Al jýyrda ótken mádenı sharanyń biri Abaı ánderi men óleńderine arnaldy.
– Maqsat – Abaı atamyzdyń óleńderin oıyn arqyly úıretý. Sonda oqýshylar ár óleńge mán berip, maǵynasyn túsinip jattap alady, – deıdi №19 mekteptiń qazaq tili men ádebıeti pániniń muǵalimi Gúlzıra Ońǵarova.
Muǵalimderi bastap kelgen 8 «a» synyp oqýshylary «Nurly» jáne «Danalyq» atty eki topqa bólindi. Oıyn sharty boıynsha balalar on aıaldamadan ótý kerek. Bul rette top jetekshilerine karta jáne aıaldamadan ótý qujaty berildi.
Oqýshylar ár aıaldamadan ótken saıyn kezektesip, Abaıdyń «Qys», «Kúz», «Jaz», «Jazǵyturym» óleńderin jatqa aıtyp berdi.
Sóıtip «Aıaldamaǵa aıalda» oıyny arqyly aıtylǵan óleńderi Abaıdyń «Kózimniń qarasy», «Aıttym sálem Qalamqas» ánderine jalǵasty.
Sharaǵa qatysýshy Sharapıden Allajar «Kózimniń qarasy» ánin oryndady, al Ázilhan Aıym, Aıjan Ibragımova, Qalı Alıhan, Serik Arslan, Dılnaz Tezekbaevalar Abaıdyń óleńderin, qara sózderin mánerlep oqyp berdi.
Eki komanda da «Biz Abaıdy bilemiz be?» atty sóz jumbaqtardy sheship, suraq-jaýaptar oıyndaryna belsendi qatysty.
Shara sońynda eń kóp óleń aıtyp, án salǵan, sóz jumbaq sheshken «Nurly» komandasy jeńimpaz atandy.
Oqýshylardy tańǵaldyrǵany – «Jelsiz túnde jaryq aı» ánin, Abaıdyń «Qara sózderin» ınnovasııalyq qalam arqyly tańdap, tyńdady.
– Osy kvest-oıyndar, ıaǵnı oınaı otyryp, oılap jetkize bilý arqyly oqýshylar ózderiniń Abaı óleńderin, ánderin, ómirbaıanyn, shyǵarmashylyǵyn jaqsy biletindikterin óz bilimderimen kórsete alǵandaryna qýandyq, – deıdi kitaphanashy Aınagúl Maǵzumova.
Kitaphana qyzmetkerleri Aıtjamal Qabyldenova, Almagúl Aıtmaǵambetova, Jamkeı Dáýithanqyzy «Samal» saýyqtyrý ortalyǵy, «Alramı» klýb úıi, ardagerler klýby, Múgedekter men qarttarǵa arnalǵan ınternat úıi, etnomádenı ortalyqtar, «Saýran» balalar ortalyǵymen birlese qyzmet etýde.
Balalarǵa arnalǵan qýyrshaq teatry, latyn álipbıin úıretetin «Ana tili ortalyǵynyń» buryshy bar.
Shara sońynda «Abaı álemi» kitap kórmesi uıymdastyryldy. Abaıdyń ómiri men shyǵarmashylyǵyna arnalǵan beınefılm kórsetildi.
PAVLODAR
