Aǵymdaǵy jylǵy qarasha aıynyń 21-i kúni Polshanyń astanasy Varshava halyqaralyq týrızmniń ortalyǵyna aınalyp shyǵa keldi. Onyń sebebi, qalanyń tanymal oryndarynyń biri – «Mádenıet jáne ǵylym saraıy» ǵımaratynda «International Travel Show» týrıstik jármeńkesi óz jumysyn bastaǵan bolatyn. Bıyl dástúrli negizde 27-shi ret ótkizilip otyrǵan aıtýly sharaǵa álemniń 50-den astam elinen 500-ge tarta týrıstik operatorlar, agenttikter, demalys ortalyqtary, qonaq- úıler, pansıonattar, tasymaldaýshylar, ulttyq týrıstik uıymdar, sonymen qatar tutynýshy úshin tartymdy týrıstik oryndary bar qalalar men óńirler qatysýda.
Sharanyń baǵdarlamasyna keler bolsaq, alǵashqy eki kún boıy jármeńkege qatysýshylar úshin óz áleýetterin tanystyrýmen birge, bıznestik kezdesýler, konferensııalar, semınarlar men úıretý sabaqtaryn ótkizý josparlanǵan. Al úshinshi kúni tájirıbeli saıahatshylarmen kezdesýler ótkizilmek.
Polsha tarapynyń «International Travel Show» halyqaralyq týrıstik jármeńkesin udaıy ótkizýi kezdeısoqtyq emes. Sebebi Eýropanyń ortalyǵynda ornalasqan bul memleket tól týrızm salasynyń qarqyndy damýynda kóp jumys atqarýda. Qazir Polshada týrızm ındýstrııasy jaqsy qalyptasqan dep aıtýǵa tolyq negiz bar. Eldiń atalǵan saladaǵy quzyrly Sport jáne týrızm mınıstrliginiń keltirgen resmı málimetine sáıkes búginde memleket IJО́-siniń 6%-y týrızm salasynyń úlesine tıedi eken. Ol degenimiz júzdegen myń jumys orny. Resmı statıstıkaǵa súıener bolsaq, ótken 2018 jyldyń qorytyndysy boıynsha elde 47,7 mln ishki týrıst tirkelse, 19,6 mln sheteldik týrıst kelgen. Al 2019 jyldyń nátıjesi boıynsha Polshaǵa 20 mln týrıst kelýi kútilýde. Barysynda, elge kelgen týrıster sanynyń udaıy ósimin ańǵaramyz.
Bıyl dástúrli týrıstik jármeńkede Qazaqstan pavılony ashylyp, sharaǵa qatysýshylar tarapynan úlken qyzyǵýshylyq týǵyzdy. Jármeńkeniń eń kórneki jáne qozǵalys kóp bóliginde oryn tepken elimizdiń pavılonyn ońaı baıqaýǵa bolady. Birinshiden, elimizdiń týrıstik ókildigin búginde tek Qazaqstanda ǵana emes, sonymen qatar, odan tys aýmaqtarda da keń tanymal bolyp úlgergen, muzdaı qarýlanǵan ári júzderi susty qazaq batyrlarynyń beınesindegi jigitter kúzetip tursa, ekinshiden, nysannyń tóbesinen tómen qaraı ilinip turǵan túsi qanyq qyzyl «Almaty aporttary» menmundalaıdy, úshinshiden, túkti qazaq kilemderi pavılonnyń sánine ár berip jármeńkege qatysýshylardyń nazaryn ózine aýdaryp turdy.
