Baspasóz konferensııasynda alǵashqylardyń biri bolyp sóz alǵan Tuńǵysh Prezıdent – Elbasy qory atqarýshy dırektorynyń orynbasary Igor Rogov ekinshi jyl qatarynan ótkeli otyrǵan bul baıqaý arqyly Elbasy Qory adamgershilik qundylyqtardy, qaıyrymdylyq jáne gýmanızm ıdeıalaryn nasıhattaıtynyn jetkizdi. «Biz júregi keń azamattarymyzdy, óz zamanymyzdyń naǵyz batyrlaryn halyqqa kórsetip, tanystyrǵymyz keledi. «Qaıyrymdylyq kerýeni» jobasy azamattardyń zor yqylasyna ıe bolǵany qýantady. О́tken jyly komıssııanyń qaraýyna Qazaqstannyń barlyq óńirinen 97 ótinish kelip tústi», dedi I.Rogov. Onyń aıtýynsha, elimizdiń ár túkpirindegi talanttardy iriktep, jeńimpazdardy anyqtaý úsh aıǵa, ıaǵnı osy jylǵy 29 qarashaǵa deıin jalǵasady.
«Bizde ómirdiń qıyn jaǵdaıyna túsken adamdardy qoltyǵynan demep jiberetin jomart, qamqor júrekti jandar jeterlik. Biraq olar óte qarapaıym keledi jáne jaqsylyqty jarııalamaǵandy jón sanaıdy. Osy baıqaýdyń nátıjesinde erjúrek keıipkerlerimizdi olardan kómek alǵan adamdar arqyly anyqtaımyz», deıdi Tuńǵysh Prezıdent – Elbasy qory atqarýshy dırektorynyń orynbasary. Sondaı-aq ol jobany iske asyrýǵa Qazaqstannyń isker áıelder qaýymdastyǵy, «Habar» agenttigi, KTK telearnasy jáne «Oqjetpes» emdeý-saýyqtyrý kesheni qoldaý kórsetkenin jetkizdi.
Qazaqstannyń isker áıelder qaýymdastyǵynyń prezıdenti Raýshan Sársembaeva úmitkerlerdi ár nomınasııaǵa saı irikteýmen aınalysatyn jumys toby qurylatynyn aıtty. Onyń quramyna atalǵan qaýymdastyqtyń, óńirlerdegi Ishki saıasat basqarmalarynyń, BAQ-tyń ókilderi kiredi. Al respýblıkalyq deńgeıdegi komıssııa iriktelgen ótinimderdi jiti qaraıdy. «Bıyl da nazar aýdararlyq keıipkerler kezdesedi dep oılaımyz. Álbette barlyq úmitker yntalandyrýǵa, nasıhattaýǵa jáne baǵalaýǵa laıyq. Dese de baıqaýdyń belgili bir sharttary bar», deıdi R.Sársembaeva. Atalǵan baıqaýǵa áleýmettik máselelerdi sheshýge úles qosyp júrgen, ózderiniń ıgi isterimen basqalardy yntalandyratyn jeke jáne zańdy tulǵalar ótinim bere alady. Alaıda qaıyrymdylyq qyzmetin memlekettik qoldaýmen (memlekettik grant, memlekettik tapsyrys jáne t.b.) iske asyratyn kásipkerlik sýbektiler jáne jeke tulǵalar qatysa almaıdy.
Uıymdastyrýshylardyń habarlaýynsha, «Qaıyrymdylyq kerýeniniń» jeńimpazdary bes atalym boıynsha anyqtalady: «Asar» (qaıyrymdylyq qyzmeti halyqtyq salt-dástúrlermen baılanysty bolýy kerek), «Týǵan jer» (týǵan jerge bilim, ekologııa jáne abattandyrý mádenı nysandardy qalpyna keltirý jáne t.b. salalarynda kómek kórsetkenderge), «Batyl júrek» (erlik, qaısarlyq tanytqan adamdarǵa), «Meıirim jolynda» (óz erkimen, óz qarajatyna adamdarǵa kómek kórsetken jeke jáne zańdy tulǵalarǵa), «Qaıyrymdylyq tarıhy» (qoǵamnyń nazaryn áleýmettik problemalarǵa aýdaratyn materıaldardy usynatyn, BAQ-ta qaıyrymdylyq taqyryptaryn úzdik jarııalaǵan jýrnalısterge nemese shyǵarmashylyq toptarǵa beriledi).
Aıta keteıik, ótinimderdi irikteý jumysy bıyl jeltoqsan aıynda aıaqtalady. Al baıqaý jeńimpazdaryn marapattaý 2020 jylǵy aqpan aıynyń sońynda – Alǵys aıtý kúnine josparlanyp otyr.
