Árqaısysy 500 betten turatyn kitapqa 60 qazaq avtorynyń tańdamaly shyǵarmalary engen. Antologııany aǵylshyn tiline aýdaryp, baspadan shyǵarýda jobaǵa sarapshylyq qoldaý kórsetken Brıtanııa keńesi bolsa, al eń basty seriktes – Kembrıdj ýnıversıtetiniń baspasy (Sambridge University Press) Ulttyq aýdarma bıýrosymen birge jolma-jol aýdarmany ádebı óńdeý, baspaǵa daıyndaý, sondaı-aq basylymdardy shetelderde nasıhattaý jumystaryn atqarǵan.
Antologııanyń alǵysózin Brıtanııanyń akademııalyq qoǵamdastyǵynyń beldi ókilderi jazdy. Mysaly, zamanaýı qazaq prozasynyń antologııasyna Brıtanııa keńesiniń bas dırektory, ser Kıaren Deveın sóz arnasa, qazirgi qazaq poezııasy jınaǵynyń alǵysóz avtory – ádebıettanýshy-professor Djeıson Hardıng.
Álemniń iri kitaphanasynda tanystyrylǵan aǵylshyn tilindegi antologııa Ulybrıtanııa, AQSh, Kanada, Aýstralııa, Jańa Zelandııa syndy ondaǵan eldiń 8 myńnan asa kitaphanasyna, ýnıversıtetteri men ǵylymı ortalyqtaryna jetkizilmek.
Tusaýkeserge Brıtanııa keńesiniń, Kembrıdj ýnıversıteti baspasy, Brıtanııa kitaphanasynyń basshylary, sondaı-aq aýdarmashylar, ádebı redaktorlar men synshylar, Qazaqstan tarapynan Qazaqstan Prezıdentiniń kómekshisi, «Rýhanı jańǵyrý» baǵdarlamasyn júzege asyrý boıynsha Ulttyq komıssııa hatshysy Aıda Balaeva, Qazaqstannyń Ulybrıtanııadaǵy Tótenshe jáne ókiletti elshisi Erlan Ydyrysov, Ulttyq aýdarma bıýrosynyń atqarýshy dırektory Raýan Kenjehanuly, Qazaqstan Jazýshylar odaǵy tóraǵasynyń orynbasary Aqberen Elgezek qatysty.
Shara barysynda sóz sóılegen Aıda Balaeva: «Búgingi tusaýkeser «Jahandaǵy zamanaýı qazaqstandyq mádenıet» jobasy aıasyndaǵy jumystyń jemisi. Ol qazaqstandyq ádebıet, mýzyka, beıneleý óneri, teatr jáne kıno týyndylaryn álemge tanystyrýǵa baǵyttalǵan. Búgingi jobamyz júıeli túrde jalǵasyn taýyp, mádenıetaralyq qarym-qatynastyń ulǵaıýyna negiz bolady degen senimdemin. «Rýhanı jańǵyrý» baǵdarlamasy aıasynda 60 qazaqstandyq avtordyń tańdamaly shyǵarmalary tuńǵysh ret álemniń negizgi alty tiline aýdarylyp otyr. Jobany júzege asyrýǵa Ulybrıtanııa, Fransııa, Ispanııa, Mysyr, Qytaı jáne Reseıdiń jetekshi baspa uıymdary atsalysty. Antologııa álemniń 90-nan asa eline, bes qurlyqqa taraıdy. Iаǵnı, buryn-sońdy dúnıe júzi oqyrmandarynyń qolyna túspegen qazaq ádebıetiniń úzdik úlgilerimen 2,6 mlrd adam tanysýǵa múmkindik alady», dedi.
