Bul oraıda Jambyl oblysynyń ákimi Asqar Myrzahmetov oblystyq polısııa departamentiniń bastyǵy Arman Orazalıevke ekologııalyq normalardyń saqtalýyn baqylaýdy kúsheıtýdi jáne atmosferaǵa avtokólik quraldarynan shyǵatyn zııandy qaldyqtardy azaıtý boıynsha sharalar qabyldaýdy tapsyrǵan edi. Qazirgi kezde atalǵan departament oblystyq ekologııa departamentiniń zerthanalyq-analıtıkalyq baqylaý bóliminiń mamandaryn tarta otyryp, «Taza aýa» jedel-aldyn alý is-sharasyn uıymdastyrýda.
Taraz qalalyq polısııa basqarmasy patrýldik polısııa batalonynyń qyzmetkerleri jedel-aldyn alý is-sharalaryn júrgizýdiń birinshi kúni Ákimshilik quqyq buzýshylyq týraly kodekstiń 334-babynyń talaptary boıynsha 40-tan astam zańbuzýshylyqtardy anyqtaǵan. Keıinnen bul kórsetkish arta túsken. «Jambyl oblysynyń Polısııa departamenti aýaǵa zııandy zattar shyǵarý arqyly qorshaǵan ortaǵa zalal keltiretin avtokólikterdi anyqtaý maqsatynda «Taza aýa» jedel-aldyn alý is-sharasyn uıymdastyrýda. Búgingi tańda mundaı kólikter atmosferany lastaýdyń jáne óńirdegi ekologııalyq jaǵdaıdyń nasharlaýynyń negizgi sebepteri bolyp tabylady. О́kinishke qaraı, talaptarǵa saı kelmeıtin kólik quraldary áli de kóp. Jedel-aldyn alý is-sharasynyń alǵashqy úsh kúni ishinde Qazaqstan Respýblıkasynyń Ákimshilik quqyq buzýshylyq týraly kodeksiniń 334-baby boıynsha 200-den astam júrgizýshi ákimshilik jaýapkershilikke tartyldy. Atalǵan bapqa sáıkes eki aılyq eseptik kórsetkish mólsherinde aıyppul qarastyrylady, al quqyq buzýshylyq ekinshi ret qaıtalanǵan jaǵdaıda aıyppul mólsheri bes aılyq eseptik kórsetkishke deıin artady. Sondaı-aq memlekettik nómirdi alyp qoıý kózdelgen», deıdi Jambyl oblystyq polısııa departamentiniń bastyǵy, polısııa polkovnıgi Arman Orazalıev.
Sonymen qatar óńirdiń bas polıseıi búginde oblys ortalyǵynyń joldarynda qoǵamdyq kólikterdiń sany artýda ekenin, onyń basym bóligi ekologııalyq normalarǵa sáıkes kelmeıtinin de aıtady. Zań buzýshylyqtardyń kópshiligi jolaýshylar avtobýstaryna qatysty bolyp otyr eken. Sondyqtan da qazirgi ýaqytta atmosferaǵa zııandy zattar shyǵaratyn osy sanattaǵy kólikterdi azaıtý boıynsha aýqymdy jumystar júrgizilip jatqanyn, júrgizýshilermen qatar avtobýs parkteriniń ıeleri de qatań jaýapkershilikke tartylatynyn jetkizdi.
