Vıse-premer men Aqmola oblysynyń ákimi Ermek Marjyqpaev Jibek joly aýylynda bolyp, I.Qutpanuly atyndaǵy orta mektepte ótken alǵashqy qońyraý saltanatyna qatysty. Ustazdar qaýymy men oqýshylardy jáne olardyń ata-analaryn bilim kúnimen quttyqtady.
«Kez kelgen memlekettiń damýy azamattarynyń bilimi, mádenıeti jáne tárbıesine baılanysty. Sol sebepti, memleket basshylyǵy tarapynan áleýmettik salaǵa erekshe kóńil bólinýde. О́zderińiz kýá bolyp otyrǵandaı, elimizde qazirgi zamańǵy mektepter, balabaqshalar, aýrýhanalar, teatrlar jáne sport nysandary kóptep salynýda. Munyń barlyǵy Qazaqstannyń álemdik qaýymdastyqta laıyqty orynnan kórinýine baǵyttalǵan», - dedi Berdibek Saparbaev.
I.Qutpanuly atyndaǵy orta mekteptiń irgesi 2011 jyly qalanǵan. Bilim ordasynda 68 ustaz 1 myńnan astam oqýshyny bilim nárimen sýsyndatýda. Bıyl mektepke oblystyq bıýdjetten 158 mıllıon teńge qarjy bólinip, kúrdeli jóndeý jumystary júrgizilgen. Jańa oqý jylynda 137 bala atalmysh mektep tabaldyryǵyn alǵash attady.
Aıta keteıik, búginde Aqmola oblysynda 614 mektepke deıingi bilim berý uıymy jumys isteıdi, olarda 38 myńǵa jýyq bala tárbıelenýde. 2019 jyldyń 1 qyrkúıeginen bastap Elbasynyń tapsyrmasy boıynsha balalardy erte damytý baǵdarlamasy engizilýde. Búgingi tańda 3-6 jastaǵy balalardy mektepke deıingi bilimmen qamtý 99 paıyzdy qurap otyr. Barlyq memlekettik balabaqshalarda aǵymdaǵy jóndeý jumystary júrgizildi.
Oblysta 557 memlekettik mektep jumys isteıdi, oǵan 124 myńnan astam balany qabyldaý josparlanyp otyr. Onyń 16 myńnan astamy – birinshi synypqa baratyn búldirshinder. Bul ótken jylmen salystyrǵanda 1 myńǵa artyq.
Sonymen qatar, vıse-premer osy aýyldaǵy kópbalaly Qudabaevtardyń otbasynda boldy. Atalmysh otbasy kámelettik jasqa tolmaǵan tórt bala tárbıelep otyr. Tabysy az bolǵandyqtan bıylǵy sáýir aıynda bul otbasyna aıyna 101 myń teńge kóleminde ataýly áleýmettik kómek taǵaıyndaldy. Memleketten alǵan aqshalaı kómekti otaǵasy Azamat Qudabaev shaǵyn bıznes – tehnıkalyq baıqaý stansasyn ashýǵa baǵyttamaqshy. Al zaıyby Gúlnur «Eńbek» baǵdarlamasy boıynsha arnaıy kýrstan ótip, úıinde nan ónimderin pisirip satady.
Budan bólek, Berdibek Saparbaev Jibek joly aýylyndaǵy dárigerlik ambýlatorııa, «Bóbek» bóbekjaıy, «Djamılıa» JShS jıhaz fabrıkasynyń jumysymen tanysty.
