «Veterınarııalyq qaǵıdalardy bekitý týraly» QR AShM 2015 jylǵy 29 maýsymdaǵy №7-1/587 buıryǵymen bekitilgen veterınarııalyq-sanıtarııalyq qaǵıdalardyń 1 paragrafynyń 145-22 tarmaǵyna sáıkes, Sibir jarasy boıynsha karantın ınfeksııa joıylǵannan jáne qorytyndy dezınfeksııa júrgizilgennen keıin 15 kúntizbelik kún ótkennen keıin alynady.
