Qazaqstan Prezıdenti Nursultan Nazarbaev Belgııa Koroli Albert II-ge jáne onyń uly Fılıppke joǵary bıliktiń resmı túrde berilýine baılanysty quttyqtaý jedelhatyn joldady, dep habarlady Prezıdenttiń baspasóz qyzmeti.
Jedelhatta Qazaqstan Prezıdenti Belgııanyń ulttyq merekesi – Koroldiń ant berý kúnimen quttyqtap, bul kúni bıliktiń berilýiniń sımvoldyq máni baryn jáne mańyzdy tarıhı oqıǵa bolyp sanalatynyn atap ótti.
«О́kilettigińizdi ulyńyzǵa berýińiz Belgııa halqynyń esinde qalatyn tarıhı mańyzy zor oqıǵa bolmaq. Men Brıýsselde ótken ekijaqty kezdesýlerdi yqylaspen eske alamyn. Elderimiz arasyndaǵy dostyq pen ekijaqty jáne kópjaqty pishindegi yntymaqtastyqty nyǵaıtýǵa baǵyttalǵan ıgi qadamdar Sizdiń jeke qoldaýyńyzdyń arqasynda iske asyrylǵany anyq», – dep atap ótilgen Korol Albert II-niń atyna joldanǵan quttyqtaý jedelhatynda.
Nursultan Nazarbaev hanzada Fılıpptiń Qazaqstanǵa 2010 jylǵy qazandaǵy saparyn da jyly sezimmen eske alatynyn jetkizgen.
«Bizdiń elderimiz arasynda qalyptasqan ózara qarym-qatynastar Sizdiń qoldaýyńyzben alda da eki el halyqtarynyń ıgiligi úshin dostyq jáne ózara túsinistik rýhynda odan ári damıtynyna senemin», – delingen jedelhatta.
Sońynda Memleket basshysy Albert II-ge jáne Korol Fılıppke zor densaýlyq, qyzmetterine mol tabys, al Belgııa halqyna baq-bereke men ıgilik tilegen.
