Atap aıtqanda, Panfılov aýdanyndaǵy «Kóktal orta mektebi» memleket jáne qoǵam qaıratkeri Dinmuhamed Qonaevtyń esimimen ataldy. Burynǵy A. Lýnacharskıı atyndaǵy mektep-gımnazııa dańqty qolbasshy, Keńes Odaǵynyń Batyry Baýyrjan Momyshulynyń esimimen atalsa, Sátjol orta mektebine alash kósemi Álıhan Bókeıhanovtyń esimi berilip, resmı túrde ashylý saltanaty ótti.
«Osy kúnge deıin aýdanymyzda birqatar eldi meken men kóshe ataýlary ózgertilse, sonyń ishindegi eń qýantarlyǵy úsh bilim ordasyna qazaq zııalylary esiminiń berilýi», - deıdi aýdan ákiminiń orynbasary Shýhrat Qurbanov.
Birinshi synypqa nemeresin ákelgen Kúlıman apa nemeresiniń qazaq zııalylary syndy el basqaratyn azamat bolýyn tileıdi. Jańa oqý jylynda Dımash, Álıhan, Baýyrjandaı uly adamdardyń esimin mektepke berý balalarymyzǵa úlken tárbıe men ónege ekenin aıtyp, rızashylyǵyn bildirdi.
«Birde Dımash atamyz Jarkent-arasanda demalyp, qaıtyp bara jatqanda Kóktal aýylynyń bir top oqýshysy atamyzdyń kóligin toqtatyp, aýylǵa mektep salyp berýin ótinipti. Dımash atamyz balalarǵa bergen ýádesin oryndap, 1976 jyly Kóktal orta mektebi boı kótergen. Mine, osy mektepke Dinmuhammed Qonaev atamyzdyń esimin berý óte quptarlyq is»,- deıdi kezinde Panfılov aýdanynyń birinshi hatshysy bolǵan Ǵalym Týǵanbaev. Aıta ketý kerek, jańa oqý jyly qarsańynda Panfılov aýdanynda 50 mektep esigin ashsa, 2800-den astam búldirshin mektep tabaldyryǵyn jańadan attady.