Osy oraıda, sharaǵa otandyq delegasııany bastap kelgen «Qazaq týrızm» ulttyq kompanııasy, Marketıng, kommýnıkasııalar jáne sıfrlandyrý departamentiniń dırektory Talǵat Amanbaevtyń aıtýynsha, quzyrly kompanııa kópshiliktiń nazaryn aýdaratyn mundaı marketıngtik qadamǵa josparly túrde barypty. Qazaq batyrlarymen sýretke túsýge nıetti jandar «Qazaq týrızm» UK arnaıy heshtegin ala túsedi eken. Sonymen birge sońǵy ýaqytta keń tanyla bastaǵan barmen Álibek, kópshilik aldynda óner kórsetip, ulttyq sýsynymyz qymyzdan arnaıy kokteılder usynýmen boldy. Nátıjesinde, týrıstik jármeńkeni uıymdastyrýshylar tarapynan sharaǵa kelýshilerdiń pikirlerin eskere otyra jasaǵan jasyryn daýys berýdiń barysynda Qazaqstan pavılonyna arnaıy marapat ta jasaldy.
«Qazaq týrızm» ulttyq kompanııasynyń uıymdastyrýymen jáne Qazaqstan Respýblıkasynyń Polshadaǵy Elshiliginiń qoldaýymen jumysyn bastaǵan otandyq pavılonnyń túpkilikti maqsaty aıtýly halyqaralyq shara aıasynda elimizdiń týrıstik áleýetin sheteldikterge keshendi tanystyrý, keleshekte memleketimizge týrıster legin kóbirek tartý ekendigi belgili.
«International Travel Show» halyqaralyq týrıstik jármeńkesiniń aıasynda Qazaqstan pavılonynda Polshamen, jalpy Eýropa elderimen tyǵyz jumys jasasyp kele jatqan 5 týrıstik operator kelýshilerge óz qyzmetterin tanystyrýda.
Talǵat Amanbaev keltirgen derekterge sáıkes, aıtýly týrıstik jármeńkelerdiń berer nátıjesi joǵary. Máselen, Qazaqstanǵa keletin týrıster sany udaıy ósý ústinde. Eger, úsh jyl buryn on úsh myń, ótken jyly on bes myń týrıst kelgen bolsa, osy jyldyń qorytyndysy boıynsha jıyrma myń polıak týrısiniń kelýi kútilýde. Oǵan óz kezeginde memleketter arasynda aptasyna úsh ret qatynaıtyn tikeleı áýe reısiniń bolýy, polıak azamattary úshin jasalynǵan vızasyz rejim jáne otandyq týrıstik kompanııalardyń belsendi jumys jasaýy oń yqpal etýde eken. Mamannyń pikirinshe, polıaktardy qazaqstandyq óz qandastarynyń tarıhy, sonymen birge, ekologııalyq jáne etnostyq týrızm erekshe qyzyqtyratyn kórinedi.
Aǵymdaǵy jyldyń mamyr aıynda otandyq týrızmdi damytý boıynsha memlekettik baǵdarlamanyń qabyldanǵandyǵy belgili. Qazirgi ýaqytta «taks-frı», ıaǵnı zattyń baǵasyndaǵy qosymsha qun salyǵynyń qarajatyn qaıtarý jáne «oýpen skaı» nemese shet memleketter ushaqtarynyń elimizdiń áýejaılaryna kirý múmkindikterin keńeıtý boıynsha jumystar atqarylýda. Sońǵysy, Qazaqstanǵa ushý bıletteri qunynyń edáýir tómendeýine sep bolmaq.
Týrıstik jármeńkeniń ekinshi kúni ǵımarat kesheniniń Gıote zalynda «Qazaqtardy tany: Qazaqstandy saıahat arqyly ash» atty taqyrypta tanymdyq maqsattaǵy kezdesý ótkizildi. Tanymdyq kezdesýge Qazaqstannyń Polshadaǵy Tótenshe jáne О́kiletti elshisi Marǵulan Baımuhan myrza, «Qazaq týrızm» UK ókilderi men otandyq týrıstik operatorlar qatysyp, elimizdiń týrıstik áleýetin keshendi túrde tanystyrdy. Basqosý sońy suraq-jaýap formatynda órbip, jınalǵan kópshilik saýaldaryna jaýaptar alyp tarasty.
