Halyqtyń Sheraǵasy týraly estelik

Dańqty qalamgerdiń jýalylyq jerlesi, qalamdas inisi, jazýshy-rejısser Doqtyrhan Turlybek jaqynda oqyrmandarǵa jyp-jyly estelik kitabyn usyndy. Nebári 125 pa­raqtan turatyn alaqandaı ǵana kitap­sha «Sheraǵa» dep atalady, «Sher­han­nyń Túrkibasy», «Sheraǵanyń bir kem dúnıesi», «Jýalynyń «Pavlık Morozovy», «Myna dııýdy qalaı noqtalap júrsiń?», «Jaqsy adamnyń ashýy» atty taǵy da birneshe estelik áńgimelerden quralǵan. Ádebıettiń ázil-syqaq janrynda da erekshe óz úlesi bar belgili qalamger Doqtyrhan Turlybektiń estelik jazbasy Sherhan Murtazanyń bir zamanda ulttyq telearnany basqaryp júrgendegi, eldegi, el arasyndaǵy, ulttyq basylymdarda basshylyq qyzmettegi basynan keshken úzdik te úzik estelikterine ar­nalǵan. Kitapta árdaıym qabaǵy túıýli, keıbir sátterde kúndeı kúrkirep qoıatyn Sherhan Murtazanyń adamı bolmysyn shýaqty ázilmen jýyp-shaıyp, oınaqy, jeńil, ýytty tilmen sýrettegen taraý-tustar barshylyq.

...«Egemen Qazaqstan» gazetiniń redaksııasyna kire beriste Sheraǵammen kezdesip qaldym.Túri sýyq, sálemimdi áreń aldy.

– Sen bala, men jaıynda ne byljyrap jazyp júrsiń? – dedi murty edireıip. Sherhan Murtazadan mundaı qat­qyl sózdi óz qulaǵymen estigen jan bar ma eken?! Doqtyrhandaı ba­lań jazýshynyń sondaǵy kókjal aldyn­daǵy búrisken kójekteı keıpin kóz aldyńyzǵa elestetip kóre berińiz.

– El aýzynda... aıtylyp júrgen... Ǵabeń ekeýińiz týraly ádemi... ázildi «Aınalaıyn» dep at qoıyp jazyp em...

– Qaı basylymda jarııalandy? Birdeńeni shatyp-butsań, menen jaqsylyq kútpe!

– «Jalynǵa» shyqqan... 1997 jyl 8-shi sany...

– Bir jaqqa sandalyp ketpe. Úıińde bol! Úsh saǵattan soń telefon soǵamyn. Aıtpaqshy, telefon nómiriń qandaı edi?

Bul úsh saǵattyń Doqtyrhannyń taǵdyrynda qandaı ról oına­ǵanyn oqyrmannyń ishi sezip te otyr­ǵan shyǵar. Sodan... «Sherhan Mur­taza tup-týra úsh saǵattan soń tele­fon qońyraýlatty» dep jazady sas­qalaqtap, janyn qoıarǵa jer tappaı otyrǵan Doqtyrhan.

«Doqa, oqyp shyqtym, vse normalno, – dep, telefon tutqasyn qoıa saldy. «Ýf...» der-demesten sylq etip otyra kettim» dep aıaqtalady áńgi­me. Qyzyqty esteliktiń arqaýyna qazaq­tyń ǵajaıyp qalamgerleri Ǵabıt Músi­repov pen Sherhan Murtazanyń ara­synda ótken qandaı oqıǵa sep bolǵanyn osy «Sheraǵa» atty kitapshany qolyńyzǵa alǵanda qanyǵasyz!..

Sherhan Murtazanyń qasıetti qalamynan órilgen shyndyq shyǵar­malary, onyń býyrqanǵan boıaýy, elim-jerim, ultym-tilim degen ýytty ustanymdary, árbir azamattyń kókeıindegisin dóp basatyn oı-ta­nymdary búginge deıin de talaı-talaı ádebıet zertteýshileriniń eńbe­gine azyq bolǵany ras, bola beretini jáne aqıqat. Belgili jazýshy Doq­tyrhan Turlybektiń bul súıinshi danasy – «Sheraǵasy» sondaı tolymdy dúnıeniń biri. Sheraǵa týraly estelik – Almatydaǵy «Toǵanaı-T» baspasynan jaryq kórdi.

ALMATY