Memleket basshysy ádil ári ashyq baıqaý ótkizip, eń úzdik kandıdattardy irikteýdiń, sondaı-aq, taıaý jyldary olardy jumysqa ornalastyrý máselesin sheshýdiń mańyzdylyǵyn aıtty.
Qaraǵandy oblysynyń ákimi Jeńis Qasymbek Qasym-Jomart Toqaevqa bıylǵy 9 aıdyń qorytyndysy boıynsha óńirdiń áleýmettik-ekonomıkalyq damýy, júzege asyrylyp jatqan ınvestısııalyq jobalar, áleýmettik ınfraqurylymnyń ahýaly, densaýlyq saqtaý jáne bilim berý salalaryndaǵy nysandardyń qurylysy, sondaı-aq, turǵyn úı jáne avtojol salý jumystarynyń barysy týraly málimet berdi.
Memleket basshysy áleýmettik mańyzy bar azyq-túlikterdiń baǵasyn, jylý berý maýsymynyń ótkizilýin, sonymen qatar, ataýly áleýmettik kómektiń berilýin baqylaýda ustaýǵa baılanysty birqatar tapsyrma berdi.
Shymkent qalasynyń ákimi Erlan Aıtahanov Qasym-Jomart Toqaevqa turǵyndardyń ál-aýqatyn arttyrý jáne qalaǵa qosylǵan aýmaqtardyń ınfraqurylymyn damytý jaıynda baıandady. Sondaı-aq kezdesý barysynda Prezıdentke Shymkent qalasyn damytýdyń úshjyldyq jospary usynyldy.
Memleket basshysy Shymkent qalasynyń ákimine qala tóńiregin elektr qýaty, gaz, aýyzsý jáne jol sekildi qajetti ınfraqurylymdarmen qamtamasyz etý jumystaryn belsendi júrgizý asa mańyzdy ekenin aıtty.
