Joba sheńberinde 18-29 jas aralyǵyndaǵy ózindik oı-armany, myǵym maqsaty bar jastar kásipkerlikke oqytylyp, olarǵa 505 myń teńge qaıtarymsyz grant beriledi. Jumyssyz nemese ózin-ózi jumyspen qamtýshy jastarǵa basymdyq beriledi. Baǵdarlamaǵa qatysý úshin jastar kez kelgen baǵytta paıdaly joba usynýy kerek.
Joǵaryda aıtyp ótkenimizdeı, «Jas kásipker» jobasy arqyly oqyǵandarǵa usynylatyn grant qaıtarymsyz. Berilgen qarjyǵa alynǵan qajetti dúnıelerdiń barlyǵy jastardyń ózinde qalady jáne keıin jeke kásibin bastaýǵa negiz bolady.
Asylhan Salyq – osy jobaǵa qatysýshylardyń biri. Syrym aýdany, Kózdiqara aýylynyń 19 jastaǵy turǵyny «Jas kezimde beınet ber, qartaıǵanda zeınet ber» degendi ustanyp, qazirden bastap kásippen aınalysýdy jón kórdi. Asylhan týraly Aqparat jáne qoǵamdyq kelisim mınıstrliginiń qoldaýymen júrgizilip jatqan eńbekqor jastar aqparattyq sharasynda da aıtyldy.
– «Eńbek» memlekettik baǵdarlamasy týraly alǵash teledıdardan kórip, qyzyǵýshylyq tanytyp, óz isimdi ashýǵa aýdandyq jumyspen qamtý ortalyǵyna bardym. Bıyl maýsym aıynda ortalyqtyń joldamasymen «Jas kásipker» jobasy boıynsha kásipkerliktiń qyr-syryn úırenip, sertıfıkat alyp, baǵdarlama arqyly jeke sharýashylyǵymdy damytý úshin 505 myń teńge qaıtarymsyz grant aldym. О́te yńǵaıly. Osy qarjyǵa 15 toqty, 6 eshki satyp aldym. Sonymen qatar memleket tarapynan ataýly áleýmettik kómek alyp otyrmyn.
Osy baǵdarlamaǵa qatysqanym úshin sheksiz rızamyn. Sonyń arqasynda jeke sharýashylyǵymdy damytyp, tabysqa qol jetkizýge múmkindik aldym. – deıdi Asylhan Erbolqyzy.
Salamat IMANǴALIEV
Batys Qazaqstan oblysy,
Syrym aýdany
