Keshe, kúndizgi saǵat 11:07 shamasynda qalalyq ishki ister bóliminiń jedel basqarý ortalyǵynyń kezekshisine belgisiz azamattan qońyraý túsken. Qońyraý shalǵan azamatsha «Qazkommersbank» AQ Qyzylorda oblystyq fılıalynda arnaıy qoldan jasalǵan jarylǵysh zattyń qoıylǵandyǵyn jáne onyń 15 mınýttan soń jarylatynyn aıtqan. Adamnyń záresin zár túbine jetkizetin habardan keıin Qyzylordanyń búkil quzyrly organy oryndarynan dúr kóterilgen. Aıtylǵan jerge barǵan. Sodan Qyzylorda oblystyq ishki ister departamenti, prokýratýra, Ulttyq qaýipsizdik komıteti jáne tótenshe jaǵdaılar jónindegi departamentiniń mamandary banktegi azamattardy syrtqa shyǵaryp, aımaqty oqshaýlaǵan. Osydan keıin Qyzylorda ishki ister departamentiniń arnaıy maqsattaǵy «Arlan» jasaǵy bank ǵımaratyn tekserip, onda jarylǵysh zattyń joq ekendigin anyqtaǵan.
Endi ne istemek kerek? Quqyq qorǵaý organdarynyń qyzmetkerleri jedel izdestirý jumysyna kirisedi. Qaıtkende de jalǵan aqparat taratyp, jurtty dúrliktirgen adamdy tabýǵa tıis. Jedel jumys nátıjesin bermeı qalmady. Polısııa qyzmetkerleriniń izdestirý sharalarynyń nátıjesinde jalǵan qońyraý shalǵan 1968 jyly týǵan áıel ustaldy. Atalǵan derek boıynsha kúdiktiniń ústinen QR QK-niń 242-baby boıynsha qylmystyq is qozǵalyp, tergeý amaldary da bastalyp ketti. Kúdiktiniń qylmysy tolyq dáleldense, onda oǵan sot sheshimimen 200-den 500-ge deıin aılyq esep kórsetkishinde aıyppul salynady. Bolmasa, 7 jylǵa deıin bas bostandyǵyn shekteý nemese 6 jylǵa deıin bas bostandyǵynan aıyrý jazasy taǵaıyndalýy múmkin.
Ádette kóktem men kúz mezgilinde adamdarda aýytqý bolady. Oqıǵa sol mezgilderde bolsa, túsiner ek. Shilińgir shildede bul ne qylǵan dúrliktirý? Álde basynan kún ótken adamnyń tirligi me eken? Ne bolsa da, beıbit kúnde berekemizdi qashyrǵany jaqsylyq emes.
Erjan BAITILES,
«Egemen Qazaqstan».
QYZYLORDA.
