Bul Almatydaǵy Seıfýllın dańǵyly boıynda ashylǵan eń alǵashqy polısııa modýli. Táýlik boıy tynbaı jumys isteıtin nysan ashylǵan úsh kún ishinde halyqtan 21 shaǵym men aryz kelip túsipti. Jalpy ár aýdanda tórt osyndaı nysan paıda bolady. Qala bıligi men polıseıler saraptama júrgizip, mekenjaılardy anyqtap jatyr.
Nysan jyljymaly jáne jyldyń tórt mezgilinde de jumys isteı beredi. Qalalyq polısııa departamenti Almatyda krımınogendik ahýal únemi baqylaýda bolady deıdi. Qylmys kórsetkishi artqan mekenjaılar anyqtalyp, keıin pýnktti sonda kóshirýge múmkindik bar. Almaty qalasy PD resmı ókili Saltanat Ázirbek kez kelgen keleńsiz oqıǵaǵa tap bolǵan azamat polısııa pýnktine kómekke júginip, tıisti quqyqtyq kómek ala alatynyn aıtty. Eger jedel toptyń qosylýy kerek bolsa, onda ýaqyt joǵaltpastan tártip saqshylary jumylady. «Áınekten jasalǵan nysandy arnaıy mamandar kelip, buzyp, tıisti jerge qoıyp beredi. Biraq bul pýnkt jıi oryn aýystyrady degendi bildirmeıdi. Jaǵdaı saralanǵan soń ǵana qajetti jerge qoıamyz», – dedi dedi ol jýrnalıstermen kezdesken kezde.
Qala kóshelerindegi qoǵamdyq tártip kúndiz túni baqylanady. Kúndiz onda bir ýchaskelik ınspektor, al túnde qyzmetke qos patrýldik polısııa qyzmetke kirisedi.
Eger polısııa tirek pýnktteri júıeli jumys istese, onda qaladaǵy qylmystyq jaǵdaı turaqtalyp, jasalǵan zańbuzýshylyqtar izin sýytpaı ashylady dep senedi tártip saqshylary. Jyljymaly modýlge ury-qary, buzaqydan zardap shekken kez kelgen turǵyn kelip aryz-shaǵym, talap tilegin aıtsa bolady. Almaty qalasy Túrksib aýdandyq Polısııa bólimi jergilikti polısııa qyzmeti basshysynyń mindetin atqarýshy Dáýren Maılyqbaevtyń aıtýynsha, bul jerde halyq sany óte kóp. Sol sebepten biz dál qylmys kóp bolǵan jerdiń ortasyna modýldi qoıýǵa sheshim qabyldanǵan.
Sondaı-aq, Almaty qalasynyń ákimi Baqytjan Saǵyntaevtyń tapsyrmasymen polısııa departamenti krımınogendik jerlerdiń kartasyn ázirledi. Tártip saqshylary, tizimge qas qaraıǵanda kóshe jaryǵy janbaıtyn 83 kóshe men 65 aýla kirgizgen. Asa qaýipti degen 148 ýchaskede endi kezeń-kezeńimen jaǵdaı túzeledi. Jyl sońyna deıin 22 kóshege jaryq ornatylsa, qalǵan 61 mekenjaı boıynsha jumystar kelesi jyly bastalady.
Gúlbarshyn AITJANBAIQYZY,
«Eqemen Qazaqstan»
ALMATY
