QR Premer-Mınıstri Asqar Mamınniń Aqtóbe oblysyna saparynyń basty maqsaty óńirdegi ónerkásiptik klasterdiń jáı-kúıimen tanysý ekendigi de ónerkásiptik nysandardy aralaý barysynda belgili boldy.Sapar kezinde Úkimet basshysyna eń aldymen QR Tuńǵysh Prezıdenti – Elbasy N.Á. Nazarbaevtyń bastamasymen qolǵa alynǵan ındýstrııalyq-ınnovasııalyq damý baǵdarlamasynyń oryndalý barysy tanystyryldy.
Budan keıingi kezekte A.Mamın Memleket basshysy Qasym-Jomart Toqaevtyń ortalyq jáne jergilikti atqarý organdaryna el óńirleri ekonomıkasyn odan ári damytý jónindegi tapsyrmasyna baılanysty óńirdegi iri ónerkásiptik kásiporyndardyń qyzmetimen tanysty.
Bul baǵytta Premer-Mınıstr oblys ortalyǵyndaǵy «KazHrom» transulttyq kompanııasy AQ Aqtóbe Ferroqorytpa zaýytynda boldy. Álemge tanymal iri kásiporynnyń brendke bergisiz basty ónimderi №4 sehta óndiriledi. Munda metaldy balqytý men shyǵarýdyń mol tájirıbesi bar. Sonyń ishinde kompanııada tot baspaıtyn bolat shyǵarýǵa septigi mol sapaly hrom rýdasy óndiriledi. Munda qazirgi kezde 335 myń tonna ónim shyǵarylsa, aldaǵy jyldary onyń kólemi 440 myń tonnaǵa jetkizilmek. Bul mólsher kásiporynnyń tolyq qýatynda jumys isteýine kóshýiniń basty
kórinisi bolmaq.
Seh ónimderiniń eksporttyq aýqymy óte joǵary. Ásirese, oǵan Japonııa men AQSh sekildi joǵary damyǵan elderden suranystardyń mol túsýi otandyq ónimniń básekege qabiletti ekenin aıqyn kórsetedi.
Sondaı-aq «KazHrom» óndirisiniń júz paıyz qazaqstandyq úlespen qamtylýy da ekiniń biri jete almaı júrgen jetistik.
Úkimet basshysy transulttyq kompanııada elimizdegi ónerkásiptik kásiporyndar arasynda qanatqaqty joba retinde belgilengen «Halyqtyq baqylaý» júıesine oń baǵa berdi. Onyń ereksheligi-múmkindigi shekteýli jandardyń úılerinde otyryp-aq búgingi aqparattyq tehnologııanyń kómegimen kompanııadaǵy óndiristik úderisterdi baqylaý isine qatysa alatyndyǵy. №4 sehta jańǵyrtý jumystarynyń júıeli júrgiziletini, buǵan qatysty arnaıy turaqty baǵdarlama qabyldanǵany Premer-Mınıstrdiń
qanaǵattanǵandyq sezimin týǵyzdy.
О́ndiristegi osyndaı óreli ózgerister Hromtaý aýdanyndaǵy «Voshod» ken orynyndaǵy ken baıytý kesheninde de aıqyn kórindi. Munda jylyna bir mıllıon tonna rýda óndiriledi. Úkimet basshysynyń nazaryna kelesi kezekte 2019 jyldyń basynan beri oblysta óndirilgen ónerkásiptik ónimderdiń kólemi 4,9 paıyzǵa ulǵaıǵany jóninde
aqparat berildi, sonyń ishinde hrom rýdasynyń kólemi 5,7 paıyzǵa ósken.
Somaǵa shaqqanda ónimder kólemi bir trıllıon teńgege asyrylǵan.
Oblystyń shalǵaıdaǵy Baıǵanın jáne Muǵaljar aýdandarynda bolǵan
kezinde Úkimet basshysy gaz óńdeý kásiporyndarynyń qyzmetimen tanysty.
«Gaz prosessıng kompanı» jáne «SNPS-Aqtóbe munaıgaz» AQ-na qarasty
Jańajol gaz óndirý zaýytyna aıaq basqan kezinde Asqar Uzaqbaıuly mundaǵy
tehnıkalyq jaraqtandyrylý men modernızasııalyq jumystardyń barysyna
basa nazar aýdardy. Sonymen birge zamanaýı sıfrlyq júıeler men
sheshimderdi engizý jóninde naqty usynystar bildirdi.
Jańajol gaz óńdeý zaýyty aımaǵynda Asqar Mamın munaı-gaz salasy
qyzmetkerlerimen kezdesip, olardyń oı pikirleri men usynys-tilekterine
qulaq túrdi. Kádimgi jumys babyndaǵy bas qosý túrinde ótkizilgen kezdesýde
óńirde jáne tutastaı elimizde munaı-gaz salasynda tolǵaǵy jetken
máseleler ortaq áńgimeniń basty arqaýyna aınaldy. Memlekettik
organdardyń basshylary men kásipodaqtar jetekshileri de qatysqan jumys
babyndaǵy májiliste eńbek qatynastaryn retteý máselelerine basa nazar
aýdaryldy. Buǵan qosa tabys deńgeıin kóterý jónindegi bastamalardy sol
kúıinde qaldyrmaı ony naqty túrde júzege asyrý tutqalary talqylandy.
Búginde sheteldikterdiń basqarýyna berilgen ónerkásiptik
kompanııalarda qazaqstandyq mamandardyń úlesin kóbeıtý qajettigi jıi
aıtylady. Áıtse de áli kúnge deıin onyń naqty tetikteri belgilenbeı keledi.
