Atalǵan dóńgelek ústel jumysy úsh baǵytta júrgizildi: ekstremızm men terrorızmge qarsy saladaǵy qylmystyq saıasat; terrorızm jáne ekstremıstik amaldarǵa qarsy áreket etý salasyndaǵy memlekettik saıasatty júzege asyrý; ekstremıstik jáne terrorıstik baǵyttaǵy qylmys úshin halyqaralyq praktıkadaǵy jazalardy qoldaný. Dóńgelek ústel jumysyna Qazaqstan Respýblıkasy Bas prokýrorynyń orynbasary M. Ahmetjanov, Qazaqstandaǵy EO elshisi S. Karlsson, Qazaqstandaǵy Nıderland elshisi A. Karsten jáne BUU ókilderi qatysty.
Is-shara barysynda Qazaqstanda BUU-nyń 19 lańkestikke qarsy konvensııasyn júzege asyrý boıynsha taldamaly sholý usynyldy jáne Qazaqstan Respýblıkasynda ekstremıstik jáne terrorıstik baǵyttaǵy qylmystardy taldaý boıynsha zertteý nátıjeleri tanystyryldy. Sondaı-aq 29 qazan kúni Syrtqy ister mınıstri Muhtar Tileýberdi BUU Esirtki jáne qylmys jónindegi basqarmasynyń (BUU EQB) Ortalyq Azııadaǵy óńirlik ókili Ashıta Mıttalmen kezdesken edi. Sonda taraptar Qazaqstandaǵy BUU EQB aǵymdaǵy jobalaryn iske asyrýdy, sondaı-aq ózara is-qımyldy odan ári nyǵaıtý perspektıvalaryn talqylady jáne kontrterrorızm men qylmystyń aldyn alý salasyndaǵy jańa birlesken jobalardy iske qosý týraly ýaǵdalasty. Almatyda esirtki quraldarynyń, psıhotroptyq zattar men olardyń prekýrsorlarynyń zańsyz aınalymyna qarsy kúres jónindegi Ortalyq Azııa óńirlik aqparattyq úılestirý ortalyǵynyń (OAО́AÚO) jumys isteý máseleleri qozǵaldy.
Endi A. Mıttal Qazaqstanǵa sapary aıasynda BUU EQB delegasııasynyń Qazaqstandaǵy qylmystyq sot tóreligi júıesin nyǵaıtý salasyndaǵy memlekettik organdardyń ókilderimen kezdesýleri, sondaı-aq 2019 jylǵy 31 qazan men 1 qarasha aralyǵynda Qaraǵandy oblysyndaǵy penıtensıarlyq mekemelerge barýy josparlanyp otyr.
Qazirgi ýaqytta EQB Qazaqstanda «ekstremıstik jáne terrorıstik baǵyttaǵy qylmystary úshin sottalǵandarmen jumys isteý boıynsha kúsh-jigerdi qoldaý jáne penıtensıarlyq mekemelerdegi zorlyq-zombylyqty týyndatatyn radıkaldaýdyń aldyn alý» jáne «Jýsan» gýmanıtarlyq operasııasy sheńberinde Sırııadaǵy soǵys qımyldary aımaǵynan qaıtarylǵan balalarǵa kómek kórsetýge baǵyttalǵan birqatar birlesken jobalardy, «balalardy terrorıstik jáne áskerı ekstremıstik toptarmen azǵyrýǵa jáne paıdalanýǵa qatysty aldyn alý jáne áreket etý sharalary» jobasyn júzege asyrýda.
