ALMATYǴA TÚSKEN “KELIN”

Oǵan elshilerdiń jubaılary aýzyn ashyp, kózin jumdy Naýryz merekesi qarsańynda Almatyǵa “kelin” tústi. Qaladaǵy  eńseli “Interkon­tınental” qonaqúıiniń “Bosphor” atty meıramhanasynda ótken kelin túsirý, qudandaly bolý rásimine halyqaralyq áıelder klýbynyń músheleri qatysty. Bul klýbtyń músheleri – elimizdegi  elshilerdiń, dıplo­mat­tardyń jubaılary, Qazaqstanda jumys istep jatqan  áıgili kom­panııa jetekshileriniń áıelderi. Ultymyzdyń salt-dás­túrimen tanystyrýǵa ar­nalǵan merekelik sharany uıymdastyrý úshin atal­mysh klýb músheleri T.Júr­genov atyndaǵy  Qa­zaq ulttyq óner akademııa­sy men J.Ele­bekov atyn­daǵy estrada jáne sırk kolledjine ótinish bildir­gen eken. Dál osyndaı tamasha usynysqa О́ner akademııasynyń “English club of KZ Art” klýby da qýana-qýana kelisip, hal­qymyzdyń eń saltanatty da maǵynaly dástúrleriniń biri – “Kelin túsirý” rá­simin aıta-aıta júrer­lik­teı uıymdastyryp berdi. Halyqaralyq áıelder klýby osylaısha oıyn oınap, toı toılap júre bermeıdi. Onyń basty boryshy – muqtaj jandarǵa kómek berý, qaıyrymdylyq sharalaryn ótkizý. Bul klýbqa Qazaqstandaǵy elshi­lerdiń, dıp­lomattardyń jubaılary ǵana emes, apa-qaryndastary da múshe bolyp,  qaıy­rymdylyq aksııalaryna qosylyp jatady. Osy oqıǵanyń basy-qasynda júrgen О́ner akademııasynyń rektory Arystan Muhamedıuly: – Elshilerdiń otbasy músheleri qazaqtyń salt-dástúrine qyzyǵýshylyq tanytyp, tól merekemiz  Naýryzǵa erekshe kóńil bólip otyr­ǵany  biz úshin úlken mártebe. Naý­ryzdy IýNESKO aýqymynda atap ótýge qol jetkizgenimiz – Qazaqstannyń ózge eldermen dıplomatııalyq qarym-qatynasy bıik deńgeıde ekendiginiń aıǵaǵy. Bir kezderi umyt bolǵan ulttyq merekemiz qaıta jańǵyryp, jandanǵanyna 20 jyl ótse de, adamzattyń qadir-qasıetke toly Ulystyń uly kúniniń mán-maǵynasyn bıyl birinshi ret álem jurtshylyǵy moıyndap, BUU tarapynan qoldaý tapty. Bul – úlken qýanysh, – deıdi. Sonymen bekzat jıynnyń basty oqı­ǵasy bastalar sát te jaqyndady. Kelisti qyz-kelinshekter, saltanatty ortanyń sándi tynyshtyǵyn “súıinshilegen” qýanyshty daýys bózdi.  Sóıtsek “qudalar” kele jatyr eken. Akademııa men kolledjdiń talantty jastary teatrlandy­rylǵan kórinistermen “toıdy” bastap kep jiberdi. Osynaý kórinisterge stýdentter salt-dástúrlerimizdi keńinen sıǵyzyp, saltanatty bar maǵynasyn qosa órýge qol jetkizdi.  Ońaılyqpen eshnársege eleńdeı qoımaıtyn elshilerdiń áıelderi ǵajaıyp sátterge tánti bolyp, tákap­parlyq týraly umytyp, sýret­ke de túsirip alyp jatty.   Hanymdar men bıkeshter arasynan betashar kezinde ózde­riniń aty atalyp, kelin sálem bergende  ózimizdiń kádemen ortaǵa shyǵyp, oramalǵa aqsha tastaǵandar da tabyldy. Qazaqtyń sáýkeleli, kórkem kelini  ıbalylyqpen ıilip sálem bergeni de qandaı jarasymdy ekenin syrttaǵy synshy kózben qaraǵanda anyq uǵady ekensiń. Aınash ESALI, Almaty.