Keshe Qazaqstan Respýblıkasy Prezıdenti janyndaǵy Ortalyq kommýnıkasııalar qyzmetiniń resmı ókili Altaı Ábıbýllaev dástúrli brıfıngte aptanyń negizgi sharalaryna toqtalyp, olar Úkimet tarapynan atqarylyp jatqandyǵyn aıtyp ótti.
Premer-Mınıstr Serik Ahmetov Qarjy mınıstrliginiń keńeıtilgen alqa májilisine qatysyp, mınıstrliktiń negizgi jáne basty mindetteri men maqsattaryna basty nazar aýdarylýda dedi. Sondaı-aq, búgin S.Ahmetov elordada salynyp jatqan Ulttyq bıotehnologııalyq ortalyqta bolyp, onyń jumys barysymen tanysatynyn jetkizdi. Prezıdent Jarlyǵymen qurylǵan bul ǵylymı ortalyqtyń basty maqsaty bıotehnologııalyq salanyń damýy men ony qoldaýdaǵy memlekettik saıasatty iske asyrý. Sonymen qatar, 25 shilde kúni Premer-Mınıstr EKSPO-2017 Halyqaralyq mamandandyrylǵan kórmesin Astanada ótkizý jáne onyń daıyndyǵy boıynsha memlekettik komıssııanyń kezekti otyrysyn ótkizedi, dedi resmı ókil. Buǵan qosa, A.Ábıbýllaev Premer-Mınıstrdiń orynbasary Erbol Orynbaevtyń osy máselemen Brıýsselge baratynyn jetkizdi.
Budan keıin Tótenshe jaǵdaılar mınıstri Vladımır Bojko «Mınıstrliktiń tabıǵı jáne tehnogendik sıpattaǵy tótenshe jaǵdaılar kezinde azamattardyń qaýipsizdigin nyǵaıtý boıynsha atqarǵan jumystary» týraly jan-jaqty aıtyp berdi Ol óz sózinde 2013 jyldyń 6 aıynda TJM kúshteri 3638 adamdy qutqaryp, TJ aımaǵynan 5243 adamdy áketkenin, 1517 zardap shekken adamǵa alǵashqy medısınalyq qyzmet kórsetilgenin baıan etti. Jalpy, ótken jyldyń uqsas kezeńimen salystyrǵanda TJ sany 20,2 paıyzǵa, qaza bolǵandar sany 18,1 paıyzǵa, zardap shekkender sany 22,2 paıyzǵa azaıypty. TJ keltirgen materıaldyq zalal 18,7 paıyzǵa kemipti.
TJM bólimsheleri turaqty túrde qajetti kúsh bolyp tabylady. Jyl boıǵy ár táýlikte olar azamattarǵa kómek kórsetýge 100-240 ret shyǵady. 2013 jylǵy 6 aıda elimizdiń sý aıdyndarynda 513 adam, onyń ishinde 141 bala zardap shekti, sonyń ishinde mınıstrliktiń sýda qutqarý qyzmeti 349 adamdy, onyń ishinde 112 balany qutqardy. Júrgizilgen sapaly aldyn alý-profılaktıkalyq jumystyń arqasynda 2012 jyldyń uqsas kezeńimen salystyrǵanda elimizdiń sý aıdyndarynda zardap shekkenderdiń sany 48 paıyzǵa, al sýǵa ketkenderdiń sany 32 paıyzǵa azaıdy. Statıstıka oqys oqıǵalardyń 99,9 paıyzy elimizdiń jabdyqtalmaǵan sý aıdyndarynda bolatynyn kórsetedi. Qazirgi ýaqytta elimizde 348 resmı sýǵa túsý orny (onyń ishinde 116 balalar jaǵajaılary) jumys isteıdi, dedi V.Bojko.
Azamattardyń sý aıdyndarynda qaza bolýynyń aldyn alý maqsatynda 2013 jylǵy sýǵa shomylý maýsymy kezeńinde mınıstrlik 58 sýda qutqarý stansasynyń, 22 qutqarý beketiniń, 7 ıkemdilik-izdestirýshi toby men 13 súńgýir avarııalyq-qutqarýshy jasaqtyń jeke quramyn joǵary ázirlikke keltiripti.
Sondaı-aq, el Úkimetiniń tapsyrmasy boıynsha mınıstrlik Skaı Eırlaıns túrik avıakompanııasynyń bankrotqa ushyraýy saldarynan Antalııada qalyp qoıǵan qazaqstandyq azamattardy elge jetkizýdi uıymdastyrǵan. 9-10 shilde aralyǵynda TJM «Qazavıaqutqarý» AQ Tý-154 ushaǵymen 188 adamdy elge alyp kelgen.
Búginde órt jáne ónerkásiptik qaýipsizdik deńgeıin arttyrý máseleleri mınıstrliktiń turaqty baqylaýynda turǵan kórinedi. Máselen, ónerkásip salasyndaǵy 17241 nysan men 2224 kásiporyn tekserýden ótse, nátıjesinde 36232 tehnıkalyq qaýipsizdik qaǵıdalary men normalaryn buzýshylyq anyqtalǵan, sonymen qatar, 1835 nysan men 5 kásiporynnyń jumysy toqtatylyp, 1420 kásiporyn basshysyna 60 mln.-nan astam teńge somasyna aıyppul sanksııasy salynypty. Qaýipti óndiristerde bizdiń usynysymyz boıynsha eskirgen jabdyqtar men tehnologııalyq jeliler turaqty túrde aýystyrylyp turady, dedi V. Bojko.
Ústimizdegi jyly «Qazaqstan Respýblıkasynyń memlekettik basqarý organdary arasyndaǵy ókilettikterdi shekteý máseleleri jónindegi keıbir zań aktilerine ózgertýler men tolyqtyrýlar engizý týraly» zań qabyldandy. Zańda jergilikti atqarýshy organdar men TJM aýmaqtyq bólimsheleriniń ókilettikteri naqty bólindi, ákimdikterdiń róli kúsheıtildi. Osylaısha endi ákimder óz óńirlerindegi tótenshe jaǵdaılardyń aldyn alý jáne olardy joıý jónindegi komıssııanyń tóraǵalary bolyp tabylady. Bul el basshylyǵynyń azamattardyń qaýipsizdigine qanshalyqty kóńil aýdaratynyn aıǵaqtaıdy.
Aleksandr TASBOLATOV,
«Egemen Qazaqstan».
