Álem • 30 Qyrkúıek, 2019

Basqa basylymdardan

18 ret kórsetildi

Qazaqstan Prezıdenti Qasym-Jomart Toqaev BUU Bas Assambleıasynyń 74-shi sessııasy Jalpy debattarynyń ashylýyna qatysyp, sóz sóıledi. Sessııa asynda ekijaqty kezdesýler ótkizdi. Qazaqstan Prezıdentiniń sóılegen sózine, joǵary deńgeıdegi ekijaqty kezdesýlerine álemdik buqaralyq aqparat quraldary aıryqsha nazar aýdardy. Sol jarııalanymdardyń birqataryn «Egemen Qazaqstan» gazetiniń oqyrmandaryna usynyp otyrmyz.

Eki el áriptestigi damı beredi

Menafn

Qazaqstan Prezıdenti Qasym-Jomart Toqaev BUU Bas Assambleıasynyń 74-shi ses­sııasynyń aıasynda Shveısarııa Prezıdenti Ýlı Maýrermen kezdesti.

Prezıdentter kún tártibinde turǵan kóptegen ekijaqty máselelerdi talqylady. Memleket basshysy Q.Toqaev Qazaqstan-Shveısarııa yntymaqtastyǵynyń joǵary deńgeıin atap ótti.

«Shveısarııa – ekijaqty saýda men ınvestısııa salasyndaǵy Qazaqstannyń Eýropadaǵy negizgi seriktesteriniń biri. Bizdiń elderimiz bank, qurylys jáne agrarlyq sektordaǵy jobalardy belsendi túrde alǵa jyljytyp keledi», dedi Q.Toqaev.

Qazaqstan Prezıdenti qarjylyq qyzmet kórsetý, mashına jasaý, hımııa, farmasevtıka, aýyl sharýashylyǵy, tamaq ónerkásibi jáne týrızm sııaqty salalardaǵy birqatar perspektıvaly birlesken jobalarǵa nazar aýdardy.

Sóz sońynda Q.Toqaev shveısarııalyq áriptesin Qazaqstanǵa resmı saparmen kelýge shaqyrdy.

 О́ziniń saıası formýlasyn aıtty

AVIM

Qazaqstan Prezıdenti Qasym-Jomart Toqaev eldi basqarýdaǵy óziniń saıası formýlasy týraly aıtyp berdi.

«Qazaqstannyń saıası júıesindegi formýlam mynadaı: myqty strategııalyq oılaı biletin kúshti Prezıdent, yqpaldy Parlament jáne esep beretin Úkimet. Bul tujyrym elimizdiń negizgi qajettiligine saı keletinine jáne onyń beıbit ári turaqty bolashaǵyn qamtamasyz etetinine nyq senimdimin», dedi Qazaqstan Prezıdenti BUU Bas Assambleıasynyń 74-shi sessııasynda sóılegen sózinde.

Memleket basshysy Qazaqstannyń jańa Prezıdenti retinde eń aldymen zamanaýı áleýmettik memleket qurý maqsaty ekenin baıandady. «Meniń basty maqsatym – mıllıondaǵan qazaqstandyqtyń aýqymdy reformalardyń ıgiligin kórip, myqty ekonomıkasy, joǵary sapaly bilim berý júıesi men zamanaýı medısınasy bar, temir qursaýlardan azat qoǵamda ómir súrýi», dedi Qazaqstan Prezıdenti.

 Birlesken sharalarǵa mán berdi

karavan

«Qazaqstan Prezıdenti Qasym-Jomart Toqaev BUU-nyń minberinde álemdi ıadrolyq qarýdan azat etýge jáne terrorızmge qarsy birlesken sharalardy qolǵa alýǵa shaqyrdy. Toqaev Nıý-Iorkte BUU Bas Assambleıasynyń 74-shi sessııasynda sóılegen sózinde terrorızmge qarsy kúrestegi óz eliniń tájirıbesimen bólisti», delingen aqparatta.

«Barlyǵymyz biletindeı qaqtyǵystar joıqyn sıpatqa ıe. Olar terrorızm men ekstremızmniń týyndaýyna sebepshi bola alady. Bul syn-qaterlerdi BUU-nyń qoldaýymen jahandyq lańkestikke qarsy birlesken áreketter arqyly ǵana jeńýge bolady», dedi Q.Toqaev.

