Naqty mindetter júkteıdi

Otyrysta Qazaqstan halqy Assambleıasy Tóraǵasynyń orynbasary Janseıit Túımebaev Prezıdent Qasym-Jomart Toqaevtyń Parlamenttiń birlesken otyrysynda jarııalaǵan «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» taqyrybyndaǵy Joldaýy týraly baıandady.

«Bizdiń jıynymyz osy Joldaýdy talqylaýǵa jáne onda alǵa qoıylǵan mindetterdi iske asyrýǵa Assambleıanyń qatysýy máselesine arnalyp otyr», – degen J.Túımebaev Joldaýda kórsetilgen birqatar mańyzdy baǵyttarǵa basa mán berý kerek ekendigin atap ótti. Olar: zamanaýı tıimdi memleket qurý, azamattardyń qu­qyqtary men qaýipsizdigin qamtamasyz etý, serpindi jáne ınklıýzıvti ekonomıkany qalyptastyrý, áleý­mettik jańǵyrtýdy júzege asyrý, qýatty óńirlerdi qalyp­tastyrý. Osy baǵyttardyń barlyǵy boıynsha naqty mindetter aıqyndaldy.

QHA Tóraǵasy orynbasarynyń aıtýynsha, Prezıdent Qasym-Jomart Toqaevtyń Joldaýy Qazaqstannyń óz damýynda jańa kezeńge bet alýyn sıpattaıdy dep aıtýǵa tolyq negiz bar.

Qazaqstan Respýblıkasynyń táýelsiz tarıhynda Memleket basshysynyń halyqqa Joldaý jasaýy – jaqsy dástúrge aınalǵan. Bul – memleket damýynyń keleshegin bol­jaı otyryp tujyrymdalatyn, el ishinde tap sol kez­de bar problemalar túıinin sheshýdi kózdeıtin, damý baǵy­tymyzdy aıqyndaıtyn strategııalyq qujat ekeni belgili.

Otyrysqa qatysýshylar da, tilshilerge bergen suhbat­tarynda QHA etnomádenı birlestikteriniń ókilderi de «Qazaqstan Prezıdenti Q.Toqaevtyń Joldaýy el ómi­rindegi sheshilýin kútip turǵan kóp máselelerdi dóp basqan mańyzdy qujat bolǵanyn» sóz etti.

Sondaı-aq QHA Ǵylymı-sarapshylyq keńesiniń otyrysynda azamattardyń ótinishterin memlekettik organdardyń qaraý sapasy, elde beıbit mıtıngilerdi erkin ótkizý, paıdalanylmaı jatqan aýyl sharýashylyǵy jerlerin qaıtaryp alý, memlekettik holdıngter men ulttyq kompanııalardyń tıimdiligine taldaý júrgizý sııaqty Joldaýda aıtylǵan birqatar ózekti máseleler talqyǵa salyndy.

Qoryta kelgende, Parlament depýtattary, mınıstr­likter men etnomádenı birlestikteriniń ókilderi, QHA men Ǵylymı-sarapshylyq keńes músheleri jáne Assam­bleıanyń jastar qanaty qatysqan bul jıynda Qasym-Jomart Toqaevtyń Qazaqstan halqyna arnaǵan Joldaýy QHA tarapynan biraýyzdan qoldaý tapty.

Aıta keteıik, QHA Ǵylymı-sarapshylyq keńesiniń maqsaty – saıası jaǵdaılarǵa boljam jasaı otyra, qo­ǵamdy alaýyzdyqtan saqtaý. Iаǵnı, halyq sanasyna demo­kratııalyq qundylyqtardyń dánin egý, jastardy otansúıgishtikke tárbıelep, etnosaralyq qatynasty nyǵaıtý.