Úkimet basshysynyń málimdeýinshe bilikti kadrlerdi ázirleý isine múldem
tyń jańasha kózqarastar júıesi qajet. Ásirese, munaı-gaz óndirisi salasynda
bul istiń búgingi yńǵaıy men oraıyn izdestiretin kez keldi. Atalǵan sala qazirgi kezde óńirlik ekonomıkanyń on bes paıyzyn qurap otyr. Ári onyń sheńberine otyz myńnan astam qyzmetkerler tartylǵan. Sondyqtan da olardyń eńbek jónindegi quqyqtaryn qorǵaý, jumys berýshiler men jumysshylar arasyndaǵy eńbek qatynastaryn retteý Úkimettiń basty basymdyqtarynyń biri bolyp tabylady,- dep atap kórsetti Asqar Mamın.
Úkimet basshysy Aqtóbe oblysyna sapary kezinde eńbek qatynastaryn retteý jóninde buǵan deıin qalyptasqan júıege tıisti túzetýler eńgizý qajettigin alǵa tartty. Eń bastysy, bul qabyrǵaly qujat qazirgi zamanǵy óndiris tynysy men ereksheligin dóp basýǵa tıis. Osy oraıda bul baǵyttaǵy zańdyq aktilerge de ózgerister men óndiris qajettiliginen týyndaǵan taldaýlar engizýdiń qajettiligi de aıqyn kórinýde. Eń bastysy, qyzmetkerdiń jalaqyny ýaqytynda alý ári onyń qaýipsiz eńbek jaǵdaılarymen qamtamasyz etilý quqyǵy buzylýyna jol berilmeýi kerek, - dedi budan ári Úkimet basshysy.
Premer-Mınıstr munaı-gaz salasyn budan ári órkendetý úshin 2021-2025 jyldarǵa arnalǵan geologııalyq barlaý jumystary baǵdarlamasyn, osy sheńberdegi tereń zerttele qoımaǵan tundyrma basseınderdi qajetke jaratý jumystaryn shuǵyl shıratý qajettigine ekpin túsirdi. Sonymen birge, Úkimet basshysynyń málimdeýinshe, ken oryndaryndaǵy ekologııalyq qaýipsizdikti qamtamasyz etý jáne tabıǵı tepe-teńdikti saqtaý, atalǵan salanyń basy-qasynda júrgenderdiń udaıy nazarynda bolýǵa tıis.
Sonymen birge Asqar Mamın óńirge sapary kezinde «Aqtóbe-Atyraý-Reseı Federasııasy» shekarasy respýblıkalyq avtomobıl joly qurylysynyń júrý barysymen tanysty. Onyń uzyndyǵy - 319 shaqyrym.
Aqtóbe qalasynyń aýmaǵy jyldan jylǵa keńeıip keledi. Bul jaıt, óz kezeginde, avtokólikterdiń jańa tasqyny men legi paıda bolýyna ákelip soqtyrýda. Onyń barlyǵy oblys ortalyǵynyń ishki joldarymen júretin bolsa, keptelistiń kóptigin sonda kórersiz.
Sondyqtan da óńirde bolýy múmkin osyndaı tyǵyryqtyń aldyn alý úshin Aqtóbe qalasynyń batys, soltústik jáne ońtústik baǵyttarynda aınalma joldar salynýda. Bul jumystar 2011 jyly bastalyp aldyńǵy atalǵan baǵyttardaǵy aınalma joldar iske qosylǵan. Qazirgi kezde «Ońtústik aınalma» avtomobıl jolynyń qurylysy júrgizilýde. Onyń jalpy quny 11,6 mıllıard teńge. Uzyndyǵy 35,3 shaqyrym jol qalpyna keltirilgen.
Bólingen qarjynyń ıgerilý qarqyny joǵary. Áıtse de atalǵan joldy tolyq aıaqtaý úshin 2,8 mıllıard teńge qosymsha qarajat qajet ekendigi Premer-Mınıstrge baıandaldy.
Úkimet basshysy óńirge sapary kezinde mundaǵy turǵyn úı qurylysynyń jaı-kúıimen de tanysty. Oblys ortalyǵyndaǵy «NurAqtóbe» shaǵyn aýdanynda jyl aıaǵyna deıin turýǵa óte yńǵaıly tórt qabattan turatyn eki myń páter paıdalanýǵa berilmek. Sonymen birge A. Mamın «Kóktas-Aqtóbe» AQ qurylys materıaldaryn shyǵaratyn zaýyttyń qyzmetimen tanysty. Ári «Global Spesodejda» JShS-synda bolyp osy fabrıkanyń negizinde óńirdegi «Qarapaıym zattar ekonomıkasy» baǵdarlamasymen tanysyp onyń áleýetin odan ári kóterý men tolyqqandy paıdalaný jóninde jergilikti óndirisshilerge jańa mindetter júktedi.
QR Premer-Mınıstrine sapar sońynda aýyl sharýashylyǵy salasyndaǵy ınvestısııalyq jobalar tanystyryldy. Onyń jarqyn úlgileri «Aqtóbe et klasteri» JShS et óńdeý kombınaty men «Aıs» JShS taýarlary sút fermalary bolyp otyr.
Úkimet basshysy Asqar Mamın Aqtóbe oblysyndaǵy jumys saparynyń qorytyndysy boıynsha óńirdegi ókiletti oryndarǵa eńbek qatynastaryn retteý sharalaryn kúsheıtýdi tapsyrdy.
AQTО́BE
