Xinhua: Qazaqstan men Qytaı áriptestikti nyǵaıtady
Xinhua agenttiginiń habarlaýynsha, Qazaqstan men Qytaı turaqty strategııalyq áriptestikti odan ári nyǵaıta berýge sheshim qabyldaǵan. «Mundaı qadam Qytaı Prezıdenti Sı Szınpın men Qazaqstan Prezıdenti Qasym-Jomart Toqaevtyń kezdesýinen keıin múmkin boldy» dep jazady basylym.
«Qytaı – Qazaqstan qarym-qatynasyna qatysty sóılegen sózinde Sı Szınpın eki eldiń arasynda barlyq deńgeıdegi baılanysty nyǵaıtý nıetin qýattap, Uly Jibek joly boıyndaǵy «Bir beldeý, bir jol» baǵdarlamasynyń ekonomıkalyq paıda ákeletinine senim bildirdi. Sondaı-aq ındýstrııalyq múmkindikterdi, ǵylym men tehnologııalyq ınnovasııa salasyndaǵy barys-kelisti kúsheıtýge ynta bildirdi», dep habarlaıdy Xinhua.
Agenttiktiń habarlaýynsha, Q.Toqaev ta óz sózinde Qytaımen qarym-qatynasty odan ári nyǵaıtýdyń múmkindikterine toqtalǵan.
«Q.Toqaev Qytaımen joǵary deńgeıli baılanystardy kúsheıtýge, «Bir beldeý, bir jol» baǵdarlamasy aıasynda ekonomıkalyq, saýda, ınfraqurylym, energetıka, ǵylym men tehnologııa salasynda yntymaqtastyqty arttyrýdyń mańyzyn atap ótti. Sonymen qatar Qazaqstan Prezıdenti Shanhaı yntymaqtastyq uıymy alańynda eki eldiń tyǵyz baılanys ornatý qajettigine toqtaldy», dep jazady Xinhua.
Ekijaqty kezdesýden keıin eki el basshysy Qazaqstan men Qytaı arasyndaǵy birlesken málimdemege qol qoıdy. Sondaı-aq birqatar ekijaqty kelisimge qol qoıý rásimine qatysty.
CNBC: Qazaqstan Qytaıǵa bıdaı eksportyn arttyrady
CNBC agenttiginiń habarlaýynsha, Qazaqstan Qytaıǵa jiberetin bıdaı kólemin úsh esege deıin ulǵaıta alady. Bul týraly Qazaqstan Prezıdenti Qasym-Jomart Toqaev Qytaıǵa barǵan saparynda málimdedi.
Ortalyq Azııadaǵy eń úlken bıdaı eksporttaýshy el – Qazaqstan men buǵan deıin Qara teńiz arqyly bıdaı jiberip kelgen Reseı tarapy Qytaıǵa aýyl sharýashylyǵy zattary men bıdaı eksportyn ulǵaıtýǵa qyzyǵyp otyr.
«Byltyr Qazaqstannyń Qytaıǵa eksporttaǵan bıdaı kólemi 550 000 tonnaǵa jetti. Endi onyń kólemin 2 mıllıon tonnaǵa deıin jetkize alamyz», dedi Q.Toqaev Beıjińde ótken qazaq-qytaı bıznesmenderiniń kezdesýinde.
Mundaı mejege qansha ýaqytta jetýge bolatynyn aıtqan joq. Áıtse de, bıdaıdan bólek, Qytaıǵa tuz, sút ónimderi, et jáne taýyq jetkizýge múmkindik mol ekenin atap ótti.
Qytaı – kúni búginge deıin Qazaqstannyń eń úlken saýda áriptesi. Munaı, gaz, metal ónimderi kóp eksporttalady. Ádette Qazaqstan bıdaıyn kórshiles Ortalyq Azııa elderine jiberedi. Endi osy baǵytta keńinen jumys istemek.
Global Times: Qytaı men Qazaqstan 5G tehnologııasynda áriptestik ornatady
Global Times gazeti Qazaqstan men Qytaı arasyndaǵy qarym-qatynastyń mańyzyna toqtala kele, eki el basshylarynyń birqatar mańyzdy kelisimderge qol jetkizgenin jazady.
Qytaı Prezıdenti Sı Szınpınmen kezdesýden keıin Qazaqstan Prezıdenti Q.Toqaev Alıbaba kompanııasynyń basshysy Djek Mamen kezdesti. Onda onlaın saýdany Qazaqstanǵa engizý máseleleri talqylandy.
Budan bólek, Q.Toqaev qazaq-qytaı bıznesmenderi keńesiniń otyrysyna qatysyp, eki el arasyndaǵy qarjy, energetıka, aýyl sharýashylyǵy, transport salalaryndaǵy yntymaqtastyqty arttyrýdyń qajettigin jetkizdi. Budan bólek, ol bıznesmenderge Jibek jolyn qaıta jańǵyrtýdyń mańyzyn túsindirip berdi.
Sonymen qatar jıyn qorytyndysy boıynsha Qazaqtelekom kompanııasy qytaılyq Huawei kompanııasymen birigip 5G tehnologııasyn 2019 jyldyń sońyna taman Qazaqstanda synaqtan ótkizbek.
CGTN: Yntymaqtastyq nyǵaıa beredi
Qytaıdyń CGTN arnasy Qytaı men Qazaqstan arasyndaǵy strategııalyq áriptestiktiń jańa kezeńge qadam basqanyn jazady.
Beıjińde ótken ekijaqty kezdesýde Q.Toqaev pen Sı Szınpın mańyzdy birqatar máselelerdi talqylady. Atap aıtar bolsaq, ekonomıkalyq jáne saýda yntymaqtastyǵyn keńeıte túsýge, aýylsharýashylyq áriptestikti tereńdetip, tehnologııalyq ınnovasııany jetildirýge kelisim jasasty. Sonymen qatar kommýnıkasııa men ózara baılanysty damytýǵa yqylas tanytty.
Sı Szınpın óz sózinde eki el arasyndaǵy qaýipsizdikti nyǵaıtý qajettigin, ekonomıkalyq ashyqtyqty jetildirý jóninde aıtyp ótti. Al budan keıin sóılegen Q.Toqaev Qytaıdyń qurylǵanyna 70 jyl tolýymen quttyqtady. Sondaı-aq Shanhaı yntymaqtastyq uıymy aıasynda Azııadaǵy qaýipsizdik pen turaqtylyqty nyǵaıtýdyń mańyzyn atap kórsetti.
Q.Toqaev Qytaı men Qazaqstan ekonomıkalyq, saýda yntymaqtastyǵyn nyǵaıtyp, ınfraqurylym, energetıka, ǵylym men tehnologııa salalaryn birlese damytý qajettigine toqtaldy.
Sholýdy daıyndaǵan Abaı ASANKELDIULY,
«Egemen Qazaqstan»
