«Jazdym terbep elim men Elbasymdy» atty kezdesýdi Qazaqstan Respýblıkasynyń Tuńǵysh Prezıdenti – Elbasy kitaphanasynyń dırektory, saıası ǵylymdardyń doktory, professor Ámirhan Rahymjanov ashty:
– Qalamgerlik – qıyndyǵy men qyzyǵy mol, jan-jaqty bilimdi talap etetin jaýapty sala. El ıgiligi úshin qyzmet etetin bul salanyń mamandary shyǵarmashylyǵy arqyly adamzat sanasyna oń yqpalyn tıgizip qana qoımaı, jańalyqtyń jaqtaýshysy, jańanyń qoldaýshysy retinde qoǵam ómirinen erekshe oryn alady. Halyqtyń mádenıeti men rýhanııatyn tereń qasterlegen sondaı janashyrlardyń biri – Aıtbaı Sáýlebek. Ol kisiniń qalamynan tamǵan «Elbasynyń altyn besigi», «Qurysh tulǵa» ispetti qos tildi týyndylardyń birqatary tusaýy kesilgen sátten-aq kitaphana qoryna qabyldanyp, áli kúnge deıin is-sharalar aıasynda keńinen qoldanylyp keledi. Bul týyndylar 2017 jyly iske qosylǵan «N.Nazarbaev: dáýir, tulǵa, qoǵam» kóshpeli kórme jobamyzdyń aıasynda Almaty, Túrkistan, Atyraý, Aqtóbe, Qyzylorda, Jambyl oblystarynyń turǵyndaryna jol tartyp úlgerdi, - dedi Ámirhan Muratbekuly.
Álemdi moıyndatqan elimizdiń tabystary Elbasymen tyǵyz baılanysty bolsa, Tuńǵysh Prezıdenttiń qaıratker bolyp qalyptasýy Qaraǵandy óńirimen baılanysty. Elbasynyń qyzmeti men ómirine qyzyǵatyn qazaqstandyqtar belgili jazýshy Aıtbaı Sáýlebektiń týyndylarymen de tanys.
– Elbasy óz estelikterinde, bergen suhbattarynda dos-joldastary týraly kóp aıtady. Men sol adamdardyń birqatarymen kezdesip, ótken kúnge sholý jasaýdy kózdedim. Izdestirý jumystary barysynda kóptegen sýret tabylyp, biraz derekt anyqtaldy. Jazbalarymnyń negizine alynǵan áńgimeler oqyrmandy qýantyp, júrekti de eljiretedi. Olardyń bárinde ónege bar. Ǵıbratty áńgimelermen tanysý múmkindigi búgin sizderge de berilip otyr. Bul bastamanyń júzege asyrylǵany úshin Elbasy kitaphanasynyń basshylyǵyna alǵysymdy aıtqym keledi, - dedi Aıtbaı Sáýlebek.
Jazýshynyń estelikterin Qaraǵandy polıtehnıka ınstıtýtynda Elbasymen birge bilim alyp, keıin Qaraǵandy metallýrgııa kombınatynda áriptes bolǵan Qýanysh Omashev, Tóleýtaı Súleımenov, Toqtarhan Ysqaqovtyń, qoǵam qaıratkeri Serik Tileýbaev pen QR UǴA akademıgi Arystan Ǵazalıevtiń, jazýshynyń ustazy, kóp jyldar boıy akademık Sh.Esenov atyndaǵy mektep-gımnazııanyń dırektory bolǵan Pernebek Ahmetovtiń sózderi dáleldedi. Syıly azamattar tyńdaýshylarmen oı bólisip, ótken kúnniń aıtylmaǵan oqıǵalaryn jymııa eske aldy.
Olardy uıyp tyńdaǵan M.H.Dýlatı atyndaǵy Taraz memlekettik ýnıversıteti men Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń stýdentteri rızashylyǵynyń belgisi retinde óleń joldaryn oqyp, án-bılerimen ónerlerin pash etti. Tarazdyq stýdent Beıbit Satov jastardyń mazmundy is-sharalarǵa zárý ekenin alǵa tartyp, Elbasy saıasatynyń arqasynda bul máseleniń qolǵa myqtap alynǵanyn sóz etti:
– Halqymyzǵa zor eńbegi sińgen, elimizdi álemge tanytqan Tuńǵysh Prezıdentimizdiń esimi memleket ataýymen ushtasyp, brendke aınalǵany kópke málim. Semınar-trenıngtiń arqasynda ol kisiniń esimimen atalǵan kitaphananyń tórinde eki kún boıy mańyzdy máselelerdi talqylap, oı túıdik. Elbasynyń qazirgi qyzmet ornynda bilim alý – men úshin ári mártebe, ári abyroı. Oıy ushqyr, jan-jaqty belsendi jastardyń mundaı jobalardy kóptep qalaıtyny anyq. Semınar-trenıngtiń mazmuny men sapasyna bizdiń rızashylyǵymyz mol. Qanattanyp, jańa belesterdi baǵyndyrýǵa shabyttandyq. Dáriskerlermen jumys istep, qasıetterimizdi damyttyq. Bedeldi azamattarmen kezdesip, suhbattasyq. Sol sebepti de Elbasy kitaphanasyna bizdiń alǵysymyz zor, - dedi.
Jastar eki kúndik semınardyń támamdaǵanyn rastaıtyn sertıfıkattar men estelik syılyqtarmen marapattaldy. Kezdesý qonaǵynyń kózine túsken alǵyr jastarǵa jazýshynyń «Mahabbat jalǵyz» kitaby tartý etildi.
Is-shara qatysýshylary A.Sáýlebektiń tarıhı, derekti kitaptary men ózekti týyndylary usynylǵan kórmeni tamashalap, Nazarbaev ortalyǵynda ornalasqan ekspozısııalar men jádigerlermen tanysty.
