B.Tólegenovanyń 90 jyldyq mereıtoıy aıasynda ótkizilgen mereıtoılyq vokalıster baıqaýy shyn máninde mádenıet pen ónerdiń jarqyn mereksine aınaldy. Búginde esimi elge belgili Talǵat Musabaev, Súndet Baıǵojın, Azamat Jyltyrkózov, Natalıa Music syndy talantty ánshilerdi óner kógine samǵatyp, mártebesi joǵary álemdik sahnalarda án salyp, tanymal bolýyna zor septigin tıgizdi.
12 memlekettiń jas opera ánshileriniń arasyndaǵy saıys óte tartysty ótti. KSRO halyq ártisi Bıbigúl Tólegenovanyń tóraǵalyǵymen jumys istegen qazylar alqasynyń quramy osyǵan oraı baspasóz máslthatyn ótkizip, jeńimpazdardyń esimin aldyn-ala jarııalady. Parıjdegi Reseı mýzykalyq qaýymdastyǵynyń tóraǵasy, S.Rahmanınov atyndaǵy Parıj orys konservatorııasynyń rektory Graf Petr Sheremetev, Mılandaǵy birinshi halyqaralyq baıqaýdyń tuńǵysh jeńimpazy Kologero Antonıo Vıttorıo Terranova qatysqan kezdesýde jas ánshilerdiń kásibı múmkindigi, talanty saralanyp, jalpy baıqaýdyń salmaǵy men tanymaldylyǵy týraly sóz boldy. Terranova Bıbigúl Tólegenovanyń halyqaralyq vokalıster baıqaýynda jeńiske jetken toǵyz laýreattyń Avstrııada ótetin klassıkalyq mýzykanyń tanymal baıqaýyna irikteý synaǵynsyz qatysýǵa biregeı múmkindik berilgenin málimdedi.
3-oryn úsh ánshige: Ekaterına Vlasova (Ýkraına), Evgenıı Shagarov (Qazaqstan), Sosorbaram Bat-Erdenege (Monǵolııa) berilse, 2-oryndy úsh ánshi: Madına Orazbaı (Qazaqstan), Kamollıdın Mýhamadıev (О́zbekstan), Shahrızada Tynyshtyq (Qazaqstan), 1-oryndy úsh ánshi: Gúldana Aldadosova (Qazaqstan), Natalıa Zımına (Reseı), Van Shıkýn (Qytaı) ıelendi. Baıqaýdyń Gran-prı júldesin Italııadan kelgen jas oryndaýshy, keremet tenor ıesi Kozımo Oreste jeńip aldy. Opera otany Italııa Qazaqstandaǵy osy án jarysyna bıyl birinshi ret qatysyp otyr. Kozımo Oreste – «La-Skala teatr akademııasynyń» túlegi, kóptegen halyqaralyq baıqaýlardyń jeńimpazy.
Al Abaı atyndaǵy opera jáne balet teatrynyń dırektory Aıa Qalıeva 2-oryn alǵan ózbekstandyq ánshi Kamollıdın Mýhamedıevke birinshi ret ózi basqaratyn teatrdan eki aptalyq tájirıbeden ótý kelisimshartyn usyndy. Sonymen birge teatrdyń kórkemdik keńesiniń sheshimimen tájirıbe merzimi aıaqtalǵan soń opera ánshisi retinde 2019-2020 jyldardaǵy teatr repertýaryndaǵy spektaklderdiń jeke oryndaýshylyq múmkindigine ıe boldy.
Saltanatty keshtiń jabylýynda óner kórsetken gala-konserttegi laýreattardyń ánderin Opera teatrynyń Memlekettik sımfonııalyq orkestri Erbolat Ahmedııarovtyń dırıjerligimen súıemeldedi.
«Mıras» ulttyq qoǵamdyq qorynyń dırektory Gýzel Tólegenova án baıqaýyn uıymdastyrýshylaryna, demeýshilerine, seriktesteri men barlyq qatysýshylarǵa baıqaýǵa qosqan úlesi men kómegi úshin alǵysyn bildirdi. Ásirese, QR Tuńǵysh Prezıdenti – Elbasy Qory, «Samuryq – Qazyna» AQ, Mádenıet jáne sport mınıstrligi men Almaty qalasy ákimdiginiń rólin erekshe atap ótti.
ALMATY
