Ofıserlik top delegasııasyn «Ońtústik» óńirlik qolbasshylyǵynyń orynbasary, polkovnık Nııaztaı Álkeshev pen Qazaqstan Respýblıkasy Ulttyq ulany tárbıe jáne áleýmettik-quqyqtyq jumystar bas basqarmasynyń bastyǵy, polkovnık Aleksandr Kramar bastap bardy. Sondaı-aq delegasııa quramynda Halyq qaharmany Qaırat Úmbetov pen áskerı saladaǵy jaýyngerlik erligi úshin túrli orden, medaldarǵa ıe bolǵan ofıserler – podpolkovnık Erjan Baımoldın, aǵa leıtenanttar – Erbol Otarbaev, Jandos Baıanbaev jáne leıtenant Syrym Súndetov te boldy.
Áskerıler delegasııasynyń negizgi maqsaty – atalǵan bilim ordalarynda Ulttyq ulannyń qoǵamdyq qaýipsizdik salasyndaǵy qyzmetin el ishine keńinen nasıhattaı otyryp, jasóspirimderdi áskerı-patrıottyq rýhta tárbıeleýge úndeý bolyp tabylady. Sonymen qatar jastardyń otansúıgishtik sezimin qalyptastyrý jolynda Ulttyq ulan janynan qurylǵan «Jas búrkit» klýbynyń jumysyna oqýshylardy kóptep tartý.
Kezdesý aıasynda sóz alǵan Qazaqstan Respýblıkasy Ulttyq ulanynyń tárbıe jáne áleýmettik-quqyqtyq jumystar bas basqarmasynyń bastyǵy, polkovnık Aleksandr Kramar Ulttyq ulannyń búgingi tańdaǵy qyzmetimen tanystyra kele áskerılerdiń jaýyngerlik erligi týraly aıtyp berdi.
«Bizdiń ulandyq ofıserler arasynda óziniń ómirin qaýip-qaterge tigip, erliktiń úlgisin kórsetken áriptesterimiz az emes. Olardyń sany búgingi tańda 170-ke jýyqtaıdy. Bul azamattardyń barlyǵy da ózderiniń erlik is-qımyldarymen ózgeniń ómirine arasha túsken beıbit kúnniń batyrlary. Sondyqtan da olardy biz meılinshe qoǵam arasynda keńinen nasıhattap, jastarǵa úlgi etip kórsete bergenimiz jón», dedi ol.
Jıynda 6506 áskerı bóliminiń komandıri, polkovnık Qaırat Úmbetov bastaǵan áskerılerdiń dárisi budan bylaı turaqty túrde uıymdastyrylyp turatyndyǵy aıtyldy.
«Jasóspirimder arasynda bolyp turatyn keleńsiz jaǵdaılar qoǵam nazaryn ózine aýdarýda. Biz keleshekte osyndaı keleńsizdikterdiń aldyn alýǵa áskerı azamat retinde óz úlesimizdi qosaıyq dep, Ishki ister mınıstri men Ulttyq ulan bas qolbasshylyǵynyń josparyna saı tyń bastamamen mektepterge baryp jatyrmyz. Iаǵnı erliktiń úlgisin kórsetip, joǵary marapatqa ıe bolǵan áskerı bólim ofıserleriniń qatysýymen oqýshylarǵa áskerı-patrıottyq rýhty oıatý nıetimen arnaıy dárister ótkizýdi bastadyq», dedi Halyq qaharmany Q.Úmbetov.
Erlik jasaǵan ulandyq áskerılerdiń mundaı bastamasyn qaladaǵy bilim oshaqtarynyń basshylary da qoshtap otyr.
«Bizge jáne bizdiń oqýshylarymyz úshin búgingi kún batyrlarynyń ózderi júrgizgen dárister óte qyzyq ári shynaıy. Sondyqtan da bizdiń mektepke keýdesine Elbasynyń ózi orden-medal taqqan keıipkerlerdiń kelýi zor mártebe. Atap aıtqanda, áskerı salada etken eren eńbegi men erligi úshin «Aıbyn» ordenimen marapattalǵan podpolkovnık Erjan Baımoldın, aǵa leıtenanttar Jandos Baıanbaev jáne Erbol Otarbaev, «Jaýyngerlik erligi úshin» medaliniń ıegeri atanǵan leıtenant Syrym Súndetov syndy azamattardan jasóspirimder úlgi alady dep úmit artamyz», deıdi Y.Altynsarın atyndaǵy №65 mektep-gımnazııa dırektorynyń mindetin atqarýshy Aıgúl Kerimbaeva.
Aıta keteıik, atalǵan is-shara aıasynda 6506 áskerı bóliminiń basshylyǵy men №46 jáne №65 mektep dırektorlary arasynda ózara áriptestik memorandýmy bekitildi. Sonyń aıasynda aldaǵy ýaqytta áskerı bólim ofıserleri mektep oqýshylaryna baryp arnaıy dáris oqyp, kezdesý uıymdastyryp turatyn bolady. Oǵan qosa, oqýshylardy áskerı salanyń qyr-syrymen jaqynyraq tanystyrý maqsatynda 6506 áskerı bóliminiń ashyq esik kúnderin uıymdastyrý kózdeledi.
Esterińizge sala keteıik, bıylǵy oqý jylynyń basynda shymkenttik bir top mektep oqýshylarynyń qatysýymen tóbeles bolyp, ol qoǵam nazaryn ózine aýdarǵan edi. Aldaǵy ýaqytta mundaı keleńsizdikterdiń aldyn alý maqsatynda Ulttyq ulan ofıserleri oqýshylardyń synybyna baryp sabaq ótkizýdi qolǵa alady.