Prezıdent Qazaqstannyń halyqaralyq seriktesterimen ótkizgen Sırııadaǵy soǵys aımaǵynan otandastaryn elge qaıtarýǵa baǵyttalǵan «Jýsan» operasııasynyń sátti aıaqtalǵanyn atap ótti. «Shara nátıjesinde terrorlyq nasıhatqa ushyraǵan Qazaqstannyń 595 azamaty, onyń ishinde 406 bala Sırııadaǵy soǵys aımaǵynan úılerine oraldy. Biz tájirıbemizben basqa eldermen bólisýge daıynbyz jáne olardy osyndaı áreketke shaqyramyz», dedi ol.

Sondaı-aq Q.Toqaev memleketter kóshbasshylaryn ıadrolyq qarýdan azat álem qurýǵa shaqyrdy. «Iаdrolyq qarýdan azat álemge qol jetkizý meniń elim úshin basty basymdyq bolyp qala beredi. Bul umtylys bizge ıadrolyq qarýdy joıý jónindegi jahandyq qozǵalystyń aldyńǵy qatarynda bolýǵa múmkindik bere otyryp, qazaq halqynyń ulttyq biregeıliginiń ajyramas bóligine aınaldy», dep atap ótti Prezıdent.

 Saparmen kelýge shaqyrdy

trend

Ázerbaıjandyq Trend aqparat agenttigi Qazaqstan Prezıdenti Qasym-Jomart Toqaev pen Ýkraına Prezıdenti Vladımır Zelenskııdiń Birikken Ulttar Uıymynyń Nıý-Iorktegi shtab-páterinde ótkizgen kezdesýine nazar aýdardy.

Aqparatta qos prezıdent bir-birin saılaý nátıjelerimen quttyqtaǵany aıtylǵan. Qazaqstan Prezıdenti eki el tarıhynyń uqsastyǵyn jáne bolashaǵynyń ortaqtyǵyn atap ótti. Ol Ýkraınamen saıasatta, saýda men ekonomıkada yntymaqtastyqty odan ári keńeıtýge daıyn ekenin bildirgen. Kezdesý sońynda Q.Toqaev pen V.Zelenskıı bir birin óz elderine saparmen kelýge shaqyrdy.

 Zamanaýı trendterdi talqylady

AKı

Qasym-Jomart Toqaev Goldman Sachs kompanııasynyń prezıdenti Devıd Solomonmen jáne Eurasia Group kompanııasynyń prezıdenti Iаn Brem­mermen kezdesti. Kezdesý barysyn­da Goldman Sachs-tyń Qazaqstandaǵy qyzmetiniń negizgi baǵyttary, onyń ishinde «Astana» halyqaralyq qarjy ortalyǵynyń sheńberindegi yntymaqtastyq máselesi talqylanǵany aıtylǵan. Toqaevtyń Goldman Sachs kompanııasymen yntymaqtasa otyryp, AHQO-men ózara is-qımyl aıasyn keńeıtý men qazaqstandyq kompanııalardyń IPO-ǵa shyǵýyna járdemdesý máselelerinde tyǵyz jumys isteýge nıet bildirgenine toqtalǵan.

Eurasia Group basshysymen kezdesýde taraptar óńirlik jáne jahandyq kún tártibindegi ózekti máseleler boıynsha pikir almasyp, tehnologııalyq damýdaǵy zamanaýı trendterdi talqylaǵan. Sondaı-aq Qasym-Jomart Toqaev Iаn Bremmerdi Astana Club halyqaralyq pikirtalas alańynyń jumysyna qatysýǵa shaqyrǵany aıtylǵan.

Sholýdy ázirlegen

Abaı ASANKELDIULY,

Merýert BÚRKITBAI,

«Egemen Qazaqstan»

 

Sońǵy jańalyqtar

Dollardyń búgingi baǵamy belgili boldy

Ekonomıka • Búgin, 15:54

Atyraýda 9 balany ıt talady

Aımaqtar • Keshe

Taraz qalasynda gaz qubyry jaryldy

Aımaqtar • 23 Qazan, 2020

Syrda kúrishten rekordtyq ónim jınaldy

Aımaqtar • 23 Qazan, 2020

Uqsas jańalyqtar