Halyqaralyq týrıstik jármeńke aıasynda Qazaqstan pavılonyna kelýshilerdiń sany bir sátke de úzilmedi. Kelýshiler arasynan isker azamattardy, sheteldik týrıstik fırmalar ókilderi men jornalshylardy, nemeresin ertken keıýanany, stýdent jáne oqýshy jastardy da kezdestirýge bolatyn. Solardyń birnesheýimen suhbattasqan edik:
Sergeı Kradınov,
«Raft servıs» týrıstik kompanııasynyń (Almaty oblysy) dırektory:
– О́zderińiz biletindeı bizdiń Almaty oblysy ejelden Jetisý dep atalǵan tabıǵaty keremet óńir ǵoı. Álemniń birde-bir elinde 300 shaqyrym radıýsta týrısterdiń sý sportymen aınalysýyna múmkindik beretin, rahat syılaıtyn toǵyz mol sýly ózender joq. Sondyqtan bizder raftıngti óńirimizdiń brendi retinde aıqyndap, ony halyqaralyq deńgeıde tanymal etýge, damytýǵa basymdyq berip otyrmyz. Biz óz tutynýshymyzǵa belsendi demalysty usynamyz. Ol raftıng, jaıaý serýender men shyńǵa shyǵý, velotýrlar. Ázirge demalýshylardyń basym kópshiligi óńir turǵyndary. Raftıng – ujymdyq sport túri bolýymen qyzyqty. О́zendegi kedergilerdi eńserý komandanyń árbir múshesine baılanysty. Atalǵan emosııaǵa toly sapardan keıin adamdardyń dostyǵy men birligi nyǵaıa túsedi. Biz Kókterek aýylynda, Shelek ózeni boıynda Qazaqstandaǵy alǵashqy raft lagerdi saldyq. Osyǵan deıin jumys jasaǵan úsh maýsymda bizdiń lagerimiz arqyly shamamen 5-6 myńdaı adamǵa qyzmet kórsetildi. Qazir tynyǵýshylardyń udaıy ósim dınamıkasy bar.
Artýr Kolpak:
– Men kóp memleketterge udaıy saıahattaımyn. Búgin birinshi ret qymyzdyń dámin tatyp turmyn. Dámi erekshe eken. Zamanýılyq pen ulttyq naqyshtar sheber úılesim tapqan – Qazaqstan pavılony óte utymdy shyqqan. Máselen, ulttyq órnekter kózge birden túsedi. Sizderde bıik ári ásem taýly óńirlerdiń bar ekendiginen, sonymen qatar, búrkitshilik kásibiniń jaqsy damyǵandyǵynan habardarmyn. Búgingi shara barysynda meni elderińiz týrasyndaǵy júıeli tanystyrylymdar erekshe qyzyqtyrdy. Keleshekte Qazaqstanǵa barý oıymda bar.
Marek Oshıak,
týrızm salasynyń mamany:
– Árıne, elderińiz týraly kóp oqımyn. Osy jyly Qazaqstandaǵy týrıstik jármeńkege de qatystym. Qazaqstannyń týrıstik áleýeti úlken. Mysaly, ekologııalyq týrızmge keń múmkindikter bar. Sonymen qatar polıetnostyq, kópkonfessııaly Qazaqstan jaǵdaıynda tarıhı jáne dinı-rýhanı týrızmge de basymdyq berý kerek dep oılaımyn. Ańǵarǵanym, jergilikti halyq ta sheteldikterge meıirimmen qaraıdy. Alaıda elderińizde týrızm ınfraqurylymy salasynda sheshimin tappaǵan túıtkilder de bar. Sondyqtan qazaqstandyq týrızm salasy endi damı bastaǵandyqtan salamen baılanysty ınfraqurylymdy keshendi túrde ári tez arada damytýǵa kúsh salý kerek dep oılaımyn.
Polsha astanasynda ótken «International Travel Show» halyqaralyq týrıstik jármeńkesiniń jumysy Qazaqstan úshin sátti aıaqtalǵanyna senimimiz mol.
Jandos Áýelbekuly,
arnaıy «Egemen Qazaqstan» úshin
Varshava (Polsha)
