Ozyq tájirıbe tıimdilik negizi

Aýstrııa Ishki ister mınıstrliginiń sybaı­las jemqorlyqqa qarsy is-qımyl jónin­degi dırektory Vızel­taler An­dreas­pen áńgimelesý bary­synda jem­qor­lyqqa qarsy is-qımyl boıynsha jumys tájirıbesimen bó­lis­ti. Aýstrııa dele­gasııasynyń ókili túrli eldiń pikirimen jáne ozyq tájirı­besimen almasýǵa alań usyn­ǵany úshin Qazaqstan tarapyna alǵys bildirdi.

V.Andreas Aýstrııa ishki ister júıe­sinde 2012 jyldan bastap komplaens qyz­meti jumys isteıtinin, 2015 jyldan bas­tap bilim berý jáne densaýlyq saq­taý júıe­lerinde parasattylyq ıns­tıtýtynyń tolyq engizilgenin atap ótti.

Sybaılas jemqorlyqtyń preven­sııasy máseleleri qoǵamda, ásire­se jastar arasynda sybaılas jem­qor­lyq kórinisterine «tózbeý» qaǵı­dasyn nasıhattaýǵa nazar aýda­ryl­ǵan. О́z kezeginde, Alık Shpekbaev Qazaq­standa da jemqorlyqtyń preven­sııa­sy basymdyqqa ıe ekenin atap ótti. Qoǵamdyq baqylaý, bıýdjettiń ashyq­­tyǵy, memlekettik organdardyń halyq al­dyn­daǵy eseptiligi – parasatty qoǵam qalyp­tastyrýdyń negizgi irgetasy retinde qol­danylady.

Koreıa Respýblıkasynyń Sybaılas jemqor­lyqqa qarsy is-qımyl jáne azamat­­tyq quqyqtar jónindegi komıs­sııasynyń tóraıymy Ýn Chen Pak­pen kezdesýde taraptar sybaılas jem­qorlyqqa qarsy saıa­sat boıynsha ynty­maqtastyqtyń ja­ńa baǵyttary men birlesken jobalardy júzege asy­rý­daǵy ózara árekettestik týra­ly máselelerdi talqylady. Alık Shpek­­baev Qazaqstandaǵy salaǵa qa­tysty qa­byl­danyp jatqan sharalar týraly habarlady. Ol sybaılas jem­qorlyqqa qarsy saıa­sattyń Qazaq­stan­nyń memlekettik bas­qarý júıe­sinde mańyzdy oryn alatynyn atap ótti.

Ýn Chen Pak hanym Koreıadaǵy sy­­baılas jemqorlyqpen kúrestegi tájirıbemen bó­lis­ti. Atap aıtqanda, memlekettik organ­dar arasynda para­sattylyq reıtıngin engi­zýdi júrgizetin arnaıy organnyń qyz­meti týraly habardar etti.

О́z kezeginde A.Shpekbaev Koreıa Res­­pýb­lıkasynyń atalǵan baǵyttaǵy táj­irı­besin zerdeleýge jáne engizýge qyzyǵý­shylyq tanytty.

Malaızııa Premer-mınıstri keńsesi­niń quqyqtyq máseleler jónin­degi mı­nıstri Keng Lıý Vı bastaǵan Ma­laızııa de­le­gasııasymen bolǵan kez­desýde­ A.Shpek­­baev sheteldik árip­testerin bıyl Agent­tiktiń jańa ere­jesi men qurylymynyń beki­tilgeni, jańa – parasattylyq, prevensııa jáne seriktestik departamentteriniń qurylǵany týraly habardar etti. Onyń aı­týynsha, bul máselede Malaızııa, Gon­kong, Sıngapýr jáne Ońtústik Koreıa sekil­di Ońtústik-Shyǵys Azııa elde­riniń tájirı­beleri zerdelendi. Kez­desý barysynda Keng Lıý Vı myrza Malaızııada shetelden aktıvterdi qaıtarý saıasaty jumys isteı­tinin, sybaılas jemqorlyqqa qarsy sot quryl­ǵanyn, buǵan qosa, elde sybaılas jemqorlyq quqyq buzýshylyqtary týraly aqparat berýshilerdi tolyq qorǵaýǵa baǵyttalǵan zań bar ekenin málimdedi.

Malaızııanyń basqarý, parasatty­lyq jáne sybaılas jemqorlyqqa qarsy is-qımyl máseleleri jónindegi Ult­tyq ortalyǵynyń ókili Mohammed Abý Kasım Malaızııada, atap aıt­qan­da, memlekettik organdarda sy­baı­las jemqorlyqqa qarsy is-qı­myl maqsatynda qyzmetkerlerdi kási­bı satylmaýshylyqqa testileý engi­­zil­genin habarlady. Sonymen qosa, malaızııalyq tarap tájirıbemen ba­ryn­sha tolyǵyraq bólisý úshin qazaq­­­standyq áriptesterin Malaızııaǵa shaqyr­dy.

Kýveıt Sybaılas jemqorlyqqa qarsy vedomstvosynyń tóraǵasy Álnemash Abdýlrahmanmen ótken eki­jaqty kezdesýde A.Shpekbaev Qazaq­standa sybaılas jemqorlyqqa qarsy 2015-2025 jyldarǵa arnalǵan strategııa ázir­lenip, onyń iske asyrylýyn atap ótti.

Á.Abdýlrahman Kýveıt úkimeti Halyqaralyq sybaılas jemqorlyqqa qarsy akademııa qyzmetine jan-jaq­ty qoldaý kórsetýge daıyn ekenin jet­kizdi.

– Sybaılas jemqorlyqqa qarsy is-qımyl jónindegi vedomstvonyń ju­mysy úsh negizgi baǵyt boıynsha qurylǵan. Birinshisi, sybaılas jem­qorlyq qylmystardyń 12 sanaty boıyn­sha azamattardan sybaılas qu­qyq buzýshylyqtar týraly ótinishter jınaý. Ekinshisi, arnaıy táýelsiz komıssııa qurý bolsa, al úshinshisi ha­lyq pen memlekettik qyzmetshiler ara­synda parasattylyq sabaqtaryn ótkizý. Barlyq atalǵan aldyn alý sharalary uzaq merzimdi ulttyq strategııada kórsetilgen. Onyń qabyldanýy arqyly eldegi oń ózgerister atap ótil­di, – dedi Á.Abdýlrahman.

Kezdesý qorytyndysy boıynsha taraptar ekijaqty yntymaqtastyqty damytý jáne sybaılas jemqorlyqqa qarsy saıasatty júzege asyrýda elder arasynda tájirıbe almasý úshin úlken áleýet bar degen ortaq pikirge keldi.

Daıyndaǵan

Joldybaı BAZAR,

«Egemen Qazaqstan»