100 jyldyq jylnamanyń saqtalǵan orny da, tarıhynyń skanerden ótkizilip, sıfrly arhıviniń jasalǵan jeri de osy qasıetti oqý ordasy. Konferensııaǵa kelgen qonaqtar aldymen «100 jyl – 100 gazet» atty arnaıy uıymdastyrylǵan kórmeni tamashalady. 1919 jyly 17 jeltoqsanynda 20 jastaǵy Bernııaz Kúleevtiń óleńimen bastalyp jaryq kórgen  «Ushqyn» gazetiniń 1-nomerinen bastap ár jyldardaǵy «Eńbek týy», «Eńbekshil qazaq», «Eńbekshi qazaq», «Sosıaldy Qazaqstan», «Sosıalıstik Qazaqstan», «Egemendi Qazaqstan», «Egemen Qazaqstan» bolyp birneshe ret ózgergen eldiń eń basty basylymynyń ár jyldardaǵy tigindisi jurt nazaryna usynyldy.

Jıynǵa kelgen qonaqtarǵa aldymen derekti fılm kórsetilip, onda qyzmet istegen qazaqtyń iri memleket qaıratkerleri men kórnekti tulǵalarynyń qly muraty men eńbegine qysqa sholý jasaldy. Budan keıin Almaty qalasy  ákimi Baqytjan Saǵyntaev sóz alyp, mereıtoı qýanyshyna jıylǵan qaýymdy elimizdiń árbir azamatyna etene tanys, respýblıkanyń mańdaıaldy irgeli basylymy «Egemen Qazaqstan» gazetiniń 100 jyldyq merekesimen quttyqtady. «Kórmeni tamashalap, estigenimizdeı, búgin «Egemenniń» 29 696 nómiri jaryq kórip otyr eken. Qutty bolsyn! Ǵasyrlyq tarıhy bar bul gazetti qolyna ustaǵan kez kelgen jan ondaǵy árbir aqparattyń shynaıylyǵyna, kótergen taqyrybynyń mańyzdylyǵyna kámil senedi. Sebebi memlekettik múdde men jýrnalıstik muratty teń ustaıtyn basylymnyń kásibı deńgeıi, ustanǵan baǵyty eshqashan ózgergen emes. Sondyqtan da tarıhy tereń, taralymy keń basylymǵa Elbasymyz N.Nazarbaev «Otanymyzdyń bas gazeti» dep laıyqty baǵasyn berse, Memleket basshysy Q.Toqaevtyń kúndelikti sholý jasaıtyn gazetteriniń arasynda aǵa basylym kósh basynda tur. Bir kezeńde Smaǵul Sádýaqasov, Júsipbek Aımaýytov, Turar Rysqulov, Oraz Jandosov, Muhtar Áýezov sııaqty Alash arystary tizginin ustaǵan basylym kúni búginge deıin óziniń baǵyt-baǵdaryn memlekekt múddesine, el ıgiligine arnap keledi. Álemdik ǵalam, saıasat pen ekonomıka, ádebıet pen mádenıet, sport pen týrızm aıdarlary boıynsha tyń aqparat, keleli oı taratqan basylym paraqtarynda jańashyldyq pen dástúrli sabaqtastyq urpaqtar jalǵastyǵynyń izi saırap jatyr»,dedi qala ákimi.

Baqytjan Ábdiruly quttyqtap qana qoımaı, basqa da syı-sııapatyn ala kelgenin aıtyp, birneshe ardager tilshini Alǵys hatpen marapattady. Ákim marapattaǵan «egemendikter» arasynda Nurlan Orazalın, Sarbas Aqtaev, Darhan Qydyráli, Aıan Nysanalın, Ýahap Qydyrhan, Mamadııar Jaqyp bar.

Jıynǵa qatysýshylardy quttyqtaǵan «Egemen Qazaqstan» gazetiniń Basqarma tóraǵasy Darhan Qydyráli, bul tek bir gazettiń ǵana mereıtoıy emes, tutas qazaq baspasóziniń merekesi ekenin atap ótti. Ol Abaıdyń kindik qany tamǵan Jıdebaıdan bastaý alǵan basylym mereıtoıynyń jyl boıy atalyp ótilip, búgin Almatyda jalǵasyn taýyp, aldaǵy kúnderi Nur-Sultan qalasynda túıindelgenge deıin ótkiziletin ár túrli mazmundaǵy mańyzdy sharalar leginiń ilki sát tolastamaǵanyn aıtty. «Biz bul kúndi «Taǵzym kúni» dep atadyq. «Egemenniń» taǵdyry da, tarıhy da Almatymen tyǵyz baılanystty. «Egemen Qazaqstan» 70 jyl boıy Almatyda jaryq kórdi. Eńbek etken ardager tilshiler, gazetti shyǵarýǵa atsalysqan ómirden ótken baıyrǵy qyzmetkerlerdiń urpaqtary búgin aramyzda otyr. Almaty qalasy ákimdiginiń Ábish Kekilbaev pen Sherhan Murtazanyń rýhyna da aıyryqsha qurmet kórsetip, laıyqty ulyqtaı alǵany úshin alǵysymyzdy bildiremiz», dedi Basqarma tóraǵasy D.Qýandyquly. Sondaı-aq D.Qýandyquly birneshe «egemendikti» – N.Orazalın, S.Aqtaev, M.Jaqyp, О́.Aıtbaıuly, Ý.Qydyrhan, A.Nysanalın, G.Sádirqyzyn  tósbelgimen marapattady.

Salttanatty jıyn ústinde Ulttyq kitaphanamen birge júzege asyrylyp, sátti aıaqtalǵan aýqymdy joba –100 jyldyq jylnamanyń sıfrly nusqasy jınaqtalǵan 5 tomdyqtyń tusaýkeser rásimi de atqaryldy. Jańa kitaptyń lentasyn Almaty ákimi B.Saǵyntaev, belgili qalamgerler N.Orazalın, B.Nurjekeuly, D.Qydyráli qıyp, jıynaqtyń súıinshi danasyn Ulttyq kitaphana men qala ákimdigine tartý etti.

Almaty qalasy ákimdiginiń basshylary, belgili qoǵam qaıratkerleri, ǵalymdar, baspasóz ókilderi men kitaphana oqyrmandary qatysqan jıynda dástúrli án óneriniń sheberleri Erlan Tóleýtaı, Saıat Nurǵazın án shyrqap, M.Áýezov atyndaǵy drama teatrynyń ártisi Janat Tynybaev Mirjaqyp Dýlatovtyń «Elim-aı» óleńin oqydy. Jıynǵa qatysqandardyń barshasy ultqa tutqa bolǵan ulaǵatty basylymnyń 1000 jasaǵan shaharmen birge uzaq jasaı berýine tilek qosyp, kóńil hoshyn bildirip tarqasty.