Ár jyl saıyn tabıǵaty tamyljyǵan Býrabaı aýmaǵynda velomarafon ótkizý dástúrge aınalǵan. Qaıyrymdylyq sharasy birte-birte óz aıasyn keńeıtip keledi. Ústimizdegi bul shara jalǵyz adamǵa emes, tutas otbasyna arnalǵan mýzykalyq-sporttyq festıvalge ulasty.
Adamdardy izgilikke, qaıyrymdylyqqa baýlıtyn iske saıasat, bıznes jáne sport salasynyń ókilderi qatysty. Bıylǵy jyly atalmysh sharaǵa 3500 adam jınalyp, rekordtyq kórsetkishke qol jetkizildi. Jınalǵandar aldynda olımpıada chempıony Aleksandr Vınokýrov, Qazaqstan Respýblıkasynyń Mádenıet jáne sport vıse-mınıstri Eldos Ramazanov, Aqmola oblysynyń ákimi Ermek Marjyqpaev sóz sóılep, qaıyrymdylyq jasaý eń aldymen adam boıyndaǵy kisilik qasıetti kórsetetindigine toqtaldy. Álemge jylý shashyp turǵan da osyndaı izgilik tunǵan keńpeıil ekendigin eksheı aıtty.
–Ár jyl saıyn qaıyrymdylyq sharasynyń aıasy keńeıip kele jatqany kóńilge qýanysh uıalatady,–dedi oblys ákimi,–búgin elimizdiń ár óńirinen, alys jáne jaqyn shet elderden adamdar jınalyp otyr. Osyǵan qaraǵanda, qaıyrymdylyq sııaqty asyl qasıette shekara joq.
Eksklıýzıvtik lottar boıynsha qaıyrymdylyq aýksıony ótkizildi. Jınalǵandardyń lebizine qaraǵanda baǵasy qoljetimdi. Qatysýshylar Qanat Islam men Gennadıı Golovkınniń qolǵaby, Dmıtrıı Balandınniń júzý telpegi, Batyrhan Shúkenovtyń albomdar jınaǵy, Rafael Nadaldyń tennıs doby jáne ózge de kóptegen lottar boıynsha básekege tústi. Barlyq qarjy qaıyrymdylyq sharalaryna baǵyttalady.
Balalarǵa arnalǵan anımasııalyq-qaıyrymdylyq baǵdarlama men jármeńke, árqıly ulttyq oıyndar kóp kóńilin baýrady. Osy arada ekpin túsirip aıtatyn jaı, bıylǵy qaıyrymdylyq nazary Esil qalasyna túsip otyr. Bul qala oblystyń eń shalǵaıyndaǵy eldi mekenderdiń biri. Aýdan ortalyǵyndaǵy kónetoz aýrýhana 25 myń halyqqa qyzmet etedi.
–Nesin jasyraıyq, aýdandyq aýrýhana osy zamanǵy medısınalyq qural-jabdyqqa zárý,–deıdi bas dáriger Dastan Asanuly,–máselen, aýyr naýqastardy 350 shaqyrym jerdegi Kókshetaýǵa, áıtpese, Nur-Sultan qalasyna jetkizýge májbúrmiz. Ásirese, júkti áıelder men jas balalarǵa qıyn. Bir jyldyń ishinde shamamen 60-70 adamdy tasymaldap júrmiz. Tasymaldaý úshin arnaıy jabdyqtalǵan kólik kerek. Onyń ústine aýrýhananyń hırýrgııa bólimshesi de medısınalyq qural-jabdyqtarǵa zárý. Osy jolǵy qaıyrymdylyq sharasy barysynda biraz kem-ketigimizdi bútindep alatyn boldyq.
Qor dırektory Marat Aıtmaǵambetovtyń aıtýyna qaraǵanda, atalmysh qor jyl saıyn medısına salasyna kóp kómegin tıgizip keledi. Alty jyldyń ishinde 700 mıllıon teńge qarjy jınaǵan. Bıylǵy jyly Aqmola oblystyq perınataldyq ortalyqqa, oblystyq balalar aýrýhanasyna, Shýchınskidegi balalar úıine, basqa da mekemelerge qaıyrymdylyq kómek kórsetilmek. Belgili qoǵam qaıratkeri Arýjan Saın eń bastysy osyndaı meıirimdi sharalardy turaqty ótkizý dep esepteıdi.
Ústimizdegi jyly qatysýshylar kóp bolǵandyqtan, festıval eki kún boıy ótkizildi. Kásibı sportshylar arasynda velojarys 35 jáne 70 shaqyrym, áýesqoılar arasynda 10 shaqyrym qashyqtyqta uıymdastyryldy.
Aqmola oblysy
