BATE – «Astana»: qaı komanda toptyq kezeńge shyǵady?

Seısenbi kúni «Astana» koman­dasy­nyń músheleri «Nursultan Nazarbaev halyqaralyq áýejaıynan» ushaqqa otyrdy. Baǵyt – Belorýssııanyń Mınsk qalasy. Jergilikti ýaqytpen 11:00-de áýege kóterilgen ushaq bortynda jıyrmaǵa jýyq fýtbolshy men jattyqtyrýshylar quramy bar. Sondaı-aq elimizdiń birqatar BAQ ókilderi de komandamen Mınskige barǵanyn aıta keteıik. Sóıtip araǵa tórt saǵat salyp áýe kóligimiz Mınsk halyqaralyq áýejaıyna qondy. Aýa raıy jyly, shamamen 25 gradýs.

«Astana» komandasy Belorýssııaǵa joǵary kóńil kúımen keldi. Sebebi ótken aptada óz alańynda Eýropa lıgasynyń BATE-ge qarsy Nur-Sultanda ótken alǵashqy matchynda 3:0 esebimen jeńse, araǵa eki-úsh kún salyp el chempıonatynyń kezekti týrynda «Taraz» komandasyn 5:0 nátıjesimen tas-talqanyn shyǵardy. Sondyqtan sońǵy bes oıynda tek iri eseppen jeńiske jetip kele jatqan «Astana» fýtbolshylarynyń kóńil kúıi nashar dep aıta almaımyz.

Degenmen bas bapker de, fýtbolshylar da bergen suhbattarynda jeńistiń eforııa­syna berilmeı, syrt alańdaǵy match 0:0 esebimen bastalatynyn umytpaı, tek jeńis úshin oınaıtyndaryn aıtýda.

Sondaı-aq BATE de óz birinshiliginiń kezekti týrynda «Slavııa» komandasynan 4:0 esebimen basym túsip, ózderine de, jan­­kúıer­lerine de senim otyn jaqqandaı boldy. Biraq jergilikti jankúıerler «Asta­naǵa» qarsy ótetin qarymta match­ta óz komandalarynyń jeńiske jetip, top­tyq kezeńine shyǵatynyna senbeıtinin aıtýda.

Jankúıerlerdi bylaı qoıǵanda, BATE-niń bas bapkeri Alekseı Baga elor­dada ótken kezdesýden keıin koman­d­asynyń toptyq kezeńge shyǵýǵa múmkin­dikteri óte tómen ekenin aıtqan bolatyn. Degenmen fýtbol 90 mınýt emes, tóreshiniń sońǵy ysqyryǵyna deıin jalǵasatynyn eskersek, búgin eki koman­dany da óte tartysty jáne qyzyqqa toly match kútip túr. Sondaı-aq jergilikti ko­manda óz alańynda baryn salyp, jan­kúıerlerin qýantýǵa tyrysatyny anyq.

Hosh, keshe BATE men «Astana» komandalary ashyq jattyǵý jıynyn ótkizdi. Artynsha bas jattyqtyrýshylar baspasóz máslıhatynda jýrnalısterdiń suraqtaryna jaýap berdi.

Aldymen sóz alǵan BATE koman­da­synyń bas jattyqtyrýshysy Alekseı Baga: «Meniń komandam erteńgi oıynǵa daıyn. Biz Qazaqstanda deńgeıimizdi tolyqtaı kórsete almadyq. Biraq erteń kezdesý basqasha jaǵdaıda órbıdi. Ketken eseni qaıtarýǵa múmkindigimiz tolyq jetedi», dedi. «Bir apta buryn ǵana «Astanadan» 3:0 esebimen jeńilgen komanda az ýaqyt ishinde óz qate-kem­shilikterin túzep, jeńiske jete ala ma?» degen saýalǵa belorýssııalyq mamannyń bergen jaýaby mynadaı boldy: «Kez kelgen komanda úshin óz jankúıerleriniń aldynda óner kórsetken áldeqaıda jeńil. Qazaqstanda ótken oıynda «Astana» shabýylshylary qorǵaýshylarymyzdy ábden ábigerge túsirdi. Biraq erteń ondaı problema bolmaıtynyna senimdimin. О́ıtkeni ketken kemshilikter osy joly qaıtalanbas úshin jumys istedik. Erteń – sonyń jemisin kóretin kez».

Osydan keıin «Astana» komandasynyń bas jattyqtyrýshysy Roman Grıgorchýk jýrnalıster saýalyna jaýap berdi. «Erteń biz úshin eń qıyn oıyndardyń biri bolmaq. Sebebi BATE oıynshylary Nur-Sultanda ketken eseni qaıtkende de qaıtarýǵa bilek sybana kirisetini belgili, – dep bastady óz sózin ýkraın mamany. – Onyń ústine, BATE – óz alańynda ese jibermeıtin komanda. Áıtkenmen, bizdiń jigitter toptyq kezeńine shyǵý úshin je­ńiske jetý kerektigin jaqsy biledi. Sondyqtan biz de shaıqasqa daıynbyz».

Sondaı-aq bas bapker búgingi oıynǵa shabýylshy Fırmın Mýbeleniń qatysý-qatyspaýy beımálim ekenin aıtty. Sebebi kongolyq fýtbolshy BATE-ge qarsy ótken alǵashqy oıynda azdap jaraqat alyp qalǵan. Eger dárigerler ruqsat berse, Mýbeleni jasyl alańnan kórip qalýymyz da múmkin.

BATE – «Astana» matchyna shotlan­dııa­lyq tóreshiler brıgadasy qazylyq etedi. Alańdaǵy bas tóreshi Bobbı Meddenge qaptaldan otandastary Dýglas Ross pen Devıd Rým kómektesedi. Tórtinshi tóreshi – Donald Robertson.

Eki komanda arasyndaǵy kezdesý búgin Belorýssııanyń Borısov qalasyndaǵy «Borısov-Arenada» ótedi. Matchty otandyq «Qazsport» telearnasy Nur-Sultan ýaqyty boıynsha túngi 23:00-de tikeleı efırde kórsetedi.