Bul kúni qarapaıym ǵana aýyldyń sport mektebinde jattyǵyp, sary qurlyq birinshiliginde jeńis tuǵyrynan kóringen Elızatqa jankúıerlerimen qatar, ózi bilim alatyn Taraz memlekettik pedagogıkalyq ýnıversıteti men №7 oblystyq balalar men jasóspirimder sport mektebiniń ujymy da qurmet kórsetti.
14 jasynan bastap Talas aýdanynyń Aqqum aýylynda jattyǵyp, Azııa chempıony atanǵan arýdy sambonyń qyr-syryna Bostandyq balalar men jóspirimder sport mektebiniń jattyqtyrýshysy Barbol Jáýishov baýlyǵan.
– Elızattyń sportqa qarym-qabiletin bala kúninen baıqaǵanmyn. Keıin ata-anasynan sambo úıirmesine qatysýyna ruqsat suradym. Alǵashynda anasy qarsy boldy. Keıinnen Elızattyń boıyndaǵy bula kúshtiń sportta jetistikke bastaıtyndyǵyna kóz jetkizdi. Ol mektepte oqyp júrip birneshe ret respýblıka birinshilikterinde top jardy, – deıdi B.Jáýishov.
Al Elızattyń ózi Úndistan jerindegi saıysta elde qalyp taqymyn qysqan ata-anasynyń, baýyrlarynyń, jalpy jankúıerleriniń qoldaýyn sezgenin aıtady.
– Árıne Azııanyń 15 memleketinen chempıon atanýǵa úmitti eń myqty sportshylar kelgen saıysta qarsylastyń qaı-qaısysy da osal emes. Onyń ústine á degennen men sambo sportynan Azııada úzdik sanalatyn ózbek, qyrǵyz sportshylarymen beldestim. Eldiń qoldaýynyń arqasynda barlyq beldesýlerimde qarsylastarymnan basym tústim,–deıdi Elızat Aıazbek.
Aýyldan shyqqan Azııa chempıonynyń endigi muraty kelesi aıda О́zbekstanda ótetin Álem chempıonatynda olja salý bolyp otyr. Ol endigi kezekte jattyǵý jumystaryn Taraz qalasyndaǵy №7 oblystyq balalar men jasóspirimder sport mektebiniń jattyqtyrýshylarymen júrgizbek. Sondaı-aq bapkerleri Elızattyń óz baǵyn olımpıadalyq sport sanalatyn dzıýdoda synap kórýge nıetti ekendigin atap ótti.
Saıathan Satylǵanov
TARAZ
