Mádenıet jáne sport mınıstrliginiń tapsyrysy boıynsha «Qazaqfılm» kınostýdııasy túsirgen «Arýaq» fılmi prokatqa bıyl kóktemde shyqqan bolatyn. Rejısserdiń aıtýynsha, fılm ıdeıasy A.Áshimovtiń ózine tıesili. Japan dalada jalǵyz ómir keshken qarııanyń jas urpaqqa aıtqysy keletin oıyn, fánı jalǵan týraly tolǵanysyn parasatpen órgen kınotýyndyda ıdeıa avtorynyń jeke kózqarasy men paıymy basym. «Bul fılmniń keıipkeri ǵaryshtyq keńistiktegi adam. Ol kóptegen til biledi, kóp eldi meken etken. Bir qaraǵanda, «Atamannyń aqyryndaǵy» Qasymhan Chadıarov taǵdyrynyń jalǵasy sııaqty, keıipker 80 jasta, endeshe bul onyń dálme-dál jalǵasy emes, birtindep basqa tarıhty jasaǵan adam», deıdi A.Áshimov.
Súıgen jary qaıtys bolǵan, aǵaıyn-týysy da qalmaǵan, óz ortasynan bezip, qý mekıen dalany pana tutqan Aǵataı esimdi qarttyń kishkentaı jetim balaǵa kezikken oqıǵasy kórermendi beıjaı qaldyrmaıdy. Qulazyǵan aqsaqaldyń jarymjan kóńili jetimder úıinen qashyp shyqqan balany kórgende ózgerip sala beredi. Qazaq aqsaqalyna tán danalyq, tereń oılaý daǵdysy fılmniń ón boıyna arqaý bolǵan. Túrki elderiniń ertegileri men ańyz-áńgimeleriniń jelisi boıynsha túsirilgen fılmniń bas keıipkeri osy obrazy arqyly áli de babyndaǵy akter ekenin barsha jurtqa taǵy bir márte dáleldedi.
«Egemen-aqparat»
